Smiley face
Smiley face
Smiley face

سەرحەد ڤارتۆ: ئەوەی ڕێگری لە یەکێتی نەتەوەیی بکات سەرکەوتوونابێت

2017-09-10 09:33:07



ڕۆژنیوز – شۆڕش و ڕێبەر

 

ئەندامێکی پەیوەندییەکانی دەرەوەی کەجەکە ڕایدەگەیەنێت، کە یەکێتی نەتەوەیی پرسی سەرەکی گەلی کوردەو دەشڵێت، نەتەوەبوونی کورد جیاوازەو هەموو نەتەوەو ئاین و کلتورەکانی ناوکوردستان لەخۆدەگرێت، دەشڵێت: ئەوانەی ڕێگری بکەن لە پێشکەوتنی یەکێتی نەتەوەیی سەرکەتوونابن.

 

سەرحەد ڤارتۆ، ئەندامی پەیوەندییەکانی دەرەوەی کۆما جاڤاکێن کوردستان- کەجەکە، لەم چاوپێکەوتنە تایبەتدا دەربارەی یەکێتی نەتەوەیی و خۆبەڕێوەبەریی شەنگال دەدوێت و باسیش لە پەیوەندییەکانی نێوان ئێران و تورکیا دەکات، هەروەها وەڵامی چەند پرسیارێکی دیکەی ڕۆژنیوز دەداتەوە.

 

حزبە سیاسییەکانن، کە بوونەتە ئاستەنگ لە بەردەم پێکهێنانی یەکێتی نەتەوەییدا؟

 

"هەموو نەتەوەو ئاینەکان لە تورکیا بەرامبەر کورد یەک هەڵوێستیان هەیە"

 

سەرحەد ڤارتۆ: نابێت حزبەکان وەک ئاستەنگ لە بەردەم یەکێتی نەتەوەییدا ببینرێن، لەلایەکی دیکەوە لەبەرچاوگرتنی یەکێتی نەتەوەیی وەک یەکێتی حزبەکان هەڵەیە، ئەوەی لە کوردستان وەک یەکێتی نەتەوەیی باسی لێدەکرێت پرسێکی زۆر قووڵترە، بە بۆچوونی من یەکێتی نەتەوەیی لە کوردستان پەیوەندیی بە نەتەوەبوونی کوردەوە هەیە، پێویستە باش لەم بارەیەوە لێکۆڵینەوە بکرێت، کە تێگەیشتنی نەتەوەیی لە ناو گەلی کورددا تا چ ئاستێک پێک هاتووە، بۆ ئەوەی باشتر تێبگەین چەند نموونەیەکی بەرچاو دێنمەوە، ماوەی سەد ساڵە کە نەتەوە دەوڵەتی تورکیا دامەزراوە، لە سەردەمی عوسمانییەکانیشدا تورکەکان هەر دەسەڵاتداربوون، لە تورکیادا چەپەکان، ڕاستەکان، نەتەوە پەرەستەکان، کۆمۆنیستەکان و سۆسیالیستەکان لە هەندێک بواردا وەک یەکدی بیردەکەنەوە، بۆچی وەک یەکدی بیردەکەنەوە؟ چوونکە زهنییەتێکی هاوبەش لە نێوانیاندا پێکهاتووە.

 

وتیشی:"لەبارەی پرسی کورددا، ئایین پەرەستەکان وەک نەتەوە پەرەستەکان بیردەکەنەوە و جەهەپەییەکانیش هەر وا بیر دەکەنەوە، هەر چەند حزبی دیکەش لە تورکیا هەبێت لەم بارەویەوە هەر ئەو بۆچوونەیان دەبێت، ئەوان پێیان وایە نابێت هەبوونی کورد و مافەکانیان بەڕەوا بزانرێن، لە سەر بنەمایەکی نەتەوەییەوە لەم بارەیەوە لە دەوری یەکدی کۆدەبنەوە، ئەوروپا دژی ئەردۆغان هەڵوێستی پیشاندا، هەموو حزبەکانی تورکیا پشتگیریی ئەردۆغانیان کرد، چونکە نەتەوەکەیان لە سەر ئەو بیرۆکەیە دامەزراوە، کامە لایەن دەسەڵاتی بە دەستەوە بێت ئەو سیاسەتەکان دیاری دەکات، واتە ئەوان هێڵی سووری تایبەت بە خۆیان هەیە".

 

 

ئایا کورد سەرچاوەکانی لە خۆیەوە دەگرێت، یان لەو پارچەبوونەی بەسەریدا سەپاوە؟

 

" نەتەوەبوون شتێکی ئەزەلی و ئەبەدی نییە"

 

سەرحەد ڤارتۆ: گەلی کورد لە مێژوودا نەیانتوانیوە کە هەڵوێستێکی هاوبەشی نەتەوەییان هەبێت، بۆ نموونە کوردێکی خەڵکی کرماشان و کوردێکی دەرسیمی و کوردێکی عەفرینی و کوردێکی کەرکوکی وەک یەک بیر ناکەنەوە، زهنییەتێکی هاوبەش لە نێوانیاندا هەبوونی نییە، نەتەوەبوون شتێکی ئەزەلی و ئەبەدی نییە، بەڵکو ئاستێکە لە بەکۆمەڵگابوون، بەڵام گەلی کورد لە مێژوودا نەیانتوانیوە ئەو ئاستە کۆمەڵگاییە بۆخۆیان دامەزرێنن.

 

وتیشی:"لە سەدەکانی ١٨ و ١٩ و ٢٠دا لە ئەوروپا و زۆر شوێنی دیکەی جیهاندا دەوڵەت نەتەوەکان دامەزران، بەڵام کورد نەتەوەی خۆی دانەمەزراند، کورد ئەو هۆشیاری و زیرەکییەیان نەبوو کە ئەم کارە بکەن، هەروەها هیچ پێشەنگێکیشیان نەبوو کە بتوانێت ئەو بیرۆکەیە لە نێوانیاندا پێش بخات، بۆیەشە کە کورد هەر بەو شێوەیە پارچە پارچە ماوەتەوە، هەڵبەت ئێستا وەک چەند سەد ساڵی ڕابردوو نەماوە، هەم هەستی نەتەوەبوون و هەم ئاستی هۆشیاربوونی گەلی کورد پەرەیان سەندووە، بەڵام کێشەی زۆر جدیش لە ئارادان، بۆیە دەبێت پرسی یەکێتی نەتەوەیی وەک پرسی هەموو نەتەوەی کورد ببینرێت و نەک تەنیا وەک پرسی حزبەکان، پێویستە توێژینەوەکانمان لەم چوارچێوەیەدا و لە سەر بنەمای نەتەوەبووندا پێکبێن، بە ئانجامی هاوبەش بگەین، کاتێک ئەم زەروورەتە هەبێت حزبە سیاسییەکان ناچاردەبن لە دەوری یەکدی کۆببنەوە.

 

کۆمەڵگای کوردی لە بواری هەستی نەتەوەییەوە بەهێزترە لە حزبەکان، ئێوە ئەم بابەتە چۆن دەنرخێنن؟

 

"ئەوانەی ڕێگری بکەن لە پێشکەوتنی یەکێتی نەتەوەیی سەرناکەون"

 

سەرحەد ڤارتۆ: هەستی نەتەوەیی لە ناو کۆمەڵگادا تا ئاستێکی زۆر باش پێش کەوتووە، ئەوەش بەهۆی تێکۆشانی کوردەوەیە، یەکێتی نەتەوەیی تەنیا بە خەبات و تێکۆشانی نەتەوەیی پێک نایەت، بەڵکو هەموو ئەو تێکۆشانانەی لە کوردستاندا ئەنجام دەدرێن، دەبنە هۆی پێکهاتنی گۆڕانکاری لە ئاستی کۆمەڵگادا، بێگومان ئاستەنگیش لە بەردەم پێشکەوتنی هەستی نەتەوەییدا لە ئارادایە، حزب گەرایی، عەشیرەپەرستی، مەزهەب پەرەستی، ناوچەگەرایی بەربەستی پێکهاتنی یەکێتی نەتەوەیین، بۆیە دەبێت پرۆژەی نەتەوە پێش بکەوێت و کەس نەتوانێت ڕێگری لەبەرفراوانبوونەوەی بکات، ئەوانەی بەهۆی بەرژەوەندییە عەشیرەیی و حزبییەکانیان دەیانەوێت ڕێگری بکەن لە پێشکەوتنی یەکێتی نەتەوەیی سەرناکەون.

 

شیکردنەوەتان بۆ یەکێتی نەتەوەیی کوردان و شێوازەکەی چییە؟

 

"نەتەوەبوونی کورد جیاوازە"

 

سەرحەد ڤارتۆ: کوردستان لە ژمارەیەکی زۆر لە پێکهاتەکان پێکهاتووە، ئەوە سروشتییە، کاتێک دەڵێین کورد، مەبەستمان کرمانج و سۆران و زازا و کەڵهوڕ و لۆر و هەورامی و هتد..، لەلایەکی دیکەوە باوەڕ و مەزهەبی جیاواز لە کوردستاندا هەن، بۆ نموونە شیعە، سوننە، ئێزدی، عەلەوی، کاکەیی و یارسان و ژمارەیەکی دیکە لە پێکهاتەکان، ئەوەش بە واتای دەوڵەمەندیی کوردە، لەلایەکەوە داگیرکەر کوردستانی کردووەتە چوار پارچە، بەو هۆیەشەوە دەیان حزبی سیاسیی جیاواز هەن، نەتەوەبوونی کورد وەک نەتەوەبوونی فارس، تورک و عەرەب و وڵاتانی ئەوروپا نییە، مێژوو سەلماندوویەتی کە دامەزرانی نەتەوە دەوڵەت لە ئەوروپا لەناوچوونی ژمارەیەکی زۆر نەتەوە و گەلی دیکەی لێکەوتووەتەوە، ئەوان هەموو دەوڵەمەندییەکانی کۆمەڵگایان لە پێناو دامەزراندنی نەتەوە دەوڵدەتدا لە ناو برد، نەتەوە دەوڵەتی فەرەنسا، ئەڵمانیا، ئینگەلترا هەموو بەم شێوەیە دامەزران، نەتەوە دەوڵەتی عەرەب و فارس و تورکیش هەوڵیاندا هەر بەو شێوەیە نەتەوەکانی کورد و بەلوچ و چەرکەز لەناوببەن، ئەوە بە واتای لەناوبردنی نەتەوەکانە، نەتەوەی کورد بەو شێوەیە نییە، کورد هەموو دەوڵەمەندییەکانی دەخاتە گەڕ بۆ پێکهێنانی نەتەوە.

 

لە ناو ئەو هەموو شیوە زمان و فەرهەنگ و کلتوورەدا، ئەگەری پێکهاتنی زهنییەتێکی هاوبەش هەیە؟

 

"پێویستە بگەینە شوناسی نەتەوەیی و مرۆڤایەتیمان"

 

سەرحەد ڤارتۆ: بێگومان  ئەگەری هەیە، ئەگەر کەسێک تەنیا هەست بە ئێشی کەسێک لە عەشیرەکەی بکات ئەو هەر عەشیرەگەراییەکەیە، بەڵام کاتێک کوردێک هەست بە ئێشی کوردێکی دیکە دەکات، ئەوە واتە ئێمە کوردین، لە ئاستێکی بەرزتردا دەگەینە مرۆڤایەتی، پێویستە هەوڵبدەین و ئاستی عەشیرەگەرایی تێپەڕبکەین و شوناسی نەتەوەییمان دیاری بکەین و دواتریش بگەینە شوناسی مرۆڤایەتیمان، ئەوانە یەکدی ڕەت ناکەنەوە، چونکە ئەو مۆدێلەی ئێمە پێشنیاری دەکەین نەتەوەبوونی کورد بە بنەما دەگرێت، هەورامان بە هەوارامێتی خۆی و ئێزدی بە ئێزدایەتیی خۆیەوە و هەر گروپێک بە کلتور و باوەڕی خۆیەوە بناسرێت، ئەو کاتە دەتوانین بڵێین ئێزدییەکی کورد، یان موسڵمانێکی کورد، پێویستە ئەو زهنییەتە پێش بکەوێت، لە مێژوودا هەمیشە کاتێک هێرش کراوەتە سەر ئێزدییەکان بەشەکانی دیکەی کوردستان گرنگیان نەداوەتێ و یەکێتیش پێکنەهاتووە، بەڵام هیچ کامەیان لە سەر شوناسی کورد نەناسراون، پێیان دەوترێت سەرهەڵدانی بەدرخان یان بۆ نموونە شێخ مەحمود، کاتێک نەتەوە دانەمەزرابێت ئەمە ڕوودەدات، پێویستە ئێمە ئەم قۆناغانە تێپەڕێنین.

 

 

وتیشی:"ساڵی ٢٠١٤ خەڵکی ئێزدی کۆمەڵکوژکران، ئەو کەسانەی دەبوو بەرگری لە ئێزدییەکان بکەن وتیان ئێمە خۆمان لەبەر ئێزدییەکان بە کوشتن نادەین، ئەو عەقڵییەتەی ئەوان ئێزدییەکانی وەک کورد لەبەرچاو نەدەگرت، ئێستا بەشێک لە کۆمەڵگای کوردی خۆیان بە کورد نازانن، یان ئەوەی بەشێک لەلایەن گەلی کوردەوە بە کورد ناناسرێن، بەم شێوەیە یەکێتی نەتەوەیی پێک نایەت".

 

لە نەخشەڕێگای ئێوەدا دبلۆماسییەکی هاوبەش و بەرگرییەکی هاوبەش هەیە، دبلۆماسی هاوبەش چ قازانجێکی بۆ کورد دەبێت؟

 

"کاتێک دبلۆماسی هاوبەش هەبێت ئیتر بە ناوی هەموو کوردەوە سیاسەت دەکرێت"

 

سەرحەد ڤارتۆ: پێکهاتنی یەکێتی نەتەوەیی پرۆژەیەکی درێژە، پێویستە بەردەوام کارو خەبات و تێکۆشانی بۆ ئەنجام بدرێت، لەو نێوانەدا پێویستە پراتێکێکی ڕۆژانەش لە ئارادابێت، بۆ ئەوەش لە هەموو شتێک پێویستتر هەبوونی دبلۆماسییەکی هاوبەشە، خاڵێکی گرنگی دیکەش بەرگرییەکی هاوبەشە، ئەوانە بۆ ئێستای ڕۆژهەڵاتی ناوەڕاست زۆر پێویستن، کاتێک دبلۆماسی هاوبەش هەبێت ئیتر بە ناوی هەموو کوردەوە سیاسەت دەکرێت، بۆ ئەوەش پێویستە بەرژەوەندی نەتەوەیی بکەوێتە پێش بەرژەوەندیی حزبییەوە، ئێستا هەر حزبەو بەپێی دبلۆماسیی خۆی سیاسەت دەکات.

 

وتیشی:"کاتێک حزبە کوردییەکان لەگەڵ هێزە جیاوازەکان سیاسەت دەکەن، دەبێتە هۆی بەهێزتربوونەوەی دژایەتیی کورد و زیان دەگەیەنێت، بەم شێوەیە حزبەکان لە سیاسەتکردنیان سوودیان پێدەگات، بەڵام لە پێناو زیان گەیاندن بە نەتەوەی کورددا، بۆیە بە پێکهێنانی دبلۆماسی هاوبەش پەیوەندییەکان بەگوێرەی بەرژەوەندییە نەتەوەییەکان پێش دەکەون، لەلایەکی دیکەوە پێکهێنانی دبلۆماسییەکی هاوبەش کورد لە ڕۆژهەڵاتی ناوەڕاستدا دەکاتە هێزێکی زۆر گەورە، ئەو کاتە هەموو دەوڵەتەکانی ناوچەکەش بەپێی ئەو هێزە هەوڵدەدەن لەگەڵ کورد پەیوەندی دروست بکەن، ئێستا وڵاتە داگیرکەرەکان و وڵاتە جیهانییەکان کورد وەک ئامێڕێک لەبەرچاودەگرن، هەموویان دەیانەوێت هێزی کورد لە پێناو بەرژەوەندییەکانی خۆیاندا بەکاربێنن، ئەوان بەم شێوەیە هەڵسوکەوت دەکەن چونکە کورد پارچە بووە، کاتێکیش نەتەوەیەک پارچە بووبێت هەر لایەنێک بەگوێڕەی بۆچوونی خۆی سیاسەت دەکات، پێویستە کورد سیاسەتی ئەمریکا و ئەوروپا لەبارەی گەلی کورددا دیاری بکات، ئەگەر ئەمریکا لەبارەی کوردەوە سیاسەتێکی نییە، هۆکارەکەی خۆی کوردەکانن، ئەگەر گەلی کورد یەک بگرن و یەکێتی نەتەوەیی پێکبێنن ئەمریکا، ئەوروپا، ڕوسیا و دەوڵەتە داگیرکەرەکان بەپێی ئەو یەکێتییە سیاسەتەکانیان لەبارەی کورددا دادەڕێژنەوە".

 

لێرەدا ڕۆڵی یەکێتی نەتەوەیی چییە؟

 

"ئەگەر پەکەکە، یەپەگە، پژاک، کۆمەڵە، حدکا، یەکێتی و پارتی کورد نین ئەی کێ کوردە؟"

 

سەرحەد ڤارتۆ: ئێستا دۆخ و هەلومەرجی کورد لە ڕۆژهەڵاتی ناوەڕاستدا دەرفەتی لە ڕادەبەدەر دەداتە داگیرکەران، بە پێکهێنانی یەکێتی نەتەوەیی چیدی داگیرکەر ناتوانێت دوژمنایەتی کورد بکات، حکومەتی ئاکەپە ئێستا دژایەتی دەکات، بەڵام ناڵێت دوژمنایەتیی هەیە لەگەڵ گەلی کورد، بەڵکو دەڵێن کە کورد برای ئێمەیە، ئەوان دەڵێن ئێمە دوژمنی پەکەکە و یەپەگە و پەیەدەین، ئێڕان دەڵێت کە دۆستایەتی ئێمە و گەلی کورد زۆرە، بەڵام دوژمنایەتیمان هەیە لەگەڵ پژاک و حزبەکانی دیکەی ڕۆژهەڵاتی کوردستان، بە هەمان شێوەی حکومەتی بەعسی پێشوو لە بەغدا، باشە ئەگەر پەکەکە، یەپەگە، پژاک، کۆمەڵە، حدکا، یەکێتی و پارتی کورد نین ئەی کێ کوردە؟، ئەگەر ئاوا بیر بکەنەوە کور هەبوونی نابێت، پارچەبوونی کورد وادەکات کە هێزە داگیرکەرەکان سیاسەت بکەن لە سەر کورد و کورد بە شێوەیەک پیشانی کۆمەڵگای نێودەوڵەتی بدەن کە دەیانەوەێت، ئەگەر گەلی کورد یەک بگرن، لە بەرامبەردا ئەگەر کورد یەک بگرن ئەو کات ئەوانیش بەگوێرەی ئەو یەکێتییە دانوستان دەکەن لەگەڵ گەلی کورد.

 

لەم دواییانەدا ئەنجومەنی خۆبەڕێوەبەریی شەنگال پرۆژەی خۆبەڕێوەبەری دیموکراتی ڕاگەیاند، بۆچوونتان لەوبارەیەوە؟

 

"ئەو پرۆژەیەی لە شەنگال ڕاگەیەندرا، چارەسەرییەکە بۆ هەموو عێراق هەرێمی کوردستانیش"

 

سەرحەد ڤارتۆ: چارەسەرکردنی پرسی شەنگال بە شێوەیەکی دیموکراتی دەتوانێت بنەماکانی عێراقێکی دیموکراتی و کوردستانێکی فیدرال دامەزرێنێت، پێویستە هەمووان بەباشی لە بایەخی پێکهاتنی شەنگالی خۆبەڕێوەبەری دیموکراتی تێبگەن، سەرۆکایەتی لەم بارەیەوە زۆری نووسیوە، پرسەکانی ڕۆژهەڵاتی ناوەڕاستی پەیوەندیدارن بەیەکترەوە، پرسی کورد لە هەر چوار پارچەی کوردستان پێکەوە پەیوەندیان هەیە، چارەنووسی نەتەوەی کورد جیا نابێتەوە لە چارەنووسی نەتەوەکانی دیکەی ڕۆژهەڵاتی ناوەڕاست، چارەنووسی هەموو گەلانی ڕۆژهەڵاتی ناوەڕاست پێکەوە پەیوەندیان هەیە، چارەسەریی ئەو پرسانەش شەڕ و ئاڵۆزی و نەتەوە دەوڵەت نییە، ڕاستترین چارەسەری بۆ پرسەکانی ڕۆژهەڵاتی ناوەڕاست خۆبەڕێوەبەری و کۆنفیدرالیزمی دیموکراتییە، لەو سیستەمەدا هەمووان ئازادن، هەر کەسێک بە شوناسێ خۆیەوە پەیوەندی دەبێت لەگەڵ ئەوانی دیکە، ئەو مۆدێلەی بۆ شەنگال پێشنیارکرا یەکێکە لەو چارەسەریانە، شەنگال کۆمەڵگایەکی تایبەتە، بەشێکن لە گەلی کورد کە تایبەتمەندیی جیاوازی خۆیان-یان هەیە، شەنگال هەم لە بواری مێژووییەوە و هەم لە بواری جوگرافییەوە تایبەتە، شەنگال بۆ ئەو گەلانەی لە ناویدا دەژین تایبەتە، گەلانی شەنگال دەتوانن بەگوێرەی ئەو تایبەتمەندیانە خۆیان بەڕێوەببەن و ڕێکبخەن.

 

وتیشی:"ئێستا شەنگال هەم پارچەیەکە لە عێراق هەم پارچەیەکی کوردستان، ئەوە لەبارەی ئاشورییەکان، سوریانییەکان، شەبەکەکان، کاکەییەکان و تورکمانەکانیشەوە دەوترێت، هەمووی ئەو گەلانە دەتوانن لە چوارچێوەی سیستمێکی فیدرالی دیموکراتیدا خۆیان بەڕێوەببەن و ڕێکبخەن، ئەوەش تەنیا سیاسی نییە، هاوکات بابەتێکی کلتوریشە، ئەگەر ئێزدییەکان خۆیان بەڕێوەنەبەن و بەرگری لە خۆیان نەکەن، چەند ساڵی دیکە دەتوانن بمێننەوە؟ سیستمی ئەمڕۆی جیهان وەک دێو هەمووان لەناو خۆیدا دەتوێنێتەوە، کاپیتالیزم هەموو کلتورەکان و کۆمەڵگاکان لەناودەبات، لەم نێوانەدا ئەگەر کلتورێک بەرگری لە خۆی نەکات لە ناودەچێت، ئەو بەرگرییەش تەنیا بە خۆبەڕێوەبەری ئەگەری دەبێت، ئەگەر ئەو ٤٠ ملیۆن کوردەی ئێستا هەن بەرگری لە کلتور و هەبوونیان نەکەن لە ٣٠ ساڵی داهاتوودا هەبوونی کورد دەکەوێتە مەترسییەوە، ئەگەر کورد دەرفەتەکانی بۆ خۆبەڕێوەبەری و پێشخستنی ئابوری و بەرگری لە خۆی بەکار نەیەنێت ناتوانێ بۆ ماوەیەکی درێژ بمێنێتەوە، ئەو پرۆژەیەی لە شەنگال ئامادە کراوە و ڕاگەیەندراوە، چارەسەرییەکە بۆ هەموو عێراق هەرێمی کوردستانیش".

 

سەردانەکانی کەجەکە بۆ لایەنە کوردییەکان بەکوێ گەیشتووەو ئامانجتان چییە؟

 

"تورکیا پیلانگێڕییەکی زۆر گەورەی بە دەستەوەیە لە باشوری کوردستان"

 

سەرحەد ڤارتۆ: باشوری کوردستان بۆ شۆڕشی کورد شوێنێکی زۆر گرنگە، گەلی کورد لە ١٠٠ ساڵی ڕابردوودا دەستکەوتی زۆر گەورەی بە دەست هێناوە، بەڵام ئێستا دوژمن دەیەوێت  بۆ لەناوبردنی گەلی کورد باشوری کوردستان بەکاربێنێت، بەتایبەتی تورکیا پیلانگێڕییەکی زۆر گەورەی بە دەستەوەیە لە باشوری کوردستان، هاوکات وڵاتپارێزان لە باشوری کوردستان دەیانەوێت باشوری کوردستان بکەنە شوێنی بەهێزتربوونەوەی شۆڕشگێڕەکان، زۆر ڕێکخراو لە باشوری کوردستان هەن کە بەم شێوەیە بیر دەکەنەوە، بۆیەشە ئێمە دەمانەوێت باشوری کوردستان وەک دەرفەتێک بۆ پێکهاتنی یەکێتی نەتەوەیی لە بەرچاو بگرین و هەموو پیلانەکانی دوژمن لەوێ پوچەڵبکەینەوە، بۆیە باشوری کوردستان زۆر گرنگە، هاوکات ئێمە خەباتەکەمان تایبەت ناکەینەوە بە باشوری کوردستان، ئێمە بە شێوەی جیاواز لەگەڵ هەموو لایەنەکانی چوارپارچەی کوردستان پەیوەندیمان هەیە.

 

ئایا تەنیا سەردانی حزبەکان دەکەن؟

 

"ئێمە وەک کەجەکە لەگەڵ بەشە جیاوازەکانی کۆمەڵگا دادەنیشین و گوێیان لێ دەگرین"

 

سەرحەد ڤارتۆ: کێشەی کورد تەنیا کێشەی حزبەکان نییە، بەڵکو کێشە و پرسی هەموو کۆمەڵگایە، بۆیە پێویستە هەموو بەشەکانی کۆمەڵگا و هەروەها حزبەکان لەگەڵ یەکدی لە پەیوەندییەکی بەهێزدا بن و دانوستانی بەردەوامیان هەبێت، ئێمە وەک کەجەکە لەگەڵ بەشە جیاوازەکانی کۆمەڵگا دادەنیشین، گوێبیستی پێشنیار و بۆچوونەکانیان دەبین و سود وەردەگرین لە بۆچوونەکانیان.

 

لە پەیوەندی و نزیکبوونەوەکانی تورکیا و ئێران چۆن دەڕوانن؟

 

"ئێڕان و تورکیا بە دووقۆڵی دوژمنایەتی کورد دەکەن"

 

سەرحەد ڤارتۆ: زۆر گرنگە کە پەیوەندییەکانی نێوان ئێران و تورکیا بخرێنە ژێر چاودێرییەوە، زۆر جار پەیوەندی نێوان ئەو دوو وڵاتە زیانی بە تێکۆشانی گەلی کورد گەیاندووە، لەم دواییانەدا هاوکاری و دانوستانەکان لە نێوانیاندا زیادی کردووە، لە ئێستادا دەوڵەتی تورک بە ڕاشکاوی دوژمنایەتی گەلی کورد دەکات، ئێرانیش پشتگیریی دەکات، تورکیا دەیەوێت ئێڕان بەردەوام بێت لەم پشتگیریانەیدا، لە بەرامبەردا ئێرانیش دەیەوێت کە تورکیا هاوکاریی بکات لە شەڕی دژی سعودییەدا، هاوکات دەیەوێت بە هاوکاری تورکیا ڕێگا نەدات کورد دەستکەوتەکانی بپارێزێت یان بەرفراوانیان بکاتەوە، ئێران داوا لە تورکیا دەکات بەردەوام بێت لە دوژمنایەتی کورد، چونکە ئەم سیاسەتە ڕووبەڕووی سیاسەتەکانی ئەمریکا دەبێتەوە، بە کورتی ئێڕان و تورکیا بە دووقۆڵی دوژمنایەتی کورد دەکەن".

 

وتیشی:"ئێران هاوکاری تورکیا دەکات و ئۆپەراسیۆنی هاوبەشیش دژی کورد لەگەڵی بەڕێوەدەبات، بەڵام ئەوەی تا چ ئاستێک لەم هاوکاریانەیدا هەنگاو دەنێت دیار نییە، چونکە هەر هەنگاوێک پراتیک لەم بوارەدا خەسار و باجی خۆشی بە دواوەیە، دوژمنایەتی کوردکردن لە ڕۆژهەڵاتی ناوەڕاستدا کارێکی ئاسان نییە، تورکیا دوژمنایەتی کوردی کرد و دۆخەکەی وای لێهاتووە کە ئێستا دەبینرێت، ئەگەر ئێرانیش لەم سیاسەتانەی تورکیادا هاوکاریی بکات، باجەکەی دەدات، ئێران لەگەڵ دەوڵەتانی عەرەبی و ئەوروپا و ئەمریکا کێشەی زۆر جدیی هەیە، ئەگەر شەڕێک لە نێوانیاندا ڕووبدات هەموو ئەو هێزانە دژی ئێڕان دەوەستنەوە، ئێران بەباشی ئەمانە دەزانێت، لە بواری سیاسەتکردندا ئێران زۆر شارەزاتر و پسپۆرترە لە تورکیا، بێگومان هەموو لایەنەکانی کێشەکان دەنرخێنێت و ئینجا هەنگاوی پراتیک دەنێت.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin