Smiley face
Smiley face
Smiley face

دەربەندیخان، چەند ژنێک لە نانەواخانەی کوردەواریی-دا کاردەکەن

2017-09-13 09:11:13



ڕۆژنیوز - بەرهەم لەتیف

 

ئەگەر لە ڕابردوودا، کارکردنی ژنان لە دەرەوە حاڵەت بوایە، ئێستا ژنان بەڕێژەیەکی بەرچاو لە مەیدانی کاردا دەبینرێن، چەند ژنێکی شارۆچکەی دەربەندیخان-یش، لەڕێگەی دامەزراندنی نانەواخانەیەکەوە، توانیویانە ببنە خاوەن کار و ئابووری سەربەخۆی خۆیان.

 

نانەواخانەی کوردەواریی، ئەو نانەواخانەیە، کە بیرۆکەی دامەزاندنەکەی لەلایەن ژن و پیاوێکی دانیشتووی شارۆچکەی دەربەندیخانی سەر بە پارێزگای سلێمانی دروست دەبێت، دواجار بیرۆکەکایان سەردەگرێت و لەوڕێگەیەوە، هەلی کار بۆ چەند ژنێکی دیکەش دەڕەخسێنن.

 


مەحمود کەریم، خاوەنی نانەواکە بە ڕۆژنیوزی وت:"بیرۆکەی دانانی ئەم نانەوایە، دەگەڕێتەوە بۆ سەرەتای قەیرانی دارایی، من و هاوسەرەکەم پێمان خۆشبوو ئەم کارە بهێنینە نێو بازاڕ، چونکە پێشتر هەر لە ماڵاندا بوو".

 

مەحمود کەریم

 

مەحمود، ئەوەشی خستەڕوو:"نزیکەی ١٢ ژن لەم نانەوایەدا کار دەکات، ڕۆژانەش دوو تا سێ هەزار نان دروست دەکەن".

 

یەریڤان زاهیر، یەکێکە لەو ژنانەی کە لەو نانەواخانەیەدا کار دەکات و ئاماژەی بە جۆری ئەو نانانە کرد، کە لە نانەواخانەکەدا دروستی دەکەن و بە ڕۆژنیوزی وت:"نانی هەورامی، نانی تیری، نانی جۆ، ناوساجی، کەلانە".

 

یەریڤان زاهیر


لەبارەی پێشوازیی خەڵکیش لە کارەکەیان، یەریڤان وتی:"خەڵک زیاتر حەزی لەم نانە کوردییەیە، چونکە خومرە و سۆدەی تێ ناکرێت و زیانی تەندروستی نییە، خەڵکێکی زۆریش ڕوومان لێ دەکات، زۆرکات نانمان نامێنێتەوە".

 

 

بەهار محەمەد، ژنێکی دیکەیە کە لەو نانەوایەدا کار دەکات، بۆ ڕۆژنیوز قسەیکرد و وتی:"من زیاتر لە ساڵێکە لەم نانەوایەدا کار دەکەم، ئێمە ڕۆژانە لە کاتژمیر ٤ی بەرەبەیان هەتاوەکو کاتژمێر ٢ی پاش نیوەڕۆ لێرە کار دەکەین".

 

بەهار محەمەد

 

لەبارەی حەقدەستەکانیشیانەوە، ناوبراو، وتی:"بەپێی کارەکانمان هەفتانە مووچەمان پێ دەدرێت، ئەم کارەش زەحمەتیی خۆی هەیە، بەڵام ئێمە بۆ بژێویی خۆمان کاردەکەین، لەڕووی ماددیەوە سودێکی زۆری لێ وەردەگرین".

 

 


ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin