Smiley face
Smiley face
Smiley face

تاهیر کەمالیزادە: دەبێت یەکدەنگی گەلی کورد بە دنیا بگەیەنین

2017-07-06 11:23:27



ڕۆژنیوز - بەرهە لەتیف


تاهیر کەمالیزادە، جێگری هاوسەرۆکانی کەنەکە، ڕایدەگەیەنێت: هەموو ئەو لایەنانەی سەردانمان کردوون بەڵێنی بەشدارییان لە کۆبوونەوەی ڕاوێژی نەتەوەیی کورد-دا داوە و دەشڵێت:" دەبێت یەکدەنگی گەلی کورد بە دنیا بگەیەنین".

 

لە چاوپێکەوتنێکیدا لەگەڵ ڕۆژنیوز، تاهیر کەمالیزادە، جێگری هاوسەرۆکانی کۆنگرەی نەتەوەیی کوردستان (کەنەکە)، باس لە ئامانجی کۆبوونەوەی ڕاوێژی نەتەوەیی کورد و هەڵوێستی لایەنە سیاسییەکان، بۆ بەشداربوون لەو کۆبوونەوەیە دەکات، کە بڕیارە لە ڕۆژانی ١٥ و ١٦ ئەم مانگە لە شاری سلێمانی بەڕێوەبچێت.

 

دەقی چاوپێکەوتنەکە:

 

-لەماوەی ڕابردوودا ئێوە وەکو کەنەکە، زنجیرەیەک سەردانتان بۆلای حزب و لایەنەسیاسییەکانی هەرچوارپارچەی کوردستان ئەنجامدا، ئایا سەردانی هەموو لایەنەکانتان کرد؟

 

"جگە لە حزب سەردانی کەسایەتی و رۆشنبیرەکانیشمان کردووە"

 

کەمالیزادە: لە باشوری کوردستان سەردانی هەموو حزبەکانمان کردووە، ئەوانەی زۆر بەرچاون، وە ئەوانەشی کە لە مەیدانی خەباتی نەتەوایەتییدان، ئەگەر هێزیشیان کەمتر بێت، بەڵام ئەوانیش خاوەن بیروباوەڕی خۆیانن، لە ڕۆژهەڵاتی کوردستانیش ئێمە سەردانی هەموویانمان کردووە، وە لە ڕۆژئاوای کوردستانیش نوێنەرانی کۆنگرەی نەتەوەیی کوردستان، جموجوڵێکی گەورەیان دەستپێکردووە حزب بە حزب سەردانیان دەکەین، حزبەکانی باکوردی کوردستان-یش بەشێکیان هاتوون بۆ بینی ئێمە و لەوێش لەگەڵیاندا کارد دەکەین، تەنها سەردانی حزبەکانمان نەکردووە، بەڵکو کەسایەتی و ڕۆشنبیران-یشمان بینیوە، سەردانەکانیشمان بۆ باگهێشت کردنیان بووە بۆ کۆبوونەوەی ڕاوێژی نەتەوەیی، کە ڕۆژانی ١٥ و ١٦ی ئەم مانگە بەرێوەدەچێت، لە کۆبوونەوەکەدا هەموو هێزە سیاسییەکان و بەشداربووان پرۆژەی خۆیان دەبێت، بۆ چارەسەرکردنی ئەو کێشانەی کە لەئێستادا گەلی کورد پیایدا تێپەڕدەبێت.

 

-پێشوازی ئەو حزب و لایەنەسیاسییانەی کەسەردانتان کردوون چۆن بووە بۆ ئەم هەنگاوەی ئێوە؟

 

"هەموویان بەڵێنی بەشداربوونیان داوە"

 

کەمالیزادە: لەگەڵ ئەو حزبانەی کە کۆبووینەتەوە، حزبی وا هەبووە دوو کاتژمێر قسەمان لەگەڵ کردووە، بیروڕای خۆمان گۆڕیوەتەوە، بیرمان لەوە کردووەتەوە کە گەلی کورد گەیشتووەتە ئەو ساتەی، کە ئیتر کاتی لێک تێگەیشتنە، هەموو ئەو حزبانەشی کە سەردانمان کردوون بەڵێنی بەشداربوونیان لەو کۆبوونەوە ڕاوێژییە داوە، هەموو حزبەکانیش پرۆژە و بیروباوەڕی خۆیان دەخەنەڕوو لە کۆبوونەوەکەدا، ئەوانیش هەموو بیروباوەڕیان باش بووە، ئێمەش کوردین و هەقی خۆمانە، پێکەوە دانیشین و ژیان و خاک و نەتەوە و داواکاریی خۆمان بخەینە بەرباس، یەکدەنگی خۆشمان بە دنیا بگەیەنین.

 

-لەدوای دیارییکردنی ڕۆژی کۆبوونەوەکە، هیچ بانگهێشتنمایەکی فەرمیتان بۆ ئەو لایەنانە ناردووە؟

 

"بانگهێشتنامە دەگاتە دەستی هەموو حزبەکان"

 

کەمالیزادە: لە ڕۆژانی داهاتوودا بانگهێشتنامە دەگاتە دەستی هەموو حزبەکان، ئەگەر حزبێکیش بەهەر هۆکار نەیتوانی بەشداری بکات، ئەوە شتێکی ترە و ئێمە چاوەڕوانی بەشداریکردنی هەموو حزبەکانین.

 

-تاچەند ئەم کۆبوونەوەی ڕاوێژی نەتەوەیی-یە دەتوانێت ببێتە هۆکاری تێپەراندنی ئەو کێشە و گرفتانەی کە هەرچوارپارچەی کوردستان-دا هەن؟

 

"دەبێت ڕێگاچارەیەک بۆ کێشەکان بدۆزینەوە"


کەمالیزادە: لە هەموو پارچەکانی کوردستان کێشە هەیە، حزبە کوردییەکانیش لە هەرچوارپارچەی کوردستان کێشەیان هەیە، لە ڕۆژئاوای کوردستان هێرش و شەڕی گەورە ڕوبەرووی گەلی کورد بووەتەوە، لە باکوری کوردستانیش شارە کوردییەکان و شوێنەوارە مێژووییەکان وێرانکراون، لە ڕۆژهەڵاتی کوردستان خەڵکەکەمان لە خاکی خۆیاندا بۆ پەیداکردنی پاروە نانێک کۆڵبەری دەکەن، بەڵام لەلایەن ڕژێمەوە هێرشیان دەکرێتە سەر و شەهید دەکرێن، لە باشوری کوردستانیش هەموو قەیرانەکان کەڵەکە بوون، لەم کاتەدا ئێمە دەڵێین ئەگەر بێینە لای یەک، دەبێت ڕێگاچارەیەک بۆ کێشەکان بدۆزینەوە، ئێمە لەڕوانگەی هەستکردن بەو قەیرانانە هەوڵ بۆ دروستکردنی ئەم کۆبوونەوەیە دەدەین، کۆمیتەی جۆراوجۆر دروست بکەین بۆ چارەسەرکردنی کێشەکان.

 

-ئێستا لە باشوری کوردستان، هەنگاو بۆ ئەنجامدانی ڕیفراندۆم هەیە، بەبڕوای ئێوە بەبێ یەکێتی نەتەوەیی کوردان ڕیفراندۆم ئەنجامی دەبێت؟

 

"لە کۆبوونەوەکەدا ئەو پرسە باس دەکرێت"

 

کەمالیزادە: مافی چارەنووس مافێکی سروشتی، مرۆڤایەتی و یاساییە، مافی هەر گەلێکە بەتایبەت گەلی کورد کە مافی خۆیەتی چارەنوسی خۆی یەکلا بکاتەوە، کوردستان چەندین ساڵە دابەشکراوە، هەر بەشێکی تایبەتمەندی خۆی هەیە، ئێمەش پێمان وایە کە گەلی ئێمە مافی خۆیەتی بڕیار لەسەر چارەنووسی خۆی بدات، بەڵام دەبێت هەلومەرجەکان لەباربن بۆئەوەی بتوانین سەرکەوتووبین لەو کارەدا، لەو کۆبوونەویەشدا ئەم پرسە دەخریتە بەر باس، کۆنگری نەتەوەیی دەتوانێت بیروبۆچوون و هیزەکان لێک نزیک بکاتەوە.

 

- پرسیاری کۆتایی، لەم بارودۆخەدا گەلی کورد تاچەند دەتوانێت ئومێدی هەبێت بەو کۆبوونەوەی ڕاویژی نەتەوەییە؟

 

"چاوەڕوانی دەرئەنجامی باشین"

 

کەمالیزادە:"دەمانەوێت بەم هەنگاوە هیوایەک بدەینەوە بە گەلی کورد، ئەگەر ئێمە هەروا بێدەنگ بین، کەس نایەت کێشەکانمان بۆ چارەسەر بکات، چاوەڕوانی دەرئەنجامی باشین و نائومێدنین، ئەگەر پێمان وابوایە کۆنفرانس بۆ کۆنفرانس و دانیشتن بۆ دانیشت بێت، ئەوا ئەنجاممان نەدەدا، حزبەکانیش دەبیت ئەوە بزانن، دوای ١٠٠ساڵ لە گرفتاری و لەژێر زوڵم چەوسانەوەداین، ئێستا ڕۆژهەڵاتی ناوەڕاست ڕوبەڕووی گۆڕانکاری دەبێتەوە، ئێمە ئەگەر هێزی خۆمان نیشان بدەین بێگومان سەرکەوتوو دەبین، ڕۆژئاوای کوردستان هێزی خۆی نیشاندا حیسابی بۆ کرا، هێزیشمان زۆرە، گەریلا، شەڕڤان و پێشمەرگە ئەمڕۆ لە مەیدانی بەرخۆداندان، وە خەڵکی ئێمەش لە هەموو بەشەکانی کوردستان، چاوەڕانی کاری بەدیهێنەرن، هیوادارم لەو کۆبوونەوەیەدا شتێک دروست ببێت و یەکڕیزی گەلی کوردیش باشتر ببێت، ئەو نائومێدیەشی کە ئێستا هەیە نەمێنێت، دەسەڵاتدارانی کوردیش لەبیری داواکارییەکانی گەلدا بن، چونکە بێ پشتیوانی گەل، هیچ شتێکمان پی ناکرێت. 

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin