Smiley face
Smiley face
Smiley face

ڕۆژنیوز هۆكاری بەرزبوونەوەی نرخی بەنزین ئاشكرا دەكات 

2017-08-22 09:13:06



ڕۆژنیوز - هاوكار مستەفا


ماوەیەکە نرخی بەنزین بەرزبوونەوەی بەرچاوی بەخۆیەوە بینیوە، خاوەن بەنزینخانەیەكی هەڵەبجەش دان بەوە دا دەنێت کە بەرزبوونەوەی نرخەكە لە دەستەڵاتی ئەواندا نییە، قایمقامی هەڵەبجەش دەڵێت: بەدواداچونی بۆ دەكەین، ڕۆژنیوزیش لە دەرەنجامی بەدواداچونیدا بۆ ئەو کێشەیە، هۆكارەكان ئاشكرا دەكات.

ماوەی زیاتر لە هەفتەیەكە، هەر لیترێکی هەموو جۆرەکانی بەنزین، ٥٠ دینار گرانتر بووە، بەنزینی محەسەن لە 625 دینارەوە بووە بە 675 دینار، سۆپەر لە 675 بووە بە 725، نۆرماڵیش لە 550 دینارەوە بووە بە 600دینار، ئەوەش شۆفێرانی نیگەران كردووە.

تۆفیق قادر، یەكێك لە شۆفێرانی دانیشتووی شاری هەڵەبجەیە، بە ڕۆژنیوزی وت: بەهۆی بێپلانی حكومەت و لەپێناو بەرژەوەندی چەند بەرپرسێك کە هەركاتێک بیانەوێت یاری بەنرخی ئەو شمەك و كاڵایانە دەكەن كە هاوڵاتیان ڕۆژانە بەکاریان دەهێنن، بۆیە بەرزبوونەوەی نرخی بەنزینیش چاوەڕوانكراوە، چونكە هەموو كەس دەزانێت كە بەرپرسانی حكومی و حزبی ئەم هەرێمە خاوەن بەنزینخانەن و کۆمپانیای هاوردەکردنی سووتەمەنیان هەیە.

 


ئەوەشی خستەڕوو، لەلایەن حكومەتی هەرێمەوە پاڵپشتی هیچ شتێك ناكرێت كە لەبەرژەوەندی هاوڵاتیاندا بێت، بەڵكو كۆمەڵێك مشەخۆر بەناوی بەرپرسەوە بوونەتە بازرگان بەسەر ئەم خەڵكەوە و كۆنتڕۆڵی هەموو جومگەكانی ژیانیان كردووە و خەڵكیش بێدەنگە، بۆیە لەم هەرێمەدا شتێك نەماوە بەناوی حكومەت، خەلكی كوردستانیش كەوتوونە واقیعێكەوە كە دەرچوون لێی، زۆر زەحمەتە، ئەنجامێكی باشیش چاوەڕێی خەڵكی كوردستان ناكات، چونكە ئەوانەی خۆیان كردووە بە شوانی ئەم خەڵكە، بەهیچ شێوەیەك دڵسۆز نین.

زانا ڕەوف، خاوەنی یەكێك لە بەنزینخانەكانی هەڵەبجە بە ڕۆژنیوزی ڕاگەیاند: ماوەی زیاتر لە هەفتەیەكە نرخی بەنزین لە جۆرەكانی نۆرماڵ و محەسەن و سۆپەر بەرز بوونەوەیان بەخۆیانەوە بینیوە، ئەوەش بەهۆی ئەوەیە كە نیوەی زیاتری پێداویستی سووتەمەنی ناوخۆ لەدەرەوە دابیندەكرێت، ئێستاش نرخی نەوت لە جیهاندا بەرزبووەنەوەی بەخۆیەوە بینیوە، ئەوەش ڕاستەوخۆ نرخی سووتەمەنی بە بەنزینیشەوە بەرز کردوەتەوە.

 


ئەوەشی خستەڕوو، هۆكارێكی تری بەرزبوونەوەی نرخی بەنزین پەیوەندی بەو ڕێوشوێنانەوە هەیە كە چەند ڕۆژێكە لە مەرزی باشماخ دەگیرێتە بەر، چونكە ئەگەر پێشتر ڕێگەدرابێت بەنزینی كوالیتی نزم هاوردە كرابێت، ئێستا تەنها ڕێگە بە بەنزینی كوالیتی بەرز دەدرێت هاوردە بكرێت، ئەوەش وایكردووە كە ڕێژەی هاوردەكردن كەم ببێتەوە و خواست زۆر ببێت، دواجار ئەوەش نرخ بەرز دەکاتەوە.
 


ئەو خاوەن بەنزینخانەیەی هەڵەبجە ئەوەشی وت: ئێستا نرخی لیترێک بەنزینی محەسەن 675 دینارە لە كاتێكدا نزیكەی دوو هەفتە لەمەوبەر، بە 625 دینار بوو، بۆیە لەگەڵ هاتنی جەژنی قورباندا پێشبینی ئەوە دەكرێت کە ئەو نرخە بەرز بوونەوەی زیاتر بەخۆیەوە ببینێت، ئەوەش بەهۆی خواستی زۆر و خستنەڕووی كەمەوە ڕوودەدات، بەڵام بەشێوەیەكی گشتی بەرزبوونەوەی نرخەكان پەیوەندییان بەئێمەوە نییە، بەڵكو ئەگەر لە مەرزەكانەوە بە گران هاوردەكرا، ئەوا لە سلێمانیشەوە بە گران بۆ ئێمە ڕەوانەی دەكرێت.

لای خۆیەوە نوخشە ناسیح، قایمقامی ناوەندیی پارێزگای هەڵەبجە بە ڕۆژنیوزی وت: دوای بەدواداچونمان بۆ پرسی بەرزبوونەوەی نرخی بەنزین، بۆمان دەركەوت كە ئەم بەرزبوونەوەیە تەنها لە سنووری پارێزگای هەڵەبجە نییە، بەڵكو لەشارەكانی تری هەرێم بەهەمان شێوە نرخی بەنزین بەرزبووەتەوە، ئەوەش پەیوەندی بە مەرزەكانەوە هەیە، كە لەوێ‌ بەنرخێكی گران هاوردە دەكرێت و دەبێت بە گرانیش بەهاوڵاتیانی بفرۆشنەوە.

 


ئاماژەی بەوەش كرد، بەدواداچونی زیاتر بۆ ئەو بابەتە دەكەین، بەڵام ئەوەی ئەركی ئێمەو لیژنەكانمانە ئەوەیە كە چاودێری بەنزینخانەكانی سنورەكە بكەین لەڕووی كوالیتی بەنزینەكەیان، هەروەها ڕێگریكردن لە بەرزكردنەوەی تاكلایەنەی نرخی بەنزین، لەو حاڵەتەشدا ئێمە هەڵدەستین بە داخستنی بەنزینخانەكە یاخود غەرامەكردنی خاوەنی بەنزینخانەكە.

د.خ

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin