Smiley face
Smiley face
Smiley face

فیدراسیۆنی پەنابەران: نزیکەی ٦٠ هەزار هاوڵاتی هەرێم کۆچیان کردووە

2017-08-12 10:36:38



ڕۆژنیوز – ڕێزان محەمەد

سەرۆکی فیدراسیۆنی پەنابەرانی عێراق ڕایدەگەیەنێت، لەماوەی ساڵ و نیوێکدا نزیکەی ٦٠ هەزار هاوڵاتی هەرێمی کوردستان کۆچیان کردووە، هاوڵاتیەکیش کە بە نیازە کۆچ بکات، هۆکارەکەی بۆ بوونی قەیران و ترسی هاوڵاتیان لە پرسی ڕیفراندۆم لە ئێستادا دەگەڕێنێتەوە.

 

لەم ساڵانەی دوایدا و بەتایبەت لەم مانگانەی دواییدا، کۆچکردن بۆ وڵاتانی دەرەوە دەستیپێکردوەتەوە، ئەمە سەرەڕای ئەوەی کە بەهۆی کۆچکردنەوە ١٥٤ هاوڵاتی هەرێمی کوردستان لە دەریای ئیجە خنکاون و ٥٤ کەسی دیکەش بێ سەروشوێن بوون و بە سەدان کەسیش لە زیندانی وڵاتاندان.

 

لەو بارەیەوە ئاری جەلال، سەرۆکی فیدراسیۆنی سەراسەری پەنابەرانی عێراق لە هەرێمی کوردستان، بە ڕۆژنیوزی وت: بەداخەوە ئەگەر سەیری ڕەوشی هەرێمی کوردستان بکەین، ئەو بارودۆخە داراییە ناجێگیرەی کە هەیە لە ئێستادا، وایکردووە کە هاوڵاتیان هاوشێوەی ساڵانی ڕابردوو بەرەو ئایندەیەکی نادیار کۆچ بکەن، ئەوەش لەکاتێکدایە، وڵاتانی ئەوروپا پیلانیان هەیەو ڕێگری دەکەن لە لێشاوی کۆچبەران، کە بڕیارەکەیان لە ٢٠/٣/٢٠١٦-ەوە تایبەت بەو پەنابەرانەی کە ڕوو لە وڵاتانی ئەوروپا دەکەن، کە لەنێوان وڵاتی ئەوروپا و تورکیا، خستووەتە بواری جێبەجێکردنەوە.

 

 

ئاری جەلال، وتیشی: بە پێی ئاماری فەرمی وەزارەتی گەشتیاری تورکیا کە بەدەست ئێمە گەیشتووە، لە ماوەی حەوت مانگی ڕابردوودا زیاد لە ٢٤٠ هەزار هاوڵاتی هەرێمی کوردستان و عێراق ڕوویان لە تورکیا کردووە بە مەبەستی گەشتیاری، بەڵام زۆرێک لەو هاوڵاتیانە لە کەنار ئاوەکانی ئیتاڵیا و خۆیان گەیاندۆتە دوورگەکانی یۆنان، لە زۆرێک لە گرتووخانەکاندا دەستبەسەرن.

 

ئاماژەی بەوەشدا: سەرجەم ئەو هاوڵاتیانەی هەرێمی کوردستان لەماوەی ساڵ و نیوێکدا ڕۆشتوون هەتا ٢٠/٦/٢٠١٧ زیاتر لە ٥٥ بۆ ٦٠ هەزار کەسی تێپەڕاند، کە زیاتر لە ١٥٤ کەسیان گیانیان لەدەستداوە و ٥٤ کەسشیان بێ سەروشوێن بوو، ئێمە کاری جددیمان بۆ سەرجەم بێ سەروشوێنەکان کردووەو سامپڵی خوێنمان ڕەوانەی شوێنی ڕووداوەکان کردووە بۆ سەرجەمیان کە تەنها تەرمی چوار کەسیانمان دۆزیوەتەوە.

 

سەرۆکی فیدراسیۆنی سەراسەری پەنابەرانی عێراق، ئەوەشی خستەڕوو: هەمیشە پارێزگای سلێمانی پشکی شێری بەرکەوتووە و زۆرینەی هاوڵاتیان کە کۆچیان کردووە بۆ دەرەوە دانیشتووی پارێزگای سلێمانی بوون، ئەمەش بەهۆی ئەوەی کە ناوچەکەی دوو ئیدارەی لەسەرە و ڕێژەی دانیشتوانەکەی زیاترە لە پارێزگاکانی دیکە.

 

پرشنگ مەجید، یەکێکە لەو هاوڵاتیانەی کە لە ساڵانی ڕابردوو کوڕەکەی و دوو کوڕەزای لە دەریای ئیجەدا خنکان، کاتێک بە خێزانی لەگەڵ ٢٠ کەسی خێزانەکەیان ویستبوویان ڕوو لە وڵاتانی دەرەوە بکەن، بەڵام تەنها کوڕەزایەکی تەمەن ١٠ ساڵی بەناوی ڕەیان و هاوژینی کوڕەکەی لەو ڕووداوە ڕزگاریان بووە، پرشنگ و ڕەیان لە ئێستادا دیسانەوە دەیانەوێت ڕێگەی کۆچکردن بگرنەوە بەرو ئەم کوردستان بە جێ بهێڵن.

 

 

لە بارەی هۆکاری دووبارە هەوڵدان بۆ کۆچکردنەوەیان پرشنگ بە ڕۆژنیوزی وت: ژیانی خه‌ڵک له‌م وڵاته‌دا سه‌خته‌ و پاشه‌ڕۆژمان دیارنییه‌، هه‌ربۆیه‌ په‌نا ده‌به‌ینه‌ کۆچ کردن، دەمەوێت لەگەڵ کوڕەزاکەم کۆچبکەم بۆ دەرەوەی وڵات بۆ لای کچەکەم، تاوەکو لەوێ ژیانمان بەسەر ببەین، لەبەرئەوەی لێرە بەهۆی قەیران و بابەتی ڕیفراندۆمەوە ژیان زۆر قورس بووە و خەڵکەکە دەترسن لە گرانبوونی بازاڕ و ناڕەحەتییەکانی ژیان، وە مووچەش نادرێت، که‌سمان نه‌ماوه‌ له‌م وڵاته‌ و پاشه‌رۆژمان دیار نییه‌، وهیچ هیوایه‌کم نه‌ماوه‌ی لێرە، ژیانی خه‌ڵک لێره‌ سه‌خته‌ و من که‌سم نه‌ماوه‌ یارمه‌تیم بدات.

 

ئەو دایکە بە چاوی پڕ فرمێسکەوە باسی رووداوی له‌ده‌ستدانی کوڕه‌که‌ی کرد و وتی: له‌ ٢٧-١-٢٠١٦بوو، کوڕه‌که‌م و خێزان و منداڵی کۆچیان کرد بۆ دەرەوە، چوار ڕۆژ مانه‌وه‌ له‌ تورکیا و دواتر کوڕه‌که‌م و دوو منداڵی بوونه‌ قوربانی کۆچ و خنکان، کوره‌که‌م و دوو منداڵی و چه‌ند که‌سێکی دیکه‌ش له‌ که‌سوکاری ژنه‌که‌ی تیاچوون.

 

له‌ کۆتایشدا پرشنگ مه‌جید وتی: داواکاریم ئه‌وه‌یه‌ ژیانی خه‌ڵک باش ببێت، کاسپی ببێت و مووچه‌ ببێت، پێویسته‌ ژیانێکی باش بۆ هاوڵاتی ده‌سته‌به‌ر بکرێت، ئه‌گه‌ر ئه‌مانه‌ هه‌بێت هاوڵاتی بۆچی کۆچ ده‌کات؟، هیچ که‌س حه‌زی به‌ غه‌ریبی نییه،‌ به‌ڵام ژیانی که‌س له‌م وڵاته‌ ده‌سته‌به‌ر نییه‌، من مووچەی چاودێری خێزانم هه‌یه‌ ساڵ‌ و نیوێکه‌ وه‌رم نه‌گرتووه‌.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin