Smiley face
Smiley face
Smiley face

ڕێکخراوی ستۆپ ٢٣ دۆسیەی گەندەڵیی لەبواری نەوتدا تۆماردەکات

2017-07-17 15:40:25



ڕۆژنیوز - قەرەچوغ ئەنوەر 

 

بەپێی ڕاپۆرتی ساڵانەی ڕێکخراوی ستۆپ بۆ دژەگەندەڵی لە ماوەی ١٢ مانگی ڕابردوودا ٦٧ دۆسیەی گەندەڵییان تۆمارکردووە، کە ٢٣ یان دۆسیەی نەوت بوون.

 

ئەمڕۆ کاتژمێر ١٠:٠٠ لە شاری هەولێر ڕێکخراوی ستۆپ بۆ دژە گەندەڵی بەھاوکاریی دامەزراوەی بەخشینی نیشتیمانیی بۆ دیموکراسی (NED) ی ئەمەریکی و  بە ئامادەبوونی سەرۆکی دەستەی دەسپاکی، کۆنفرانسی ساڵانەی خۆی لەژێر ناوی بەھێزکردنی لێپرسینەوە و دەسەڵاتی یاسا لەھەرێمی کوردستان دەستپێکرد و هەتا ئێوارەی ئەمڕۆ بەردەوامیی دەبێت.

 

 

فەرمان ڕەشاد، سەرۆکی رێکخراوی ستۆپ بۆ دژە گەندەڵی بە ڕۆژنیوزی ڕاگەیاند: ئێمە کار لەسەر دۆسیەکانی گەندەڵی دەکەین و کۆیاندەکەینەوە و پێشکەشیان دەکەین بە داواکاری گشتی و دەستەی نەزاھە، لەچوارچێوەی ساڵی دووەمی پرۆژەکەشمان چوار راپۆرتی وەرزیمان بڵاوکردووەتەوە لەگەڵ ڕاپۆرتێکی ساڵانە.

 

 

ناوبراو، وتیشی: لەکۆی ئەو ڕاپۆرتانە لە ماوەی یەک ساڵی ڕابردوودا ٦٧ دۆسیەی گەندەڵیمان لە کەرتە جیاوازەکان تۆمار کردووە کە ٢٣ دۆسیە لەسەر نەوت و ١٧ دۆسیە لەسەر زەوی و زار و شەش دۆسیەش لەسەر کەرتی تەندروستی و ٢١ دۆسیەی تریش لەبوار و کەرتە جۆراوجۆرەکان بووە.

 

سەرۆکی ڕێکخراوی ستۆپ ڕاشیگەیاند: لە ڕێگای داواکاری گشتی-یەوە سەرجەم دۆسیەکانمان ئاڕاستەی دادگا کردووە.

 

ئاماژەی بۆ ئەوەشکرد: سەرچاوەی سەرەکی دۆسیەکانمان دامەزراوە و میدیاییەکان بووە.

 

فەرمان ڕەشاد، وتیشی: بەشێک لەو دۆسیانەی داومانەتە داواکاری گشتی لەزۆربەی شارەکان کراونەتە سکاڵا، بەشێکیشیان لەلایەن دەستەی دەسپاکی لەژێر لێکۆڵینەوەدایە، بەڵام کێشەکە ئەوەیە لە دادگاکان زۆرینەی کەیسەکان دوادەخرێن و وەک پێویست کاریان لەسەر ناکرێت ئەمەش وایکردوە بەئاسانی یەکلانەبنەوە.

 

لۆگۆی ڕێکخراوەکە

 


ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin