Smiley face
Smiley face
Smiley face

شێروانی: لە 'مەسیف و بارزان و مێرگەسوورو دیانا' بۆکەس نییە ڕۆژنامەنووس بێت

2017-08-22 08:41:42



ڕۆژنیوز – سۆران حسێن

 

شێروان شێروانی، یەکێکە لە ڕۆژنامەنووسە دیارەکانی دەڤەری بادینان، لەسەر ئازادی ڕۆژنامەنووسی و ڕادەربڕین لە سنوورەکەی دەڵێت: لە بادینان شوێنێک هەیە ئێمەی پێیدەڵێین سێگۆشەی بەرمۆدا، ئەویش مەسیف و بارزان و مێرگەسوورو دیانایە، لەوێ ڕۆژنامەنووس هەربۆی نییە هەبێت، ئەگەر بەدەربێت لە حزبی دەسەڵاتدار کە پارتییە.

 

لە چاوپێکەوتنێکی تایبەتی ڕۆژنیوزدا، شێروان شێروانی ڕۆژنامەنووس لە دەڤەری بادینان، باس لە ئاستەنگییەکانی کاری ڕاگەیاندن و ئازادی ڕادەربڕین دەکات و ڕایدەگەیەنێت، لە بادیناندا نەک هەر حزب، بەڵکو دەسەڵاتی ئاغاکانیش فشارن لەسەر ڕۆژنامەنووس، باس لە ڕۆڵی دادگاکان دەکات و بە پشتیوانی حزبیان دەزانێت و، دەشڵێت: تیرۆرو ئەشکەنجە تۆختر دەبێتەوەو بەردەوام دەبێت، تا ئەم زهنییەتە دەسەڵاتی هەبێت و بەرژەوەندی بنەماڵەی دەسەڵاتدار لە مەترسیدا بێت.

 

دەقی چاوپێکەوتنەکە:

 

ئازادی ڕادەربڕین لە هەرێمی کوردستاندا لە چی ئاستێکدایە؟

 

"دامەزراندی ئەم دەسەڵاتە لەسەر بنەمای دیموکراسی نییە و فیوداڵییە"

 

شێروان شێروانی: ناتوانم ئاست بۆ ئازادی ڕادەربڕین دیاری بکەم لە باشوری کوردستان، چونکە پەیوەستە بە زۆر بابەتەوە، لەسەرووی هەموویانەوە ئەم دەسەڵاتەی کە حکومڕانە لە هەرێمی کوردستاندا، کە من پێموایە قەناعەتی بە پرۆسەی دیموکراتی نییە، کە لە ناویدا ئازادی ڕۆژنامەنووسی و ڕادەربڕین هەیە، بەوپێیەی دامەزراندی ئەم دەسەڵاتە لەسەر بنەمای دیموکراسی نییە، بەڵکو فیوداڵییە، یان لەسەر جێهشتنی کورسی ویراسییە، بۆیە ناتوانین باسی گەشەی بیرورای ئازاد بکەین لە باشوری کوردستاندا، کە سیستمەکەی سیستمێکی نا دیموکراتییە".

 

هۆکاری ئەوانە چین؟

 

"ڕۆژنامەنووس کاردەکات و دەسەڵاتیش باوەڕی بە دیموکراتییەت نییە"

 

شێروان شێروانی: ڕۆژنامەنووس بەردەوام کار لەسەر کەمووکورتییەکان دەکات، لێرەشدا بەریەککەوتن درووست دەبێت، هەربۆیە دەبینین ڕۆژانە هەڵکوتانە سەر ڕۆژنامەنووس و گرتن و کوشتن و تیرۆرکردن ڕوودەدات، ئەوانەش دەرهاویشتەی ئەم دەسەڵاتەیە کە هیچ باوەڕی بە دەنگی ئازادو دیموکراتییەت نییە.

 

لەنێوان شارەکان، یان حزبەکاندا چ جیاوازییەک دەبینن؟

 

"شوێنێک هەیە ئێمە پێیدەڵێین سێگۆشەی بەرمۆدا"

 

شێروان شێروانی: من وای دەبینم، لە نیوان زۆنی زەردو سەوز جیاوازیییەکی کەم هەیە، بەوپێیەی لە زۆنی زەردو لەناو بادینان شوێنێک هەیە ئێمە پێیدەڵێین سێگۆشەی بەرمۆدا، ئەویش مەسیف و بارزان و مێرگەسوورو دیانایە، لەوێ ڕۆژنامەنووس هەربۆی نییە هەبێت، ئەگەر بەدەربێت لە حزبی دەسەڵاتدار کە پارتییە، لەو دەڤەرانە حزب کۆنترۆڵی هەموو شتێکی کردووەو خۆی بە فریاد ڕەس و مەلائیکە و هەموو شتێک دەزانێت.

 

کەوایە فشارەکانی سەر میدیا لە بادینان زیاترن؟

 

"لە بادینان ڕۆژنامەنووس لەناو سێ جۆر زینداندایە"

 

شێروان شێروانی: جیاواز لە حزب، لە بادینان چینێکی دیکە دەستێوەردان لە ئازادی مرۆڤ دەکەن، وەکو دەسەڵاتی ئاغاکان، چونکە ئاغاکان هەمیشە پەیوەستی دەسەڵاتن، لەبەر ئەوەی بەرژەوەندی هاوبەشیان هەیە، ئەتوانم بڵێم لەو دەڤەرە ڕۆژنامەنووس لەناو سێ زینداندایە، ئەویش هەریەکەن لە زیندانی بچوک کە خانەوادەیە، چونکە کەم خێزان ڕازی دەبێت کورەکەی یان کچەکەی ببێتە ڕۆژنامەنووس، چونکە دەبێت باجێکی زۆربدەن، زیندانێکیتر لەو گەورەتر کۆمەڵگاو فلتەرەکانییەتی، فشاری ئاغ و سەرۆک خێڵەکانە، لەهەمووی گەورەتر زیهنییەتی ئەم دەسەڵاتەیە، کە ئەمڕۆ بەداخەوە لە زۆنی زەرد هەموو شتێک کۆنترۆڵکراوە.

 

 

ڕۆڵی دادگا لەم نێوەندەدا چۆنە؟

 

"دادوەرەکان بە واژی بەرپرسە حزبیەکان دادەنرێن"

 

شێروان شێروانی: دادگا یەکێکە لەو دەسەڵاتانەی کە لە دەستووردا دەسەڵاتی زۆرە، دەبوایە لەگەڵ دەسەڵاتی چوارەم دا کە میدیا و ڕۆژنامەنووسە پەیوەندییەکی باشیان هەبوایە، بەڵام دەسەڵاتی یەکەم کە حوکمڕانە، ئەو ئاشتەواییەی نێوان داداگا و میدیا-شی تێکداوەو شەڕی درووستکردووە، بۆیە بەتایبەت لە زۆنی زەرد کە ڕۆژنامەنووس دەچێتە دادگا هەست بەوەدەکات کە دۆسییەکەی بە سیاسی دەکرێت، بەوپێیەی دادوەرەکانی بە واژی بەرپرسە حزبیەکان دادەنرێن، ئەمەش بۆخۆی پەتایەکی دەستووری و هەڵەیەکی یاساییە، لە زۆنی زەردو ڕەنگە لە سلێمانیشدا وابێت، کە حزبی حکومڕان وەک داردەستێکی خۆیان تەماشای دادگا دەکەن.

 

داواکاری گشتیش هەمان ڕۆڵی هەیە؟

 

"شەش کەیسم لە دادگاکانی زۆنی زەرددا هەیە"

 

شێروان شێروانی: من خۆم شەش کەیسم لەدادگاکانی زۆنی زەرددا هەیە و ئەزموونم زۆر وەرگرتووە، دادوەر هەبووە بە منی وتووە تۆ بۆ ئەندامی سەندیکا نیت؟، لە کاتێکدا من ناچارنییم ئەندامی سەندیکایەک بم کە گرێدراوی دوو حزبە، ئاخ بۆ ئەقڵییەتی ئەو دادوەرە کە بڕوای وایە دەبێت هەموو ڕۆژنامەنووسێک ئەندامی سەندیکا بێت، لەم ماوەیەدا لە هەولێر بڵاوبوویەوە کە چەند دادوەرێک سەردانی بەرپرسی لقێکی پارتی دەکەن بۆ پیرۆزبایی دامەزراندنی، ئەمانە خۆی لەخۆیدا شکاندنی شکۆی دەسەڵاتی دادوەرییە لە هەرێمی کوردستاندا، یان هیچ نەبێت داواکاری گشتی بێتە سەرخەت و لەگەڵ میدیاکاندا ئاشتببێتەوە بۆ هاوکارییەکان بۆ ئاشکراکردنی دۆسییەکانی گەندەڵی، بەڵام بەداخەوە هەمیشە دەبنە لانێک لەو ئەقڵییەتەی حزبی دەسەڵات.

 

کەوایە مەترسی لەسەر ڕۆژنامەنووس و ئازادی ڕادەربڕین بەردەوامە؟

 

"پۆلیس و دادگا و نەخۆشخانەکانیش لە خزمەتی دەسەڵاتدان"

 

شێروان شێروانی: تیرۆری ڕۆژنامەنووسان و بیروڕای ئازاد بەردەوام دەبێت، تا ئەو زهنییەتە باڵا دەستبێت لە هەرێمی کوردستاندا، کە باوەڕی بە دیموکراتی نییە، ئەگەر ببینین تیرۆرو ئەشکەنجەی ڕۆژنامەنووس کاتێک تۆخ دەبێتەوە کە بەرژەوەندی ئەم بنەماڵەیەی حکومڕانە دەکەوێتە مەترسییەوە، لەم ماوانەی دواییدا بینیمان لەسەر شیعێرێک بە زلـلە لە شاعیرێک درا، لەناو سەنتەری هەولێردا ڕۆژنامەنووسێک خەڵتانی خوێن کرا، کەسیش بەهانایەوە نەچووە، ئەمانە دەلیلی ئەوەن گشت دەسەڵاتەکانی دیکە وەک پۆلیس و دادوەرو تەنانەت فریاکەوتن و نەخۆشخانەکانیش لە خزمەتی ئەو زهنییەتەدان، لەژێر سێبەری ئەو ژوورە تاریکانەن کە بڕیاری تیرۆرو تۆقاندنی ڕۆژنامەنووسانی لێوە دەردەکرێت، ئەوەش بوو بینیمان کە حزب هەیە ژووری عەمەلیاتی بۆ ئەو مەبەستە داناوە.

 

لە بەرامبەر ئەمانەی باستان کرد ڕۆژنامەنووس پێویستە چی بکات؟

 

"من پێشنیاری ئەوە دەکەم ئەنجومەنێکی ڕاوێژکاری دروستبکەین"

 

شێروان شێروانی: پێویستە ئێمە دەنگمان کۆبکەینەوەو دەنگمان بگەیەنینە ناوەندە جیهانییەکان و کونسوڵخانەکان و یەکێتی ئەوروپا، ئەمانە گرنگن بۆ ئەوەی پارێزبەندییەک 'حەسانە' بە ڕۆژنامەنووس بدرێت، گرنگە خۆشمان یەک دەنگ بین، کاتێک پێشلکارییەک لە زۆنی زەرد کرا نابێت سەوز بێدەنگ بێت، وە بە پێچەوانەوە هەروا، من پێشنیاری ئەوە دەکەم ئەنجومەنێکی ڕاوێژکاری دروستبکەین بۆ ئەو ڕۆژنامەنووسانەی سەربەخۆیانە و ئازادانە کاردەکەن، جیاواز لەوانەی لەژێر سایەی حکومەت و دەسەڵاتدا دروستکراون.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin