Smiley face
Smiley face
Smiley face

خاوەن پێداویستییەکی تایبەت ١٥ ساڵە چەرخ دەفرۆشێت

2018-04-16 13:35:02



ڕۆژنیوز- سوێسنە سەلام

 

هاوڵاتییەکی خاوەن پێداویستی تایبەتی شاری سلێمانی، ١٥ ساڵە بە فرۆشتنی چەرخ بژێویی ژیانی خۆی و خێزانەکەی دابین دەکات.

 

عوسمان کەریم، هاوڵاتییەکی تەمەن ٦٣ ساڵی دانیشتووی شاری سلێمانی-یە و ماوەی ١٥ ساڵە چەرخ دەفرۆشێت.

 

عوسمان، خاوەن پێداویستیی تایبەتە و لە مانگی ئەیلولی ساڵی ١٩٨٨ و  لە جەنگی ئێران – عێراق-دا هەردوو قاچی لەدەستداوە، بەڵام نە لەدەستدانی بەشێکی جەستەی و نە هەڵکشانی تەمەنی پشوویان بە عوسمان نەداوە و لەگەڵ دەرکەوتنی ڕۆژدا بە کورسییە تایبەتەکەی لە ماڵ دەچێتە دەرەوە بۆ ناوبازاڕ و لەبەردەم کاسۆمۆڵ، چاوەڕوانی کڕیارەکانی دەکات.

 

عوسمان کەریم، هاوسەرەکەشی خاوەن پێداویستی تایبەتە و جگە لەو داهاتەی، کە لە فرۆشتنی چەند دانە چەرخێک دەستیان دەکەوێت و مووچەی کەمئەندامیی، کە تەنیا ٩٠ هەزار دینارە و سێ مانگ جارێک وەریدەگرن، هیچ سەرچاوەیەکی دیکەی داهات-یان نییە.

باری دارایی ئەو خێزانە لە ئاستێکی باشدا نییە، بەڵام خەندەی سەر لێوی عوسمان و ڕەنگاوڕەنگیی چەرخەکانی، جوانی و شیرینیی ژیان و ئیرادەی بەرزی ئەو مرۆڤە نیشان کڕیاران و ڕێبواران دەدا.

 

ئێوارە دادێت و عوسمان کەریم، پەنجە لەسەر دوگمەی کورسییە کارەباییەکەی دادەگرێت و بە و ئەو بڕە پارە کەمەی دەستی کەوتووە، خۆاردن و پێداویستیی ڕۆژانەی خۆی و هاوسەرەکەی دەکڕێت و بەرەو ماڵەوە بەڕێدەکەوێت، تا لەگەڵ هاوسەرەکەیدا لەسەر سفرەیەکی بچوک و بەدەم خواردنەوە بەسەرهاتەکانی ئەو ڕۆژە بۆ یەکتر بگێڕنەوە.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin