Smiley face
Smiley face
Smiley face

ژیان لە لقی دارەکانی پارکی ژیان دەسەندرێتەوە

2017-09-13 14:33:20



ڕۆژنیوز ـ هاوڕێ  کرێکار 

 

بەشێک لە هاوڵاتیانى شارەدێی ڕزگاریی نیگەرانن لەوەی دارەکانی ناو پارکی ژیان بڕدراونەتەوە و ڕیژەی سەوزایی تێیدا نەماوە، سەرۆکی شارەوانی-ش دەڵێت: دارەکانمان بڕیەوە بۆ ئەوەی بەشێوەیەکى باشتر گەشە بکەنەوە.

 

پارکى ژیان، گەورەترین پارکە لە ناو شارەدێی ڕزگاری سەر بە شارۆچکەى کەلاری ناوەندى ئیدارەى گەرمیان و ماوەى زیاتر لە پێنج ساڵە دروستکراوە، بەهۆی ئەوە پارکەکە لەتەنیشت پەیکەری "فەرەنجی"-یەکەوەیە، کە هێمای ئەنفالە، سەرەتا پارکەکە ناونرا پارکی ئەنفال، دواتر سەرۆکایەتی شارەوانی ناوەکەی گۆڕی بە پارکی ژیان، ئێستاش هاوڵاتیان نیگەرانن لە خزمەتنەکردنی پارکەکە.

 

 

کامەران لەتیف، هاوڵاتییەکى دانیشتوى شارەدێی ڕێزگارییە و بە ڕۆژنیوزى وت: پارکى ژیان ڕووبەرێکى زۆری هەیە و خەڵکێکى بەرچاوڕووی تێدەکات، بەڵام ئەوەى جێگاى داخە وەک پێویست خزمەت ناکرێت، ڕێژەى سەوزایی زۆر کەمە و ئەوە شی هەبوو کەمتر بووەتەوە بەهۆی وشکبوون و بڕینەوەى بەشێک لە دارەکانى ناوی لە لایەن پاسەوانەکانى نێو پارکەکە و پاشان سوتاندنى لەجێگاکەى خویدا. 

 

کامەران لەتیف

 

کامەران لەتیف، وتیشی: پارکەکە بیرێکى ئیرتیوازیی تێدایە، ڕۆژانە تانکەرە ئاوی لێدەگوازرێتەوە بۆ ناو شارەدێی ڕزگاری، بەڵام دار و چیمەنى پارکەکەى پێ ئاو نادرێت.

 

نیگار عومەر، دانیشتوویەکی دیکەی شارەدێکەیە و بە ڕۆژنیوزی وت: نەک تەنیا شارەوانی، هاوڵاتیانیش پارکەکە بەماڵی خویان نازانن شوشە و گڵوپەکانی  دەشکێنن و  خزمە تی ناکەن، بۆیە پێویستە ئەو کەسانە سزا بدرێن، نەک کەس لێیان نەپرسێتەوە.

 

نیگار عومەر

 

سەبارەت بە کەموکورتییەکانی پارکەکە و بڕینەوەی دارەکانی، ئاراز محەمەد، سەرۆکى شارەوانى ڕزگاریی، بە ڕۆژنیوزی وت: ئامانجمان لە بڕینەوەى دارەکان ئەوەیە بەشێوەیەکى باشتر گەشە بکەنەوە و ئێمەش سیمایەکى جوانتر بەو دارانە و بە پارکەکە ببەخشین.

 

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin