Smiley face
Smiley face
Smiley face

تەڤگەری ئازادیی: دەسەڵاتی باشور کەمتەرخەمبووە لە قەرەبووکردنەوەی پشدەرییەکان

2018-04-24 09:14:48



ڕۆژنیوز – ناوەندی هەواڵەکان

 

تەڤگەری ئازادیی ڕایدەگەیەنێت، سیاسەتی ڕاگواستن و چۆڵکردنی دەڤەری پشدەر کە ڕژێمی بەعس بەکاریهێنا، نەک هەر نەیتوانی ئیرادەی گەل بشکێنێت، بەڵکو خەڵکی وڵاتپارێزی ئەو دەڤەرە بە ڕاپەرینی جەماوەریی وەڵامیان دایەوە، دەشڵێت: دەسەڵاتی باشور کەمتەرخەمبووە لە قەرەبووکردنەوەی پشدەرییەکان.

 

ئەمڕۆ، دەستەی سەرۆکایەتیی تەڤگەری ئازادیی کۆمەڵگەی کوردستان، بەبۆنەی ٤٤-ەمین ساڵیادی بۆردوومانی شارۆچکەی قەڵادزێ-وە، بەیاننایەکی بڵاوکردەوە.

 

لە بەیاننامەکەی تەڤگەری ئازادییدا، هاتووە: قەڵادزێ و دەڤەری پشدەر لە مێژوو و خەباتی ڕزگاریی و ئازادیی گەلی کورد-دا، هەمیشە بە ماڵی گەورەی تێکۆشەران و نیشتیمانپەروەران و شۆڕشگێڕانی هەرچوار بەشی کوردستان ناسراوە و خاوەنداری لێکردوون، هەر بۆیەش دوژمنانی گەلی کورد بەردەوام ویستوویانە تۆڵەی لێبکەنەوە و خەڵکە قارەمانەکەی لە شۆرش و تێکۆشان دووربخەنەوە.

 

هەروەها، هاتووە: سیاسەتی ڕاگواستن و چۆڵکردنی دەڤەری پشدەر، کە بەعسییەکان لە ١٩٨٩ - ١٩٨٨ دا لە بەرامبەر ئەو دەڤەرە ئەنجامیاندا، دژی ئیرادە و تێکۆشانی نیشتیمانپەروەریی خەڵکی پشدەربوو، بەڵام نەوەک هەر نەیتوانی ئیرادەی گەل بشکێنێت، بەڵکو گەلی کورد و خەڵکی وڵاتپارێزی دەڤەری (بتیوێن و پشدەر) لە ئازاری ساڵی ١٩٩١دا بە ڕاپەرینی جەماوەری و سەرتاسەریی، وەڵامی یەکلاکەرەوەی دانەوە و کۆتایی بە داگیرکاری و ستەمی بەعسییەکان هێنا لە باشوری کوردستان.

 

لە بەشێکی دیکەی بەیاننامەکەدا، هاتووە: لە ڕۆژگاری ئەمڕۆدا کە یادی ئەو ڕۆژە دەکەینەوە، سەرەڕای ئەو دەسکەوتانەی بەدەستهاتوون، بەهۆی ناکۆکی و ململانێی حزبە دەسەڵاتدارەکان و دوورکەوتنەوەیان لە بەرژەوەندییەکانی گەل، دوای ٢٧ ساڵ لە بەرێوەبردن و دەسەلاتدارییان نەبوونەتە وەڵام بۆ ویست و داخوازییەکانی گەل و کەمتەرخەمن لە بەرامبەر خزمەتکردنی ناوچەکە و قەرەبووکردنەوەی قوربانیانی خەڵکی زیان لێکەوتووی ناوچەکە.

 

تەڤگەری ئازادیی، ئاماژەی بەوەشکردووە: لە ئێستاشدا دوژمنانی گەلی کورد بەهەمان عەقڵییەتی شۆڤێنی و داگیرکارییەوە، بەردەوامن لە کاولکاری و کۆمەڵکوژی لەسەر گەلەکەمان، بەتایبەت دەوڵەتی داگیرکەری تورک لە ڕۆژئاوا و باشور و باکوری کوردستان چەندین تاوان و کۆمەڵکوژییان لەسەر گەلی کورد و گەلی ئێزدی ئەنجامداوە، کە نوێترینیان هێرشی دەوڵەتی داگیرکەری تورک و تیرۆرستان بوو، بۆ سەر گەلی عەفرینی خۆراگر.

 

لە کۆتایی بەیاننامەکەدا، تەڤگەری ئازادیی دەڵێت: لەم بۆنە مەرگەساتاوییەدا، شەهیدانی قەڵادزێ و سەرجەم شەهیدانی  کوردستان بەبیردێنینەوە و سەریان بۆ دادەنەوێنین و بەڵێنیان پێ دەدەین، کە بۆ ئازادیی و مافەکانی گەلی کورد بەردەوامدەبین لە تێکۆشان، تا گەیشتن بە سەرفرازی و ئازادیی کوردستان و بنیاتنانی کۆمەڵگەیەکی ئازاد و دیموکرات.

 

جێگای ئاماژەپێکردنە، ڕۆژی ٢٤ی نیسانی ساڵی ١٩٧٤، ڕژێمی بەعسی عێراق، شارۆچکەی قەڵادزێ-ی سەر بە ئیدارەی ڕاپەڕین-ی بەچڕیی تۆپبارانکرد و بەهۆیەوە زیاتر لە ١٥٠ شەهید و سەدان بیرینداری لێکەوتەوە، ئەمڕۆش ٤٤ ساڵ بەسەر ئەو یادەدا تێپەڕدەبێت.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin