عەبادی: عێراق لاپەڕەیەکی نوێ لەگەڵ دەوڵەتانی دراوسێ و جیهان هەڵدەداتەوە

ڕۆژنیوز – ناوەندی هەواڵەکان

سەرۆک وەزیرانی عێراق ڕاگەیاند، خاکی عێراق بە تەواوی ئازادکراوە و خەونی سەرکەوتن بووەتە ڕاستی، دەشڵێت:"عێراق لاپەڕەیەکی نوێ لەگەڵ دەوڵەتانی دراوسێ و جیهان هەڵدەداتەوە، لەسەر بنەمای دەستوەرنەدان لە کاروباری ناوخۆیی یەکتر".

ئێوارەی ئەمڕۆ، حەیدەر عەبادی، سەرۆک وەزیرانی عێراق، وتاری "سەرکەوتنی بەسەر داعش-دا" پێشکەشکرد.

حەیدەر عەبادی، وتی: سەرکەوتنە گەورەیەوە پارێزگاریکردنە لە یەکێتی خاکی عێراق و ئێستا لە قۆناغی دوای سەرکەوتن بەسەر داعشداین.

عەبادی داواشی لە سیاسییەکان-ی عێراق کرد، کە ڕێگری بکەن لە گەڕانەوەی داعش و وتارە تایەفییەکانیان بوەستێنن.

لە بەشێکی دیکەی قسەکانیدا، سەرۆک وەزیرانی عێراق ڕایگەیاند: عێراق لاپەڕەیەکی نوێ هەڵدەداتەوە لە مامەڵەکردن لەگەڵ دەوڵەتانی دراوسێ و جیهان، لەسەر بنەمای دەستوەرنەدان لە کاروباری ناوخۆیی یەکتر.

هەر لە وتارەکەیدا، حەیدەر عەبادی جەختیشیکردەوە، کە پێویستە چەک تەنها بە دەستی دەوڵەتەوە بێت و دادپەروەری و یەکسانی بەدی بێت لە نێوان سەرجەم پێکهاتەکانی عێراقدا.

هەر بەبۆنەی کۆنترۆڵکردنەوەی تەواوی خاکی عێراق و کۆتاییهاتنی شەڕی داعش، حەیدەر عەبادی، سەرۆک وەزیرانی عێراق، سبەینێ یەکشەممە ١٠-١٢-٢٠١٧ ی لە عێراق کردە پشووی فەرمی.  

ب.ل