Smiley face
Smiley face
Smiley face

میهرەبان: پێویستە ژنان كۆسپەكان بشكێنن و بێنە نێو یاریگاكانەوە

2017-07-16 13:35:18



ڕۆژنیوز ـ هاوڕێ كرێكار

 

ژنە وەرزشکارێکی دەربەندیخان پێیوایە پێویستە ژنان کۆسپەکان بشکێنن و بێنە ناو یاریگاکانەوە، هاوکات ڕاشیدەگەیەنێت کە دابونەریت ڕێگرن لەبەردەم زیادبوونی ژنان لەنێو یاریگاكاندا.

 

میهرەبان تۆفیق ژنێكی وەرزشكاری دانیشتووی شارۆچكەی دەربەندیخانی سەر بە پارێزگای سلێمانییە، ئێستا تەمەنی 32 ساڵە و ئەندامی تیپی شاخەوانی دەربەندیخانە، میهرەبان تاكە ژنە لە شارۆچكەی دەربەندیخان لەزۆرینەی یارییەكانی تۆپی پێ لەناو هاندەران دەبینرێت و هانی تیپەكان دەدات، بەو هۆیەشەوە چەندین خەڵاتی پێ بەخشراوە.

 

 

لەبارەی ئامادەبوونی لە نێو یاریگاكان، میهرەبان بە ڕۆژنیوزی وت: لە زۆرینەی یارییەكانی خولی پلە یەك و خولە بەهێزەكانی دەربەندیخان وهەندێ شار و شارۆچكەی تری كوردستان زۆر جار تاكە هاندەرم لەرەگەزی مێ كە لەنێو یاریگای دووگوڵیدا ئامادە دەبم، ئەمەش خەونی لەمێژینەم بووە و هەمیشە هەوڵم بۆی داوە، بەردەوامیش ئەبم تا سەركەوتنی گەورە بەدەست دەهێنم.

 

 

میهرەبان تۆفیق لەبارەی زۆری ئامادەبوونی لەیاریگاكانی دەربەندیخان و دانیشتنی وەك تاكە ژن لە نێو ئەو هەموو هاندەرە پیاوە وتی:دەمەوێ‌ ئەوە بە كۆمەڵگا بڵێم، كە ژن هیچی كەمتر نییە لە پیاو، پێویستە هەمووان ژنەكانتان لەماڵ دەربهێنن و بیهێننە نێو یاریگاكان، چونكە وەرزش تەنها موڵكی پیاو نییە، هی ژنیشە و داواش لە ژنان دەكەم ئەو ڕێچكەیە بشكێنن.

 

 

هەروەها ناوبراو باسی لەوەش كرد، دوو هۆكاری سەرەكی هەیە بۆ كەمی  بەشداربوونی ژنان لەنێو هاندەران لە یاریگاكانی تۆپی پێدا، یەكەمیان ئەو ڕێگیرییە كۆمەڵایەتییەیە کە دابونەریتەكان دروستیان کردوون، دووەمیش ئەوەیە کە ژنان بەزۆری لەماڵەوەن و خەریكی ئیشوكاری ماڵ و بەخێوكردنی منداڵن.

 

 

میهرەبان ئاماژەی بەوەش دا، هەست بەهیچ جیاوازییەك ناكەم لەنێوان خوم وهاندەرە پیاوەكاندا، هەماهەنگییەكی زۆر باش لەنێوانمان هەیە، لەزۆرینەی یارییەكاندا خەڵاتم پێ دەبەخشن بەهۆی ئەوەی وەك تاكە ژن ئامادەی زۆرینەی یارییەكان دەبم و ئاواتمە وەرزشی شارۆچكەكەم لە لوتكەدا ببینم لەهەموو ڕوویەكەوە، لەگەڵ ئەوەشدا ڕووبەڕووی خۆشەویستییەكی زۆر بومەتەوە لەجیاتی ئەوەی ڕەخنەم لێ بگیرێت.

 

 

میهرەبان هەروەها ئەوەشی خستەڕوو: هەوڵمداوە هاوشێوەی خۆم ڕێژەی ژنان لەنێو یاریگاكان زیاتر بكەم، لەكەسوكارەكەی خۆمەوە دەستمپێكردووە، بۆ ماوەیەك بەردەوام بوون و دواتر كشاونەتەوە، ئێستا خەریكی هەوڵدانم بۆ ئەوەی ژنانی دەربەندیخان بهێنمە نێو یاریگا و وەکو پیاوان بەشداربن، زەرورە ئەوەشم بیر نەچێت لەدەربەندیخان زیاتر لە دوو هۆڵی لەشجوانی هەیە و تیپی بالە و باسكەش هەیە و ئاستیان زۆر باشە، بەڵام وەك ئەوەی دەبیستم لەوێش ڕێگیری هەیە لە بەشداربوونی ژنان.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin