Smiley face
Smiley face
Smiley face

کژار: شەهیدانی ٩ ی گۆڵان مۆمی بەهێزکردنەوەی ئیرادەی گەلیان داگیرساند

2018-05-09 12:39:48



ڕۆژنیوز - ناوەندی هەواڵەکان

 

کژار ڕایدەگەیەنێت، شەهیدانی ٩ ی گۆڵان بە بەرخۆدانی خۆیان مۆمی بەهێز کردنەوەی ئیرادەی گەلیان لە ڕۆژهەڵاتی کوردستان داگیرساند.

 

ئەمڕۆ ٨-هەمین ساڵیادی لە سێدارەدانی (شیرین عەلەمهولی، عەلی حەیدرییان، فەرزاد کەمانگەر، فەرهاد وەکیلی و مەهدی ئیسلامیان-ە)، بۆ ئەو مەبەستەش کۆردیناسیۆنی کۆمەڵگای ژنانی ئازادی ڕۆژهەڵاتی کوردستان-کژار، ڕاگەیەندراوێکی بڵاوکردەوە.

 

لە ڕاگەیەندراوەکەدا هاتووە: شەهیدانی ٩ ی گۆڵان بە بەرخۆدانی خۆیان مۆمی بەهێز کردنەوەی ئیرادەی گەلیان لە ڕۆژهەڵاتی کوردستان داگیرساند، ساڵانێک بوو کە بێ هیوایی و نائۆمێدی لە ئاکامی سیاسەتە چەپەڵەکانی کۆماری سێدارەی ئیسلامی ئێران باڵی بە سەر گەلەکەماندا کێشا بوو، ئەو سیاسەتە بەشێوازێکی سیستماتیک و نەرم لەلایەن شانە شاراوەکانی دەوڵەتی ئێرانەوە لەناو گەلانی ئازادیخواز پەرەی پێدەدرا بۆ سەرکوتکردن و بێ ئیرادەکردنی بیر و ڕای ئازادیی دەربڕین.

 

هەروەها هاتووە: بەڵام هێزە دەسەڵاتخوازەکان باش دەزانن کە شتە دەستکردەکان و سەپێندراوەکان لەگەڵ جەوهەری گەلانی ئازادیخوازدا ناتوانێت خۆی بکات بەیەک، نموونەی هەرە بەچاو بەرخۆدانی بێ وێنەی هەڤاڵانی شەهیدمان لە زیندانی ئەوین، کە شەمشەمەکوێرەکانی کۆماری سێدارە بەهیچ شێوازێک نەیان توانی چۆک بەو ئیرادە و جەوهەرە ئازادیخوازیانەی ئەو قارەمانانەدا بێنن، بەڵکو بەپێچەوانەوە ئەوان بە بەرخۆدانی خۆیان چۆکیان بە سیاسەتی قڕکردن و نکۆڵی کردنی گەلانی بندەست هێنا.

 

لەبارەی شیرین عەلەمهوری، ڕایانگەیەندووە: شیرین بە بەشداربوونی خۆی لە ڕیزەکانی ڕزگاریخوازیدا بوو بە ڕێچکەشکێنێک لە بەرامبەر ئەو زیهنییەتەی کە ژنی بە هەبونێکی لاواز و بێ ئیرادە ناساندبووو، بە پێکهێنان و خوڵقاندنی فەلسەفەی ئازادیخوازی لە کەسایەتی خۆیدا بە دنیای سەلماند کە ئەو بیر کردنەوەیە لە بەرامبەری جەوهەری ژن هەڵەیەکی مەزنە دەرحەقی مێژووی مرۆڤایەتی.

 

باسیان لەوەشکردووە: لە ئێستاشدا دەبینین ئەو خۆڕاگرییەی کە لە زیندانی ئەوین، لە بەرامبەری زیهنیەتی بچووککردن و بێ ئیرادە کردنی کۆمەڵگا بەڕێوە دەچێت ، لە تاک بە تاکی گەنجانی کورد و نەتەوە ئازادی خوازە کان دا بەشێوازێکی زۆر بەرچاو بەرجەستەیە، یەکێک لەو کەسانە ڕامین حسێن پەناهییە کە حوکمی لە سێدارەدانی بەسەردا سەپێنراوە، ئەمە نیشاندەری بێهێزی کۆماری سێدارەیە لە بەرامبەر بیر و هزری یەکسانیخوازیدا.

 

لە کۆتایی ڕاگەیەندراوەکەدا هاتووە: لە هەر کوێیەک توندوتیژی و چەوساندنەوە هەبێت بێگومان بەرپەرچدانەوەش هەیە، پێویستە ئێران باش بزانێت کە چەندە سیاسەتی خۆی بۆ لەناوبردنی ئیرادەی گەلان بسەپێنێت ئەوەندەش دەنگی ناڕەزایەتی دەربڕینی گەلان بەهێز دەبێت و ناتوانێت بەربەست بێت لە بەرامبەر داخوازی گەلان و جارێکیتر پێویستە بە سیاسەتە هەڵەکانی خۆیدا بچێتەوە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin