Smiley face
Smiley face
Smiley face

سلێمانی، لە مەراسیمێکدا ئازاد کردنی ڕەقە پیرۆزکرا

2017-10-20 16:05:59



ڕۆژنیوز - بەرهەم لەتیف

 

بۆ پیرۆزکردنی ئازادکردنەوەی شاری ڕەقە، نوێنەرایەتی خۆسەری دیموکراتی ڕۆژئاوای کوردستان لە باشوری کوردستان، سیمینارێکیان لە شاری سلێمانی ڕێکخست و تێیدا چەندین وتار پێشکەشکرا.

 

کاتژمێر ٢:٣٠ پاشنیوەڕۆی ئەمڕۆ، لە هۆڵی ئەکواپارک لە شاری سلێمانی، بۆ پیرۆزکردنی ئازادکردنەوەی شاری ڕەقە لەلایەن هێزەکانی سوریای دیموکراتەوە، نوێنەرایەتی خۆسەری دیموکراتی ڕۆژئاوای کوردستان لە هەرێمی کوردستان، مەراسیمێکیان ڕێکخست.

 

مەراسیمەکە بەشداری ژمارەیەکی بەرچاو لە پەنابەرانی ڕۆژئاوای کوردستان لە هەرێمی کوردستان و ژمارەیەک لە نوێنەرانی حزب و لایەنە سیاسییەکان، بە ساتێک وەستان بۆ ڕێزگرتن لە خوێنی شەهیدان دەستیپێکرد.

 

لە سەرەتای سیمینارەکەدا، وتاری کۆنگرەی ستار لەلایەن جیهان خەلیل نوێنەری ڕکخراوەکە لە باشوری کوردستان، دواتریش وتاری نوێنەرایەتیی پارتی یەکێتی دیموکراتی-پەیەدە، لەلایەن سلێمان عەرەب نوێنەری پەیەدە لە هەرێمی کوردستان، بە زمانی عەرەبی پێشکەشکران.

(جیهان خەلیل)

دواتر وتاری کۆمیتەی خانەوادەی شەهیدانی پەکەکە لە باشوری کوردستان، لەلایەن ئیبراهیم محەمەد، ئەندامی کۆمیتەکە پێشکەشکرا و وتی:"سەرکەوتنی شاری ڕەقە، هیوایە بۆ گەلی کورد لە هەر چوارپارچەی کوردستان و ڕۆژهەڵاتی ناوەڕاست، ئەم شۆڕشە ئێستا پێشەنگایەتی ڕۆژهەڵاتی ناوەڕاست دەکات، هەروەها پلانگێڕێییەکانیش بەرامبەر سەرکەوتنی شاری ڕەقە و گەلی کورد فراوانتر دەبن".

(ئیبراهیم محەمەد)

دواتر، ئاراس وەلی ئەندامی جڤاتی نیشتمانی بزوتنەوەی گۆڕان وتارێکی پێشکەشکردو، وتی:"سەرکەوتنی شۆڕشی گەلی کورد لە ڕۆژئاوای کوردستان، ئیلهام بەخشە بۆ شۆڕشی کورد لە هەرچوارپارچەی کوردستان، ئێمە ئەم سەرکەوتنانە بەرز دەنرخێنین".

 

(ئاراس وەلی)

ئاراس، وتیشی:"لە باشوری کوردستان بە ئەقڵییەتی خێڵ، حزب و بنەماڵە مامەڵە لەگەڵ دەستکەوتەکان کراوە، بۆیە ئەمەی کە ئێستا ڕوو دەدات لە باشور، بەرهەمی ٢٦ ساڵی حوکمی ئەم حزب و عەقڵییەتانەیە".

 

هەر لە درێژەی سیمینارەکەدا، ڕووناک مەجید، جێگری هاوسەرۆکانی تەڤگەری ئازادی کۆمەڵگەی کوردستان، وتارێکی پێشکەشکردو، وتی:"ئازادی ڕقە هەنگاوێکی نوێیە بۆ ڕۆژهەڵاتی ناوەڕاست، ئێمە کۆنفیدراڵیزمی دیموکراتی بە گونجاوترین سیستەم دەزانین بۆ کوردستان و ڕۆژهەڵاتی ناوەڕاست، کە ئەو سیستەمەش ئێستا لە ڕۆژئاوای کوردستان بەرجەستە دەکرێت".

(ڕووناک مەجید)

لە کۆتایی مەراسیمەکەدا، جاویدان حەسەن نوێنەری خۆسەری دیموکراتی ڕۆژئاوای کوردستان لە هەرێمی کوردستان، وتارێکی پێشکەشکرد، تیایدا وێڕای بەخێرهێنانی ئامادەبووان، وتی:"شەڕی ئازدی شاری ڕەقە، لەپێناو مرۆڤایەتیدا بوو".

 

جاویدان حەسەن، وتیشی:"کاتێک هێزەکانی سوریای دیموکرات بە پێشەنگایەتی یەکینەکانی پاراستنی گەل-یەپەگە دروستکرا، هەموو پێکهاتەکانی باکوری سوریا تیایدا بەشداربوون، بۆیە بڕیاری پاراستنی باکوری سوریا-یان دا".

(جاویدان حەسەن)

نوێنەری خۆسەری دیموکراتی ڕۆژئاوای کوردستان لە هەرێمی کوردستان، دەشڵێت:"بڕیاری ئازادکردنەوەی ڕەقەی پایتەختی داعش، بۆ پاراستنی باکوری سوریا و ڕۆژئاوای کوردستان بوو، چونکە باکوری سوریا پارێزراو نەبوو، کە دەوڵەتێکی تیرۆرستی دراوسێی بێت، بۆ تۆڵەسەندنەوەی ژنانی شەنگال بوو".

 

جاویدان حەسەن، باسی لە گرنگی ئازادکردنی شاری ڕەقە کردو، وتی:"شاری ڕەقە دەکەوێتە ناوەڕاستی سوریاوە، ڕەقە دراوسێی پێنج پارێزگای سوریایە، ئەوەی ڕەقە کۆنترۆڵ بکات، واتە داهاتووی سوریای کۆنترۆڵ کردووە، خۆشبەختانە ئەوەش بەدەستی شەڕڤانانی هێزەکانی سوریای دیموکرات بوو".

 

جاویدان حەسەن نوێنەری خۆسەری دیموکراتی ڕۆژئاوای کوردستان لە هەرێمی کوردستان، ئەوەشی خستەڕوو، کە ئێستا ٪٢٥ی خاکی سوریا لە دەستی هێزەکانی سوریای دیموکراتە.

 

مەراسیمەکە بە پیشاندانی کورتە فلمێک لە ڕێگەی داتاشۆە لەسەر جەنگی مەزنی ئازادکردنی شاری ڕەقە کۆتایی پێهات.

 

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin