Smiley face
Smiley face
Smiley face

کەرکوک، ٢٦ لیست و هاوپەیمانی کێبڕکێ بۆ ١٢ کورسی دەکەن

2018-04-21 07:55:49



ڕۆژنیوز – کەرکوک


٢٦ لیست و هاوپەیمانیی لە شاری کەرکوک کێبڕکێ دەکەن بۆ بردنەوەی ١٢ کورسی ئەنجومەنی نوێنەرانی عێراق و پەرتەوازترین لایەنیش عەرەبە.


بڕیارە ١٢ی ئایاری ئەمساڵ هەڵبژاردنی ئەنجومەنی نوێنەرانی عێراق بەڕێوەبچێت و بەپێی ڕێژەی دابەشکردنی کورسی بۆ پارێزگاکان، شاری کەرکوک ١٣ کورسی لە ئەنجومەنی نوێنەرانی عێراق بۆ دابینکراوە، کە  ١٢ کورسیی بنەڕەتییە و کورسیەکیش سیستمی کۆتایە، لە ئێستاشدا بانگەشەیەکی توند لە شارەکەدا بەڕێوەدەچێت.


زیاتر لە ٣٠٠ کاندید لە پارێزگای کەرکوک کێبڕکێ دەکەن بۆ بەدەستهێنانی کورسییەکانی ئەو پارێزگایە لە ئەنجومەنی نوێنەرانی عێراق.


حزب و لایەنە کوردییەکان لە کەرکوک بە پێنج لیست و هاوپەیمانی بەشداریی لە هەڵبژاردن دەکەن، حزب و لایەنە تورکمانییەکان بە چوار لیست و هاوپەیمانی، کریستیانەکان بە سێ حزب، پێکهاتەی عەرەب بە ١٤ حزب و هاوپەیمانی، بەمەش دەتواندرێت بوترێت، کە پێکهاتەی عەرب پەرشوبڵاوترین لایەنی شارەکەیە.


لە هەڵبژاردنی ساڵی ٢٠١٤ کورد لە شارەکە زۆرترین ڕێژەی دەنگی بەدەست هێنا، لایەنی کوردیی توانی هەشت کورسی ئەنجومەنی نوێنەرانی عێراق مسۆگەر بکات، لایەنی تورکمان دوو کورسیی و لایەنی عەرەبی دوو کورسیی، پێهاتەی ئاشوری-ش یەک کورسی کۆتا.


لەم هەڵبژاردنەدا و بەهۆی ڕووداوەکانی ١٦ی ئۆکتۆبەرەوە، کە شارەکە لەلایەن هێزەکانی عێراقەوە دەستی بەسەردا گیرا، بە بێ هیچ بەرگرییەکی هێزە کوردییەکان، بۆیە پێشبینی دەکرێت کورد لە شارەکە بەشێک لە دەنگەکانی لە دەستبدات.


٩٥٠ هەزار کەس لە کەرکوک مافی دەنگدانی هەیە، لەو ژمارەیەش ٦٨٦ هەزار و پێنج کەس، کە دەکاتە ڕێژەی ٧٢% بایۆمەترییان کردووە و کارتی دەنگدانیان وەرگرتووەتەوە.


بە پێی ئەو زانیاریانەی ڕۆژنیوز لە کۆمسیۆنی باڵای هەڵبژاردنەکانی عێراقەوە وەریگرتووە، زۆرترین کارتی دەنگدان لە گەڕەکە کوردنیشەکان وەگیراوەتەوە، بە شێوەیەک زۆرترین کارتی دەنگدان لە هەردوو بنکەی شۆریجە و ئیسکان-ی کوردنشین وەگیراوەتەوە، بە بەراورد بەو گەڕەکانەی عەرەب و تورکمانیی تێدا نیشتەجێن، ئەمەش کوردەکان وەک هیوایەک لێی دەڕوانن.


هەروەها، ڕێژەی وەرگرتنەوەی کارتی دەنگدان لە شارۆچکەی حەویجە و سێ شاردێی عەرەب نشینی سەر بە حەویجە، کە دەکەوێتە بازنەی پارێزگای کەرکوکەوە، تا ١٠ی ئەم مانگە ١٩٪ بووە.


ئەگەرچی بەپێی یاساکانی کۆمسیۆن و پەرلەمانی عێراق، دەبێت لە هەموو لیستە براوەکاندا ڕێژەی بەشداربوونی ژنان ٢٥٪ کەمتر نەبێت، بەڵام لە ٣٠٠ کاندیدی سنووری پارێزگای کەرکوک ٦٠ کاندیدیان ژنن، کە دەکاتە تەنها ٢٠٪ی کاندیدەکان.


بە گشتی لە عێراقدا ٢٤ ملیۆن و ٤٠٠ هەزار کەس مافی دەنگدانیان هەیە.


بەپێی بڕیاری کۆمسیۆنی باڵای سەربەخۆی هەڵبژاردنەکانی عێراق، ئەو کەسانەی ناویان لە سیستمی بایۆمەتریی تۆمارنەکردووە دەتوانن دەنگ بدەن، بەو مەرجەی کارتی دەنگدانی هەڵبژاردنەکانی پێشووتریان هەبێت، بەپێچەوانەوە لە مافی دەنگدان بێبەش دەبن.


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin