Smiley face
Smiley face
Smiley face

کۆدار داوای پشتیوانی بۆ زیندانیانی سیاسی دەکات

2017-08-22 10:19:25



ڕۆژنیوز - ناوەندی هەواڵەکان

 

کۆمەڵگای دیموکرات و ئازادی ڕۆژهەڵاتی کوردستان- کۆدار، سەبارەت بە زیادکردنی فشارەکان بۆسەر زیندانیانی سیاسی لە ئێران و ڕۆژهەڵاتی کوردستان ڕاگەیەندراوێکی بڵاوکردەوەو داوایکردووە هەموو مرۆڤە ئازادیخوازەکان و ڕێکخراوە مەدەنییەکان دژی پێشێلکارییەکانی ئێران بوەستنەوەو ناڕەزایی پیشان بدەن.

 

کۆدار ئەمڕۆ ڕاگەیەندراوێکی لە سەر ماڵپەڕی فەرمییدا بڵاوکردەوەو بانگەوازی کەسانی ئازادیخوازی ئێران و ڕۆژهەڵاتی کوردستانی کرد، کە دژ بە سیاسەتەکانی حکومەتی ئێران لە ئاست زیندانیانی سیاسیدا بوەستنەوەو ناڕەزایی پیشان بدەن.

 

کۆدار ڕایگەیاند: کۆماری ئیسلامی ئێڕان یەکێکە لەو حکومەتانەی بەردەوام بانگەشەی دیموکراسی و ڕێزگرتن لە ئیرادەی خەڵک دەکات، بەڵام ئەگەر تەنیا دۆخی زیندانیانی سیاسی بێنینە بەر چاوان تێدەگەین، کە ئەو بانگەشەیە تا چ ڕادەیەک پوچ و بەتاڵە، نالەباربوونی دۆخی زیندانیانی سیاسی تێپەڕکردنی هێڵی سووری کۆمەڵگایە.

 

کۆدار ڕاشیگەیاند: دەسەڵاتدارییەک کەو ئەو ورەیەیە نەبێت 'تاوانی سیاسی و زیندانی سیاسی' لە دەستوور و یاساکانیدا پێناسەبکات، چۆن ڕێگا بە خۆی دەدات باس لە مافەکانی مرۆڤ و ئازادی ڕادەربڕین بکات، کۆماری ئیسلامی ئێران لە ٣٨ ساڵی ڕابردوودا بەردەوام فشارەکانی بۆ سەر کۆمەڵگا زیادکردووە و تاوانی ئەنجام داوە بەرامبەر بەو کەسانەی بۆ ئازادی و دیموکراسی تێکۆشیون و ڕەوانەی کونجی زیندانەکانی کردوون.

 

کۆدار ئاماژەی بەوەشداوە، کە لە چەند ساڵی ڕابردوودا فشارەکان لەلایەن ئێرانەوە بۆسەر زیندانییە سیاسییەکان زیادیان کردووە، لە ڕۆژانی ڕابردوودا لە زیندانی 'ڕەجایی شار'ی کەرەج ژمارەیەک لە زیندانیانی سیاسی دژ بە سیاسەتەکانی ئێران بەرامبەر بە زیندانیانی سیاسی مانیان لە خواردن گرتووە، حکومەت لە بەرامبەردا دەستیکردووە بە فشار خستنەسەر خێزانی ئەو زیندانییە سیاسیانە، بێگومان بۆ ئەوەی کە ئیرادەی بەرخۆدانی ئەو زیندانیانە تێکبشکێنێت.

 

کۆدار لە کۆتاییدا ڕایگەیاندووە، کە ئێمە وەکو کۆدار بانگەوازیی هەموو مرۆڤە ئازادیخوازەکان و ڕێکخراوە مەدەنییەکان دەکەین کە دژی پێشێلکارییەکانی ئێران بوەستنەوەو ناڕەزایی پیشان بدەن و پشتگیریی بەرخۆدانی زیندانیانی سیاسیش بکەن.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin