Smiley face
Smiley face
Smiley face

لەمەودوا پارەی فڕێدانی زبڵ و خاشاک لە شوێنە بازرگانییەکان وەرناگیرێت

2017-11-21 16:24:25



ڕۆژنیوز - قەرەچوغ ئەنوەر

 

ئەنجومەنی پارێزگای ھەولێر بڕیاریدا، وەرگرتنی پارەی فڕێدانی زبڵ و خاشاک لە دوکان و شوێنە بارزگانییەکان، تا دوای چارەسەربوونی قەیرانی دارایی ڕابگیرێت.

 

ئەمڕۆ سێ شەممە، ئەنجومەنی پارێزگای هەولێر، کۆبونەوەی ژمارە ٥٤ ی لەسەر چەند تەوەرێک ئەنجامدا، کە تایبەت بوون بە یاداشتی لیژنەی شارەوانی و دارایی لە بارەی پاری زبڵ و خاشاکی شوێنە بازرگانییەکان، هەروەها داواکاری ژمارەیەک خێزانی سنووری شارەدێی ھەریر، بۆ دروست کردنی گوندی میللەت.

 

 

لە کۆبوونەوەکەدا، دەستەی سەرۆکایەتی ئەنجومەنی پارێزگای ھەولێر، وەرگرتنی پارەی زبڵ و خاشاک لە شوێنە بازرگانییەکان، کە وەک پڕۆژەیەک لەلایەن لیژنەی دارایی و شارەوانییەکانی ئەنجومەنەکەوە ئامادەکرابوو، خرایە بەرنامەی کارەوە و دوای گفتوگۆکردن لەسەری، ئەنجومەنی پارێزگای ھەولێر بە زۆرینەی دەنگ بڕیاریدا، وەرگرتنی پارەی زبڵ و خاشاک لە دوکان و شوێنە بازرگانییەکان، تا دوای باشتر بوونی قەیرانی دارایی ڕابگیرێت.

 

ھەر لە میانەی دانیشتنەکەدا، ئەندامانی ئەنجومەنی پارێزگای هەولێر داواشیان کرد، بڕیاری وەرگرتنی پارەی زبڵ و خاشاک لە ماڵان، لەم بارودۆخەی ئێستا نەچێتە بواری جێبەجێ کردنەوە، چونکە باری دارایی ھاوڵاتیان لە ئاستێکی زۆر خراپ دایە.

 

لە ٣ی شوباتی ٢٠١٧، ئەنجومەنی وەزیرانی ھەرێم بڕیاریدا لە بەرامبەر فڕێدانی زبڵ و خاشاک لە ماڵان و شوێنە بازرگانییەکان، بڕێک پارە وەربگیرێت، بەڵام بەھۆی قەیرانی دارایی و ھەندێ کێشەی کارگێڕییەوە، بڕیارەکە تەنھا لە پارێزگای ھەولێر و لە سەر شوێنە بازرگانییەکان جێبەجێ کراوە.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin