Smiley face
Smiley face
Smiley face

سلێمانی، بە مەراسیمێکی شکۆمەندانە یادی ساکینە جانسز و ھەڤاڵانی کرایەوە.. بەوێنە

2018-01-12 17:43:02



ڕۆژنیوز - ڕۆزە محەمەد

 

لە شاری سلێمانی، بە مەراسیمێکی شکۆمەندانە، یادی سێ ژنە تێکۆشەری کورد ساکینە جانسز و لەیلا شایلەمەز و فیدان دۆغان کرایەوە و چوارەمین خەڵاتی ساکینەش درایە ژنە تێکۆشەرێک.

 

ئێوارەی ئەمڕۆ، لە ھۆڵی تەوار لە شاری سلێمانی، بە مەراسیمێک یادی پێنجەمین ساڵیادی کۆمەڵکوژی پاریس کرایەوە، کە تیایدا سێ ژنە تێکۆشەری کورد ساکینە جانسز، لەیلا شایلەمەز و فیدان دۆغان تیرۆرکران.

 

 

مەراسیمەکە لەلایەن ڕێکخراوی ژنانی ئازادی کوردستان-ڕژاک ڕێکخرابوو، بە ئامادەبوونی تەڤگەری ئازادی و ژنانی گەنجی تێکۆشەر و گەنجانی وڵاتپارێز و چەندین کەسایەتی ئامادەی مەراسیمەکە بوون.

 

لە سەرەتای مەراسیمەکەدا، ئیبراھیم حەمەئەمین، ئەندامی ئەنجومەنی کۆمیتەی خانەوادەی شەھیدانی پەکەکە لە باشوری کوردستان، وتیاری کۆمیتەکەی پێشکەشکرد، کە تێیدا ھاتبوو:"ئەو ڕاستیە ئاشکرا دەکەین کە پەکەکە ھیچ تاوانێکی بێ سزا نەھێشتووەتەوە، ئەوەش دەخەینەڕوو، کە خەباتی ئازادیخوازانی پەکەکە بەردەوام لە گەشەدایە و ئەمەش دوژمنانی دووچاری شکست کردووە".

 

 

ئیبراھیم، وتیشی:"ئەم تاوانی کۆمەڵکوژیە لە کاتێکدا بوو کە خەباتی پەکەکە بەرەو پەرەسەندن دەچوو، دوژمنانی کوردستان چاویان بەوە ھەڵنەھات و بێگومان ڕاستینەی پەکەکە ڕاستینەی شەھیدانە، شەھیدانمان بوونەتە ڕووناکی ڕێگەمان، پەیمانی بەرخودانمان و برەودان بە فکری ڕێبەرمان دەخەینە پێشینەی کارمان".

 

هەر لە مەراسیمەکەدا، نەجیبە عومەر، ئەندامی ڕێکخراوی ژنانی ئازادی کوردستان-ڕژاک، وتارێکی پێشکەشکرد و وتی:"سەری ڕێز و نەوازش لەبەردەم گیانی پاکیان دادەوەنێنین، شەهید ساکینە یەکەمین ژنە کە ڕووبەڕووی ھەموو ئاستەنگیەکانی کۆمەڵگا بوویەوە، لە ئاواکردنی خەباتی ژنان دەستی ھەبوو، ئەو وەکو خوێندنگایەکی تێکۆشانە، ئەو کەسانەی کە یەکەم ھەنگاو دەبڕن دەبنە دەستپێشخەری ھەموو ئاستەنگیەکان و دەبنە قەڵغان لەبەردەم ھەموو ئاستەنگیەکان، ڕێبەرمان دەڵێت مێژووی خەباتی ژن مێژووی خەباتی ھەڤاڵ ساکینەیە".

 

 

نەجیبە، وتیشی:"بۆیە ساکینە جانسز کرایە ئامانج، چونکە یەکەم ژن بووە کە لە دامەزراندنی پارتێکی دیموکراسی جێگەی گرتووە، ئامانجی تیرۆریستان ئەوەیە کە لە ڕێگەی تیرۆرکردنی ژنێک لە خەباتی ژنان بدەن، پاریس شوێنی گرتن و کوشتنی کەسانی شۆڕشگێڕە".

 

ئاماژەی بەوەشدا:"بە کوشتنی بکوژانی ئەم ژنە شۆڕشگێڕانە و ئازادیخوازانی دیکە ئیتر نابێتە تۆڵە بۆ ئەو کۆمەڵکوژیە، بەڵکو ئیتر پێویستە بە ئازادکردنی ژنانی شەنگال و شەنگال، ھەروەھا دامەزراندنی گرووپی ژنی شۆڕشگێڕە تۆڵەی ئەو تاوانانە بکەینەوە، ئەم شۆڕشەی ئێستا شۆڕشێک نییە تەنھا بە کوردستانەوە بەسترابێت، بەڵکو بڵاوبووەتەوە بە ھەموو جیھاندا".

 

لە بەشێكی دیکەی مەراسیمەکەدا، بێریڤان محەمەد، ئەندامی دەستەی بەڕێوەبەری تەڤگەری ئازادیی کۆمەڵگەی کوردستان، وتارێکی پێشکەشکرد و وتی: ئەوەی جێگەی خۆشبەختییە ئەوەیە کە بە پێشانگایەتی شەھید ساکینە تێکۆشانی گەلی کورد پێشدەکەوێت و پێشەنگایەتی گەلی کورد لە ھەموو جیھان دەنگی داوەتەوە و چەندین کەسی بیانی لەناو تەڤگەردا جێگەی گرتووە، ھەرئەمەش ئەوەمان بۆ ڕوون دەکاتەوە کە بۆچی شەھید ساکینە جانسز تیرۆرکرا.

 

 

بێریڤان، وتیشی:"ساکینە جانسز تا دواین سات بۆ یەکێتی نەتەوەیی و یەکگرتوویی گەلی کورد ھەوڵی دەدا، بۆیە پێویستە ئێمەش درێژەپێدەری ڕێبازەکەی بین، وەڵامدەرەوەی ئەو داگیرکاریانە بین کە لەسەر گەلەکەمان هەیە".

 

هەر لە مەراسیمەکەدا، بروسکەی پارتی یەکێتی دیموکرات-پەیەدە و کۆمەڵگای ژنانی ئازادی ڕۆژھەڵاتی کوردستان- کەژار خوێندرایەوە.

 

هەروەها تابلۆیەکی شێوەکاریی ساکینە جانسز نمایشکرا، کە لە لایەن شێوەکار و ئەندامی گرووپی شێوەکاری چاند و ھونەری باشور ھاوڕێ عەلی دروستکرابوو.

 

 

پاشان لە لایەن گروپی شەھید دەریا زێباری ڕێکخراوی نوێگەر، شانۆکارییەک پێشکەشکرا و هاوکات چەندین گۆرانی لە لایەن تیپی شەھید سەرحەدەوە پێشکەشکرا.

 

هەر لە مەراسیمەکەدا، چوارەمین خەڵاتی ساکینە جانسز بەخشرایە ژنە تێکۆشەر و ژینگەپارێز و دۆستی کورد پێرتا کاسێریس.

 

 

لەکۆتایی مەراسیمەکەدا، کورتە فیلمێک لەسەر ژیان و تێکۆشانی شەهیدانی کۆمەڵکوژیی پاریس پێشکەشکرا.

 

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin