Smiley face
Smiley face
Smiley face

کەنەکە پشتگیریی ڕامین حسێن پەناهیی کرد

2018-04-24 08:26:28



ڕۆژنیوز – ناوەندی هەواڵەکان

 

کۆنگرەی نەتەوەیی کوردستان لە ڕاگەیەندراوێکدا پشتگیریی ڕامین حسێن پەناهی، زیندانی سیاسیی کوردی کرد و سیاسەتە جیاکارانەکانی حکومەتی ئێران لە دژی گەلی کوردی شەرمەزارکرد.

 

کۆنسەی بەڕێوبەریی کۆنگرەی نەتەوەیی کوردستان- کەنەکە، ئەمڕۆ بەمەبەستی پشتگیریکردنی ڕامین حسێن پەناهی و هەموو زیندانیانی سیاسی ڕاگەیەندراوێکی بڵاوکردەوە.

 

کەنەکە ڕایگەیاند: زۆربەی زیندانیانی سیاسیی لە ئێران خەڵکی کوردن، ڕایگشتیی ئێرانی بەباشی ئاگادارن، کە ئەو زیندانیانە چالاکوانی سیاسی بۆ دیموکراسی و ئازادیی کۆمەڵگان و هیچ تاوانێکیان نییە، لە ٢٥/٢/٢٠١٨ دا فەرمانی لە سێدارەدانی ڕامین حسێن پەناهی دەرکرا و بەو بۆنەوە خانەوادەکەی و خەڵکی کوردستان و هەروەها ئازادیخوازانی ئێران تەواو نیگەرانن، چونکە ئەو حوکمە ناڕەوایە، نایاساییە و دڵنیایی لە سەر بێدادیی و زوڵم و زۆری کۆماری ئیسلامیی دەکاتەوە.

 

کەنەکە ڕاشیگەیاندووە: کۆنگرەی نەتەوەیی کوردستان بە هەموو شێوەیەک پشتگیریی لە زیندانیانی سیاسیی کورد و نەتەوەکانی دیکە لە ئیران دەکات و داوا دەکات، کە کۆماری ئیسلامیی ئێران کۆتایی بەو سیاسەتە دژ بە مرۆڤایەتیە بهێنێت، مێژووی تێکۆشانی ئازادیخوازیی نیشانی داوە کە سەرکوت و وەحشیگەریی ناتوانێت بەر بە بانگ و تێکۆشان بۆ ئازادیی و بۆ نان و بۆ سەروەریی یاسا و ژیانێکی ئازاد بگرێت.

 

کەنەکە بانگەوازیی گەلانی ئێران و کردستانیشی کردووە:"کۆنگرەی نەتەوەیی کوردستان داوا لە کوردستانیان و ئێرانییەکان دەکات کە لە سەر ناڕەزایی و خۆپیشاندان و چالاکیی سیاسیی بەردەوام بن و ڕووی راستەقینەی کۆنەپەرستیی و زەبرخوازیی کۆماری ئیسلامیی ئێران بخەنەڕوو، هەروەها داوا لە حیزبەکانی کوردستان، بەتایبەتیی ڕۆژهەڵات لەم بارەوە، دەکات کە لانی کەم پلاتفۆرمێکی هاوبەش بۆ پشتگیریی لە زیندانیان و بۆ پەیداکردنی هاوپشتیی و هاوسەنگەریی لەگەڵ خۆیان و خانەوادەکانیان ساز بکەن.

 

لە کۆتایی ڕاگەیەندراوی کەنەکەدا هاتووە: ئێمە دڵنیاین ڕێگای ئەوان پڕ ڕێبوار دەبێت و دەزانین کە کۆتایی داگیرکەریی بە شکستی گەورەوگران تەواو دەکەین، کوردستانیان دەزانن کە یەکێتیی نەتەوەیی، بەهێزکردن و توندکردنی شیرازەی خەباتی ئازادیخوازانە و پێشکەوتووخوازیمان تاکە گەرەنتیی سەرخستنی ئامانجمانە، لەبەرئەوە دەبێت یەکێتیی نەتەوەییمان بەهێز بکەین و کۆتایی بە سیاسەتی ناوچەگەریی و حیزبایەتیی بەرتەسک و بەرژەوەندیی کەسیی بهێنین.

 

جێگای ئاماژەیە، کە ڕۆژی ٢٣ی حوزەیرانی ساڵی ڕابردوودا، دەستەیەکی چوار کەسی پێشمەرگەکانی کۆمەڵەی زەحمەتکێشانی کوردستان-ئێران، لەناو شاری سنە کەوتنە بۆسەی سوپای پاسدارانی ئێرانەوە، بەهۆیەوە سێ پێشمەرگە شەهیدبوون، ڕامین حسێن پەناهی-یش یەکێک لە پێشمەرگەکان بوو بە برینداری کەوتە دەست هێزەکانی سوپای پاسدارانی ئێران  و ئێستاش سزای لەسێدارەدانی بۆ بڕاوەتەوە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin