Smiley face
Smiley face
Smiley face

شەروین زیلان: لەم بارودۆخەدا شەرمێكی گەورەیە كورد یەك نەگرێت

2017-09-06 09:38:40



ڕۆژنیوز - محەمەد و شەماڵ

 

ئەندامێكی كۆنسەی بەڕێوبەریی كۆدار، ئاماژە بەوە دەكات، كە شۆڕشی كۆنفیدڕاڵی دیموكراتی، شۆڕشی ژنە، پێویستە ژنان بەشداری تێدا بكەن، دەشڵێت لە ناوچەكەدا شەڕێكی گەورە بەڕێوە دەچێت، بۆیە شەرمێكی گەورەیە كورد لەم بارودۆخەدا یەك نەگرن.

 

شەروین زیلان، ئەندامی كۆنسەی بەرێوەبەریی كۆمەڵگای دیموكرات و ئازادی ڕۆژهەڵاتی كوردستان- كۆدار، لەم چاوپێكەوتنەی ڕۆژنیوزدا وەڵامی چەند پرسارێكی گرنگ دەداتەوە سەبارەت بە بارودۆخی ژنان لە ڕۆژهەڵاتی كوردستان و یەكنەگرتنی ژنانی ناو پارتە سیاسییەكان و رێكخراوەكان و بارودۆخی ئێران و ناوچەكە.

 

دەقی چاوپێکەوتنەکە:

 

- بارودۆخی ژنان چۆنە لە ڕۆژهەڵاتی كوردستان؟

 

"دەوڵەت فشارێكی جەستەیی و فیكریی لە ‌سەر ژن بەڕێوە دەبات"

 

شەروین زیلان: بە گشتی بارودۆخی ژنان لە ‌ڕۆژهەڵاتی كوردستان باش نییە، بێكاریی لە ‌ئاستێكی زۆر بەرزدایە، بە ‌تایبەت لە ‌ناو ژناندا، بەهۆی بێكارییەوە ڕۆژ بە ‌ڕۆژ ژنان ڕووبەڕووی كێشەی زیاتر دەبنەوە، خۆكوژیی زیاتر بووە لە ‌ناو ژناندا، دەوڵەت فشارێكی جەستەیی و فیكریی لە ‌سەر ژن بەڕێوە دەبات، ئەم ڕێوشوێنانەی دەوڵەتیش نۆكەرایەتیی و نایەكسانیی بەدوای خۆیدا دەهێنێت، دەوڵەت لە ‌پشت ئەم كارانەوەیە، لە ‌بەرئەوەی دەوڵەتی ئێران لە ‌سەر بنەمای چەوساندنەوە و نەتەوەپەرەستیی دامەزراوە.

 

- بەردەوام ئێوە وەك كۆدار ئاماژە بە ‌زەخت و فشاردەكەن لە ‌سەر ژنان، لە ‌بەرامبەر ئەمەدا چیتان لە ‌بواری كرداریی كردووە؟

 

"كۆدار چارەنووسی كۆمەڵگایە، كۆمەڵگا بێ چارە نییە"

 

شەروین زیلان: كۆدار ناسنامە و پاڵپشتی ئەوانەیە كە ستەمیان لێ دەكرێت، كۆدار سیستمی هەموو ئەو كەسانەیە کە تێدەكۆشن بۆ ئازادیی و یەكسانیی، كۆدار ئەڵتەرناتیڤی ئەو كەس و لایەنانەیە كە سیستم و یاساكانی دەوڵەت قبووڵ ناكەن، كۆدار چارەنووسی كۆمەڵگایە، كۆمەڵگا بێ چارە نییە.

 

 

- ئێوە باس لە ئیرادەیەك دەكەن لە دەرەوەی سیستم، تاچەند ئەو ئیرادەیە بۆتە كارتی فشار لە ‌بەرامبەر ئێران؟

 

"ئێمە ئێستا لە ‌قۆناغی شۆڕش و بەرەنگاریی داین"

 

شەروین زیلان: بەردەوام خەبات و سیستمی كۆدار بەرەو پێشەوە دەچێت، لە ‌بواری هۆشیاركردنەوە و پەروەردەكردن و ڕێكخستن لەهەموو بوارەكاندا خۆی ڕێكخستووە، سات بەسات خەباتی كۆدار بەرفراوانتر دەبێت، ترسی دەوڵەتیش لەوەیە، ئەم فشار و چەوساندنەوەی كە دەوڵەت ‌دەیكات، دەرەنجامی بێ چارەیی دەوڵەتە لە ‌بەرامبەر سیستمی كۆدار، ئێمە ئێستا لە ‌قۆناغی شۆڕش و بەرەنگاریی داین، زۆترین قوربانیی خەڵک دەیدات و زۆرترین زەحمەتیش لە ‌بەرامبەر دەوڵەت خەڵك دەیکێشێت.

 

- یەكگرتوویی و یەك گوتاریی نابیندرێت لە ‌سەر ئاستی ژنانی پارتە سیاسییەكانی ڕۆژهەڵاتی كوردستان، ئەمە بۆ چی دەگێڕیتەوە؟

 

"لەم بارودۆخەدا، شەرمێكی هەر مەزنە كورد یەك نەگرن"

 

شەروین زیلان: لە ‌لایەن ئێمەوە ئەو هەوڵ دراوە، بەڵام ئەمە بەتەنها ئەنجامی نابێت، گرنگە هەوڵەكان لە‌سەر ئاستی باڵای هەموو لایەنەكان بەڕێوە ‌بچێت، بە ‌تایبەت لەو بارودۆخەدا، شەرمێكی هەرە مەزنە کە كورد یەك نەگرن، چونكە لەم ناوچەیەدا شەڕێكی مەزن بەڕێوەدەچێت، سیستمەكان بەرەو گۆڕانكاریی دەچن، ئەم گۆڕانكارییانەش توركیا و ئێران دەگرێتەوە، بێگوومان ئەم ئەركەش دەكەوێتە سەر ژنان، چونكە ژنان هەستی نەتەوەیاتی و رۆحی تێكۆشانیان لە ‌پیاوان بەرزترە.

 

 

- ئەم یەك نەگرتنە ‌لە ‌نێوان لایەنە سیاسییەكان هۆكاری چییە؟ گرفت ئەوەیە چەترێك نییە كە هەموو لایەنەكان كۆ بكاتەوە؟

 

"هەبوونی چەتر و پڵاتفۆڕمێك زۆرگرنگە"

 

شەروین زیلان: ئەم یەك نەگرتنە پەیوەندی بەوەوە هەیە تا ئێستاش ژنان لە ‌ژێر كاریگەریی حیزبایەتی دان، ئەمە بووەتە بەربەست لە ‌بەردەم خەباتی نەتەوەیی ژناندا، گرنگە ژنان لەو چوارچێوە تەنگە خۆیان دەرباز بكەن، هەبوونی چەتر و پڵاتفۆڕمێك زۆرگرنگە، لە ‌ماوەی ڕابردوو ڕاوێژێكی نەتەوەیی پێكهات لە شاری ‌سلێمانی، هێندێك لایەن بەشدارنەبوون، ئەمە كەموكوڕییەكی مەزنە، پارتەكان وەك پێویست بە ‌بەرپرسیاریەتی خۆیان هەڵناستن.

 

- ڕێكخراوی لێبوردەیی نێودەوڵەتی لەسەر زەینەب جەلالیان ڕاپۆرتێكی بڵاوكردەوە، ئەمە دەرگایەكی باش ناكاتەوە لە ‌بەردەم كێشەی زیندانیانی ژن لە ئێران و ڕۆژهەڵاتی كوردستان؟

 

"ژنانی كورد بەرخۆدان دەكەن لە ‌سەر ئاستێكی باڵادا"

 

شەروین زیلان: بڵاوكردنەوەی ئەو ڕاپۆرتە دەریدەخات ساڵانێكی زۆرە زەینەب جەلالیان، لە ‌زیندانەكانی ئێران بەرخۆدان دەكات، هیچ كات تەسلیمی سیاسەتەكانی دەوڵەتی ئێران نەبووە، لە لایەكی ترەوە تێكۆشانی ژنان دەردەخات لە ‌هەرچوار پارچەی كوردستان، ژنانی كورد بەرخۆدان دەكەن لە ‌سەر ئاستێكی باڵا، ئەوەی زۆر گرنگە لێرەدا ئەوەیە کە ئەم تێكۆشانە زیاتر‌ بە ‌نێودەوڵەتی بكرێت.

 

- سەبارەت بە ‌بەشداری پێنەكردنی ژنان لە كابینە نوێیەكەی روحانی ڕای ئێوە چۆنە؟

 

"تا سیستم نەگۆڕدرێت بەشداریكردنی ژنان هیچ لە مەسەلەكە ناگۆڕێت"

 

شەروین زیلان: لەبەر ئەوەی دەوڵەتی ئێران لە ‌سەر بنەمایەكی یەكسان دانەمەزراوە، دەوڵەتێكی فاشیستە، ئەو فكرەی دەوڵەتی ئێرانی لە‌سەر دامەزراوە هیچ ڕۆڵێك و پێگەیەكی گرنگ بە ‌ژن نادات، روحانیش وەك كاندیدێكی ڕیفۆڕمخواز ناسێندرا، لە ‌هەڵبژاردنەكان ژنان زۆر دەنگیان بە روحانی دا، بەڵام حكومەتی روحانی وەکو پێویست بەدەنگ داخوازییەكانی ژنانەوە نەهات، بەڵێنەكان تەنها لە ‌ئاستی قسەدا مانەوە، تا سیستم نەگۆڕدرێت بەشداری یان بەشداری پێنەكردنی ژنان لە ‌حكومەت بە شێوەیەكی نموونە هیچ لە بارودۆخی ژنان لە ئێران ناگۆڕێت.

 

- لەدەرەوەی چواچێوەی دەوڵەت، ژنان دەتوانن خۆیان ڕێكبخەن؟

 

"پێویستە ژنان لە بواری سیاسی و فیكری و ئایدیۆلۆژیدا خۆیان لە ‌دەوڵەت داببڕن"

 

شەروین زیلان: پێویستە ژنان لە ‌دەرەوەی دەوڵەت خۆیان بە ‌ڕێكخستن بكەن، پێویستە لە بواری سیاسی و فیكری و ئایدیۆلۆژی خۆیان لە ‌دەوڵەت داببڕن، چونكە دەوڵەت شتێكی نییە بە ژنی ببەخشێ، دەوڵەت ناتوانێت چارەیەك بۆ ژنان بدۆزێتەوە، ژنان گرنگە خۆیان چارەنووسی خۆیان دیاری بكەن، خۆیان بە ڕێكخستن بكەن لەژێر چەتری كەژار- دا.

 

لە ‌كۆتاییدا پەیام و بانگەوازیتان بۆ ژنانی كورد و ئێران چییە؟

 

"با ژنان بەشداری شۆڕی كۆنفیدڕاڵی دیموكراتی بن، چونكە شۆڕشی ژنە"

 

شەروین زیلان: پەیامی من بۆ ژنانی كورد و رۆژهەڵاتی ناوەڕاست ئەوەیە، ئەمڕۆ شۆڕشێك بەڕێوە دەچێت لە ‌ناوچەكەدا، شۆڕشی كۆنفیدڕاڵی دیموكراتی، شۆڕشی ژنە، ئەم شۆڕشە لە ‌هەر شۆڕشێك زیاتر دەرگای بۆ بەشداریی ژنان كردوە‌تەوە، تا بەشداربن و ئیرادەی خۆیانی تێیدا بەیان بكەن، گرنگە گەلانی ئێران بەشداریی ئەو شۆڕشە بكەن، چونكە ئەم هەنگاوە چارەنووسی ناوچەكە دیاریی دەكات.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin