Smiley face
Smiley face
Smiley face

لەسەر مەخمور پەرلەمانتارێکی عێراق داوای هەڵوێست لە بەغدا دەکات

2017-12-10 12:08:33



ڕۆژنیوز – سۆران حسێن

 

پەرلەمانتارێکی عێراق ڕایدەگەیەنێت، بەتوندی هێرشی سەر مەخمور شەرمەزار دەکەین، کە لە تورکیا دەریانکردن لێرەش هێرشیان دەکەنەسەر، دەشڵێت: ئەگەر عێراق باسی سیادەی عێراق دەکات، دەبێت حکومەت هەڵوێستی خۆی ڕوونبکاتەوە.

 

شەوی ٦ی ئەم مانگە، هێرشێکی ئاسمانی کرایە سەر کامپی پەنابەرانی شەهید ڕۆستەم جودی لە مەخمور، بەهۆیەوە پێنج ئەندامی هێزەکانی پاراستنی جەوهەری کامپەکە شەهیدبوون و سیانی دیکەش برینداربوون، لەوبارەیەوە محەمەد عوسمان، ئەندامی ئەنجومەنی نوێنەرانی عێراق لە فراکسیۆنی یەکێتی بۆ ڕۆژنیوز دەدوێت.

 

محەمەد عوسمان، وتی: ئەو هێرشەی کەکراوەتە سەر کامپی مەخمور کە ئاوارەکانی باکوری کوردستانی تێدایە و هەر بەشێکن لە ئێمە، تاوانێکی گەورەیە، ئێمە شەرمەزارو مەحکومی دەکەین".

 

 

وتیشی:"دانیشتوانی کامپی مەخمور هاوڵاتی مەدەنین و چەکدارنین، حکومەتی تورکیا ڕێگای نەداوە لە شوێنی خۆیان بژین، ئێستاش ڕێگا نادەن وەک مۆڤێک لێرە بژین، بۆیە پێمانوایە کە بەپێی ڕێککەوتنە نێودەوڵەتییەکان و بنەماکانی مافی مرۆڤیش ئەمە پێشێلکارییەکی گەورەیە".

 

ئەو ئەندامەی ئەنجومەنی نوێنەرانی عێراق، ئەروەشی وت: لێرە بەدواوە با کەس باسی سیادەی عێراق نەکات، یاخود لەسەر ئەو بۆردوومانەی سەر کامپی مەخمور بێنە وەڵام و هەڵوێستیان هەبێت، چونکە بەپێی ڕێککەوتنی نێودەوڵەتی سنوورەکانیش، نابێت هیچ دەوڵەتێک هێرشبکاتە سەر سنووری وڵاتێکیتر.

 

ناوبراو ئاماژەی بەوەشکرد: لەجیاتی ئەوەی بۆردوومانی کامپەکان و ئاوارەکان بکرێت، باشترە کاربکرێت کە سیستمی دیموکراسی لە وڵاتدا بەرقەرار بکرێت و کاری بۆ بکرێت، بۆ ئەوەی هەموو پێکەوە گفتوگۆ بکەن و بگەنە ئاشتی، نەک نە بەردەوامبن لە کوشتن.

 

دەربارەی بێدەنگی پەرلەمانی عێراق لە ئاست هێرشەکەدا، محەمەد عوسمان، وتی:"لە ڕاستی ئێمە ئێستا لە پشووی زستانەی پەرلەمانداین تا سەری ساڵ، بەڵام ئەمەش ئەوە ناگەیەنێت کە بێدەنگبین، ئێمە لە بەیاننامەکانماندا ئاماژەی پێدەکەین و لەم ڕۆژانەدا بەفەرمی لەسەر گەلی خۆمان لە کامپی مەخمور هەڵوێستی جدییمان دەبێت".

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin