Smiley face
Smiley face
Smiley face

بەشێک لە دەرچووانی زانکۆ: هیوامان بە دامەزراندن نییە

2017-12-10 17:15:28



ڕۆژنیوز - سەمیرا شەهابی

 

بەشێک لە دەرچووانی زانکۆی سلێمانی ڕایدەگەیەنن، کە هەرچەندە هیوایەکمان نییە بۆ دامەزراندن، بەڵام داواکاریشین کە حکومەت بێ هەڵوێست نەبێت لەئاست داواکارییەکانماندا، مامۆستای زانکۆ-یش دەڵێت: یاسایەکی تەواو نییە بۆ دامەزراندن لە سیستەمی حوکمڕانی هەرێمی کوردستان-دا.

 

ئەمڕۆ، بەئامادەبوونی خوێندکارانی کۆلێژی زمان، زانستە مرۆڤایەتییەکان و زانستە ئیسلامییەکان، مەراسیمی دووەمین خولی دەرچووانی خوێندکارانی زانکۆی سلێمانی بەڕێوەچوو.

 

 

لە مەراسیمەکەدا، خوێندنی سرودی نیشتمانی و دەقەیەک وەستان بۆ ڕێزگرتن لە خوێنی شەهیدان و ئەنجامدانی سوێندی یاسایی لەلایەن خوێندکاران-ەوە بەڕێوەچوو.

 

تاڤان جوامێر، خوێندکارێکی دەرچووی کوڵێژی زمان، بە ڕۆژنیوزی وت:"هەرچەندە قۆناغی خوێندنم تەواوکرد و بڕوانامەی بەکالۆریۆسم بەدەستهێناوە، بەڵام هیچ هیوایەکم بەوە نییە کە دابمەزرێم وچارەنووسی منیش وەک خوێندکارانی دیکەیە، حکومەتیش لە ئاست ئەمەدا بێ بڕیارە و هیچ کارێک ناکات بۆ دامەزراندن، ڕۆژ لەدوای ڕۆژیش ڕێژەی بێکاری زیاد دەکات، بە تایبەت لەناو ژناندا، بۆیە داواکارین کە چاوێک بە بڕیارەکانیاندا بخشێننەوە وهەلی کارمان بۆ بڕەخسێنن".

 

تاڤان جوامێر

 

دەرچوویەکی دیکەی کۆلێژی زمان-ی زانکۆی سلێمانی بەناوی ئاری عومەر، بۆ ڕۆژنیوز وتی:"بەدەستهێنانی ئەم بڕوانامەیە وەک کلیلێک دەبینم بۆ کردنەوەی دەرگایەکی تری ژیانمان، ئەوەشی کەبەدەستمان هێناوە لە پێناو خاک، زمان، نەتەوە و بەرەوپێشبردنی کۆمەڵگایە، بۆیە ئێمە وەک خوێندکاران و دەرچووان  داواکارین کە حکومەت هەلی کارمان بۆ دابینبکات، بۆ ئەوەی ڕەنجمان بە فیڕۆ نەچێت و خزمەتێک بکەین".

 

ئاری عومەر

 

د.شیلان عومەر، مامۆستای زانکۆ و پڕۆفیسۆری یاریدەدەر لە زانکۆی سلێمانی، بە ڕۆژنیوزی وت:"ئەگەر ئێمە پەێڕەو وسیستەمی حکومڕانی بەهێزمان هەبێت و بگەڕێینەوە بۆ دابەشکردنی ئەرک و مافەکانمان، ئەوا دەبێتە خاڵی دلخۆشکەر بۆ جێبەجێکردنی داواکارییەکانی خوێنکاران لەچوارچێوەی توێژینەوەکانیان و پسپۆڕییەکانیان بڕیاردەدرێت، بەڵام بە داخەوە و بە دڵنیاییەوە کارنەکراوە و ئێمە ڕەشبینین بەوەی کە یاسایەکی لەو جۆرە نییە".

 

د.شیلان عومەر

 

جێگەی ئاماژەیە، کە ساڵانە لە هەرێمی کوردستان، خوێندکاران لەدوای تەواوکردن خوێندن و وەرگرتنی بڕوانامە، بەشێکی زۆریان بەبێکار دەمێننەوە و حکومەتیش تا ئێستا وەک پێویست نەیتوانییوە هەلی کار و دامەزراندن بۆ درچووانی زانکۆ و پەیمانگاکان دابینبکات.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin