Smiley face
Smiley face
Smiley face

ململانێیەكانی ڕیفراندۆم بازاڕەكانی شاری كەركوكی پەکخستووە

2017-09-23 10:22:22



ڕۆژنیوز- سۆران محەمەد

 

بەهۆی هەبوونی مەترسی لەسەر هاوڵاتی شاری كەركوك، بازاڕەكانی شاری كەركوك، بە تەواوی لە جوڵە كەوتوون، هاوڵاتییەكەش ئاماژە بەوە دەكات، هاوڵاتیان باجی ئەنجامدانی ڕیفراندۆم دەدەن، نەك بەرپرسان.

 

ململانێ و مەترسیی و كاریگەرییەكانی  ئەنجامدانی ڕیفراندۆم، لە شاری كەركوك باڵی بەسەر هاوڵاتیان و بازاڕەكاندا كێشاوە، بەو هۆیەوە تەواوی بازاڕەكانی شارەكە لە جووڵە كەوتوون.

 

 

دوكاندارێك لە بازاڕی حەسیرەكە بە ناوی، ئامانج بەكر، لەو بارەیەوە بۆ ڕۆژنیوز، دەڵێت:"ترس و دڵەڕاوكێ وای لە هاوڵاتیانی كردووە ڕوو لە بازاڕ نەكەن و كەلوپەل نەكڕن، ململانێ سیاسییەكانی بەگشتی بازاڕیان پەكخستووە، وتەی سەرزاری هاوڵاتیان بەگشتی مەترسییەكانی سەر كەركوكە، لە ئەگەری ئەنجامدانی ڕیفراندۆم، بەگشتی خەڵكی زۆر زۆر دەترسن، هاوڵاتیان بەگشتی ئێستا پارە كۆدەكەنەوە بۆ ئەوەی لە ئەگەرێكی نەخوازراودا شارەكە بەجێ بهێڵێت، چونكە چارەنووسی ئەم شارە نادیارە".

 

 

وتیشی:"خەڵك زیاتر ئەو شتانە دەكڕن و ڕوو لە بازاڕ دەكەن كە زۆر پێویستایان بێت، هەروەها ئەوەی كە ئێستا زیاتر هاوڵاتیان دەیكڕن تەنها ئاردە، بۆ ئەوەی ئەگەر ڕووداوێك ڕووبدات ئەوا لە ماڵەوە هەڵیبگرێت وەك یەدەگ دایبنێت، بەڵام بەتەواوی بازاڕ كز بووە، بەگشتی دوكاندارەكان ڕۆژانە ناتوانن پارەی كرێی دوكانەكانیان دابین بكەن".

 

هاوڵاتییەكی تر، كە دوكانی فرۆشتنی پۆشاكی هەیە، بە ناوی میران محەمەد، لەسەر هەمان پرس دەڵێت:"ئێستا ئێمە لە سەرەتای هاتنی وەرزی زستانین و كۆتایی بە هاوین دێت، بەگشتی ساڵانی تر لەم كاتانەدا بازاڕەكان جمەی دەهات لە هاوڵاتیان، بەڵام ئەمساڵ خەڵكی زۆر ترسیان هەیە، بۆیە بازاڕەكان ڕۆژانە بەچۆڵیی دەبینرێن، خەڵكی بەگشتی پارە نادات بە جلوبەرگ، بەڵكو پارەكانیان كۆدەكەنەوە بۆ ئەو كاتەی كە مەترسی گەورە ڕوو لە شارەكە دەكات".

 

 

دەشڵێت:"ترسی گەورە لە ئەنجامدانی ڕیفراندۆمە لەم شارە، چونكە نازانرێت كاردانەوەی حكومەتی عێراق چی دەبێت بەرامبەر ئەم شارە، بە گشتی ئەگەر هەر ڕووداوێكی نەخوازراو ڕووبدات، ئەوا هاوڵاتیانی كەركوك بە تووندی باجەكەی دەدەن".

 

بڕوا محەمەد، دوكاندارێكی تری شارەكەیە، دەڵێت:"بە بەراورد بە دوو مانگ لەمەو پێش، وەزعی بازاڕەكان زۆر خراپترە، چونكە بەڕاستی هاوڵاتیان پارە سەرف ناكەن، ئەمەش بەڕاستی خەڵکی حەقیەتی، چونكە نازانرێت چارەنووسی ئەم شارە چی لێدێت، لە لایەك عێراق هەڕەشە لە مووچەخۆرانی شارەكە دەكات، ئەگەر دەنگ بە ڕیفراندۆم بدەن ئەوا موچە دەبڕین، ئەم شارە بە درێژای مێژوو بۆتە قوربانی نێوان سیاسەتەكانی هەرێم و بەغدا".

 

 

ئەو هاوڵاتییە ئاماژەی بەوەش كرد:"كاتێک بەرپرسان دەڵێن، ئامادەین بۆ هەموو باجێك، ئەوا بەرپرسان باجەكەی نادەن، بەڵكو هاوڵاتیان باجی ئەم ململانێیە دەدەن، ئەوەتا ئێمە ڕۆژانە ناتوانین بژێوی ماڵ و منداڵانمان دابین بكەین و وەکو پێویست داهاتمان نییە، بۆیە من داوا دەكەم کە پرسەكان بە لێكتێگەیشتن چارەسەر بكرێن، نەك بە چاوسووركردنەوە و عینادی".

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin