Smiley face
Smiley face
Smiley face

کەجەکە بۆ یەکێتی نەتەوەیی لەگەڵ کۆمەڵەی شۆڕشگێڕدا کۆبووەوە

2017-09-13 16:00:46



ڕۆژنیوز - بێریتان و ناسیار

 

کۆما جڤاکێن کوردستان- کەجەکە، بۆ یەکێتی نەتەوەیی لە سەردانی بۆلای حزبە سیاسییەکانی کوردستان بەردەوامە، لەو چوارچێوەیەدا سەردانی ناوەندی بەڕێوەبەرایەتی کۆمەڵەی شۆڕشگێڕی زەحمەتکێشانی کوردستانی ئێرانی کرد.

 

ئەمڕۆ شاندی کەجەکە بە سەرۆکایەتی سەرحەد ڤارتۆ لە زڕگێزی سەربە شاری سلێمانی سەردانی کۆمەڵەی شۆڕشگێڕی زەحمەتکێشانی کوردستانی ئێرانی کرد، سەردانەکە کاتژمێر ١٠:٠٠ی سەرلەبەیانی دەستیپێکرد و مناوەی دوو کاتژمێری خایەند.

 

پاش کۆبوونەوەکە، ئەبوبەکر مودەریسی، جێگری سکرتێری گشتی کۆمەڵەی شۆڕشگێڕی زەحمەتکێشانی کوردستان بۆ ڕۆژنیوز قسەیکردو سەردانی کەجەکەی بە ئەرێنی نرخاند و وتی: کۆبوونەوەیەکی باش بوو، هەر دوو لایەنەکە چەندین بابەتی زۆر گرنگمان خستە بەر باس، یەکێتی نەتەوەیی، پێکهێنانی دانوستان و یەکگرتوویی نێوان حزبەکان چەند لە بابەتە گرنگەکانی کۆبوونەوەکەبوون، وە کورد پێویستە بۆ چارەسەرکردنی پرسەکانی ڕۆژهەڵاتی ناوەڕاست پێشنگایەتی بکات.

 

 

مودەریسی وتیشی: لە بارەی زۆربەی بابەتەکانەوە بۆچوونمان یەک بوو لەگەڵ شاندی کەجەکە، بەڵام بیرکردنەوەی جیاوازیشمان هەبوو، گرنگ ئەوەبوو کە بیردکردنەوەکانمان خستە بەر باس.

 

مودەریسی لەبارەی ڕاوێژی نەتەوەیی حزبەکانی ڕۆژهەڵاتی کوردستانیشەوە وتی، کە تا ئێستا هیچ بانگهێشتانەمەیەکمان بۆ نەهاتووە، ئەگەر بانگ بکرێین کۆمیتەی ناوەندی بەڕێوەبەری کۆمەڵە لە سەر بەشداربوون یا نەبوون لە ڕاوێژەکەدا بڕیاردەدا.

 

هەروەها سەرحەد ڤارتۆ بەڕۆژنیوزی وت: سەردانەکەمان بە مەبەستی پێکهێنانی یەکێتی نەتەوەیی بوو، بە دەرفەتمان زانی و باسمان لە پێشکەوتنە سیاسییەکانی ڕۆژهەڵاتی ناوەڕاستیش کرد، هاوبیروڕا بووین لە بارەی ئەوەوە کە مەترسی هەیە لەسەر کوردو گەورەترین مەترسیش پارچەبوونی کوردە، ئێستا هێزە داگیرکەرەکان نەک تەنیا هیچ هەوڵێک بۆ چارەسەرکردنی پرسی کورد نادەن، بەڵکو هەموو هەوڵیان بۆ پارچەکردنی کورد خستووەتە گەڕ.

 

 

سەرحەد ڤارتۆ، وتیشی، کە پرۆژەکەمان بۆ یەکێتی نەتەوەیی پێشکەشی شاندی کۆمەڵە کردو بۆچوونەکانمان لەو بارەیەوە لەگەڵ باس کردن.

 

جێگای ئاماژەیە، کە شاندی کەجەکە پێشتر سەردانی حزبەکانی گۆڕان، حزبی دیموکراتی کوردستانی ئێران- حدکا، حزبی دیموکراتی کوردستان- حدک، کۆمەڵەی زەحمەتکێشانی کوردستان و کۆمەڵی ئیسلامی کردووە.

 

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin