Smiley face
Smiley face
Smiley face

پەرلەمانتارێکی هەدەپە: هیچ کێشەیەک بە پارچەبوون چارەسەر نابێت

2017-06-29 09:39:55



ڕۆژنیوز - سۆران حسێن

 

ئیبراهیم ئایهان، پەرلەمانتاری هەدەپە، ڕایدەگەیەنێت، کە ئەوەی بکەوێتە ئەستۆی هەدەپە بۆ پێکهێنانی یەکێتی نەتەوەیی ئەنجامی دەدات و جەختیشدەکاتەوە، کە کە هەرگیزبە پارچەبوون هیچ کێشەیەک چارەسەرنابێت.

 

ئیبراهیم ئایهان، پەرلەمانتاری پارتی دیموکراتی گەلان (هەدەپە)، لە چاوپێکەوتنێکی ڕۆژنیوز-دا، سەبارەت بە کێشەکانی بەردەم سیاسەتکردنی هەدەپە لە باکوری کوردستان، دۆخی زیندانیانی سیاسی و بەتایبەت سەلاحەدین دمیرتاش، هەروەها گۆشەگیرکردنی عەبدوڵا ئۆجالان، ڕێبەری پەکەکە و شەڕخوازییەکانی ئاکەپە و مەهەپە دژی گەلی کورد و ریفراندۆم لە باشوری کوردستان، دەدوێت.

 

دەقی چاوپێکەوتنەکە:

 

-ئێستا ئاستەنگییەکانی سەر هەدەپە زۆرن، پەرلەمانتاران و ئەندامانی هەدەپە لە باکوری کوردستان و تورکیا دەستگیردەکرێن و فشاریان دەخرێتە سەر، بۆچی؟

 

"ئامانج کپکردنی دەنگی سیاسەتی دیموکراتییە لە تورکیادا"

 

ئایهان: لە هەڵبژاردنی ٧ی حوزەیرانی ٢٠١٥ەوە، هەدەپە ئەنجامی زۆر بەهێز و باشی بەدەستهێنا، لەو کاتەوە لەلایەن ئەردۆغان و دەوڵەتی ئاکەپەوە شەڕێکی تایبەت دژی ئێمە دەستیپێکرد، قڕکردنی سیاسەتی دیموکراتی لەو کاتەوە بۆ ئێستا بە هەموو شێوەکان بەڕێوەدەچێت، زیندانیکردن و فشارەکان بۆسەر ئەندامان، بەڕێوەبەران و پەرلەمانتارانی هەدەپە زیادیان کرد، تا ئێستا زیاتر لە پێنج هەزار لە بەڕێوەبەران و ئەندامانی هەدەپە دەستگیرکراون، هەردوو هاوسەرۆکی حزبەکەمان و بەگشتی ١١ پەرلەمانتارمان لە زینداندان، لەلایەکی دیکەوە زیاتر لە ٨٠ هاوسەرۆکی شارەوانی باکوری کوردستان دەستگیرکراون، ئامانج لەم کردەوانە کپکردنی دەنگی سیاسەتی دیموکراتییە لە تورکیادا.

 

-دۆخی زیندانیانی سیاسی لە زیندانەکانی باکوری کوردستان و تورکیادا چۆنە؟

 

 

"لەهەمان دۆخی زیندانیانی کاتی کودەتاکەی ئەیلولی ١٩٨٠ دان"

  

ئایهان: دۆخی مرۆیی زیندانییەکان زۆر خراپە، ئاستەنگیی و فشاری زۆر دەخرێتە سەریان، دۆخی زیندانییەکان لە ئێستادا لە ئاستی دۆخی خراپی زیندانییەکاندایە لە کاتی کودەتای ١٢ی ئەیلولی ١٩٨٠دا، مافی زیندانییەکان بۆ چاوپێکەوتن لەگەڵ خێزان یان پارێزەرەکانیان پێشێلدەکرێت، بۆ نموونە ماوەیەکی زۆرە هیچ کامە لە پەرلەمانتارەکانمان نەیانتوانیوە پەرلەمانتارانی زیندانی ببینن، بۆیە ناشتوانین بە باشی ئاگاداری دۆخی ژیانیان بین، بەڵام بەگشتی ڕوونە بۆمان کە دۆخی ژیانی زیندانییەکان لە نالەبارترین دۆخدایە.

 

-گەلی کورد لە هەر چوار پارچەی کوردستان و بەگشتی خەڵکی جیهان دەیانەوێت زانیارییان سەبارەت بە دۆخی سەلاحەدین دەمیرتاش هەبێت، دەمیرتاش ئێستا لە چ دۆخێکدا ژیان بە سەردەبات؟

 

"ماوەی هەشت مانگە هیچ دادگاییەک لە سەر کەیسی دەمیرتاش بەڕێوەنەچووە"

 

ئایهان: ماوەی هەشت مانگە هیچ دادگاییەک لە سەر کەیسی دەمیرتاش بەڕێوەنەچووە، ئێستا زیندانیکردنی بەنایاسایی ئەنجام دراوە و هیچ بڕیارێکی فەرمی دادگای لە سەر نییە، پەرلەمانتارانی ئێمە نەک لەبەر کێشەی یاسایی بەڵکو بە مەبەستی سیاسی و هەوڵدان دژی ئیرادەی گەل خراونەتە زیندانەوە و هەمووانیش باش دەزانن زیندانییکردنی دەمیرتاش چ زیانێکی بە پەرلەمان و پرۆسەی دیموکراسی لە سەرتاسەری تورکیا گەیاند، ئەگەر لە بواری یاسییەوە ئەم بابەتە بنرخێنین دەتوانین بڵێین نەک دەمیرتاش بەڵکو زیندانیکردنی هەموو پەرلەمانتاران و ئەندامانی دیکەی حزبەکەمان بە نایاسایی ئەنجامدراوە، چونکە ئێمە حزبێکی یاسایین و وەکو هەموو حزبەکانی دیکە کاروخەبارتی حزبەکەمان بەڕێوەبردووە، ئەوان بە مەبەستی سیاسی زیندانیکراون، بەمەبەستی قڕکردنی سیاسی و ئیرادەی دیموکراسی گەلان، بۆیە ئێمە زیندانیکردنی ئەو هەڤاڵانەمان وەکو بە بارمتەگرتنیان ناوزەددەکەین، هاوپەیمانی ئاکەپە و مەهەپە دەیانەوێت دەنگی دیموکراسیخوازی ئێمە لە ڕۆژهەڵاتی ناوەڕاستدا کپ بکەن، لەلایەکی دیکەوە وا بیردەکەینەوە، کە ئەم زۆردارییە درێژخایەن نابێت و سەرئەنجام کۆتایی دێت، هەڤاڵانی ئێمە جگە لە دیموکراسی داوای هیچی دیکەیان نەکردووە و هیچ تاوانێکیان ئەنجام نەداوە.

 

-سیاسەتی ئاکەپە و مەهەپە تەنیا دژی گەلی کوردە، یان دژی هەموو گەلانی تورکیا هەمان سیاسەت دەکەن؟

 

 

"بەگشتی هاوپەیمانی ئاکەپە و مەهەپە دژی گەلی کورد پێکهاتوو"

 

ئایهان: بەگشتی هاوپەیمانی ئاکەپە و مەهەپە دژی گەلی کورد پێکهاتووە، ئەوان دەستکەوت و سەرکەوتنەکانی گەلی کوردیان پێ قبوڵ ناکرێت، دەیانەوێت هەموو دەستکەوتەکانی گەلی کورد لەناوببەن و گەلی کورد بێ بەرگریی بهێڵنەوە، لە چەند ساڵی ڕابردوووەوە سیاسەتی ئاکەپە دژی گەلی کورد نەک تەنیا لەباکور بەڵکو لە هەموو ڕۆژهەڵاتی ناوەڕاست و لە ڕۆژئاوای کوردستانیش دا بەڕێوەدەچێت، لە هەر شوێنێک بەرخۆدانی گەلی کورد هەبێت، لە هەر شوێنێک گەلی کورد پشتگیریی هەبووبێت ئاکەپە و مەهەپە دژی دەوەستنەوە و شەڕ دەکەن دژی.

 

-سوپای تورک لە چەند ڕۆژی ڕابردوودا لە سنوورەکانی باشور و باکوری کوردستان ئۆپەراسیۆنێکی بەرفراوانی دژی هێزەکانی گەریلا دەستپێکرد، ئێوە وەکو هەدەپە هەڵوێستتان چییە لە بەرامبەر داگیرکاری و لەشکرکێشی سوپای تورکدا بۆ خاکی کوردستان؟

 

"بە شەڕ و هێرش و هەڕەشە ئیرادەی گەلی کورد تێکناشکێندرێت"

 

ئایهان: ئێمە وەکو پەرلەمانتار لە هەموو شوێنەکان، لە پەرلەمان، لەسەر شەقامەکان لە ناو حزبدا و لە ناو خەڵکدا بەردەوام دەڵێین نامانەوێت شەڕ ڕووبدات، ئێمە دەمانەوێت پرسی گەلی کورد بە شێوەی ئاشتیخوازانە و دیموکراتی چارەسەربکرێت، دەیان ساڵە دەبینین کە ئەو پرسە بە شەڕ چارەسەر نەبووە، بانگەوازیشمان بۆ ئەردۆغان هەمیشە ئەوە بووە، کە لە ڕێگای ئاشتییەوە بیر لە چارەسەری پرسی کورد بکاتەوە، چونکە باش دەزانین بە شەڕ و هێرش و هەڕەشە ئیرادەی گەلی کورد تێکناشکێندرێت، داواکاری ئێمە لە حکومەتی تورکیا ئەوەیە کە بە شێوەیەکی ئاشتیخوازانە هەڵسوکەوت لەگەڵ گەلی کورد بکەن لە ڕۆژئاوا و باکوری کوردستاندا، ئەگەر دانوستانیان لەسەر ئەم بنەمایە دابمەزرێنن دیموکراسی لە سەرتاسەری تورکیاش پێش دەکەوێت، بۆ ئەمەش سەرەتا دەبێت ئیرادەی گەلان بە ڕەوا بزاندرێت ئینجا بیر لە دانوستان و چارسەری بکرێتەوە، بەڵام ئەردۆغان و ئاکەپە ئەمەیان ناوێت، دەیانەوێت لەناومان ببەن.

 

-ماوەیەکی زۆرە هیچ زنیارییەک سەبارەت بە دۆخی ژیان و تەندروستی عەبدوڵا ئۆجالان نازاندرێت و بە توندیی گۆشەگیرکراوە، نرخاندنی ئێوە چییە؟

 

"ئەو گۆشەگیرکردنە نادیموکراتی هێشتنەوەی سەرتاسەریی تورکیاشە"

 

ئایهان: پێویستە سەرەتا ئاماژە بەوە بدەین، کە پرسی ئۆجالان تەنیا تایبەت نییە بە گەلی کورد و پرسی دیموکراتی لە سەرتاسەری تورکیا دەگرێتەوە، هەروەها پەیوەندی هەیە بە بەدیموکراتیبوونی هەموو ڕۆژهەڵاتی ناوەڕاستیشەوە، ئێمە دەڵێین ئەم گۆشەگیرییە نامرۆیانەی ئێستا لەسەر ئۆجالان بەڕێوەدەچێت پێویستە لاببرێت و کۆتایی بێت، ماوەی ١٩ ساڵە ئەم گۆشەگیرییە بەردەوامیی هەیە و لەو دۆخەشدا بەردەوام پەیامی دیموکراسی و ئاشتی ناردووە لە زیندانەوە، بەڵام ماوەی چەند ساڵە کە گۆشەگیریی سەر ئۆجالان بەرفراوانتربووە، گۆشەگیرکردنی ئۆجالان، گۆشەگیرکردنی گەلی کورد و بێ چارەسەرهێشتنەوەی پرسی گەلی کوردە و دەتوانین بڵێین نادیموکراتی هێشتنەوەی سەرتاسەریی تورکیاشە.

 

-هەوڵدانەکانی کۆنگرەی نەتەوەیی کوردستان بۆ پێکهێنانی یەکێتی نەتەوەیی کورد بەردەوامیی هەیە، ئایا یەکڕیزی دەنگی کورد بە پێویست دەزانن و پشتگیریی هەوڵدانەکانی کەنەکە دەکەن؟ 

 

"ئەوەی بۆ یەکێتی گەلی کورد بکەوێتە ئەستۆی ئێمە ئەنجامی دەدەین"

 

ئایهان:ئێمە وەکو هەدەپە تێکۆشانی کەنەکە بۆ پێکهێنانی یەکێتی نەتەوەیی بەرز دەنرخێنین، ئێمە نەتەیانیا پشتگیری هەوڵدانەکانی کەنەکە دەکەین بەڵکو تا ئەو شوێنەی پێمان بکرێت هاوکاریشیان دەکەین، بەڕای ئێمە گەلی کورد پێویستە پشتگیری یەکدی بکەن و بۆ بەهێزکردنەوەی یەکدی تێبکۆشن، پاڕچەبوون بە هیچ شێوەیەک لە بەرژەوەندی گەلی کورددا نییە، بە تایبەت لە دۆخێکی وەها مێژووییدا کە وا خەریکە بە سەر ڕۆژهەڵاتی ناوەڕاستدا تێپەڕدەبێت، پێویستە گەلی کورد یەکێتی پێکبێنن، ئەوەی بۆ پێکهێنانی یەکێتی گەلی کورد بکەوێتە ئەستۆی ئێمەوە وەکو هەدەپە ئەنجامی دەدەین، هیواداریشین کە بەزوویی کۆنگرەی نەتەوەیی کۆببێتەوە و بڕیاری زۆر گرنگ دەربکرێن لە چوارچێوەیدا.

 

-هەڵوێستی ئێوە چییە سەبارەت بە ئەنجامدانی ڕیفراندۆم لە باشوری کوردستان؟

 

"ئەوەی بڕیاردەدات خەڵکی باشوری کوردستانە"

 

ئایهان: ئێمە وەکو هەدەپە هەڵوێستی خۆمان ڕاگەیاندووە سەبارەت بە ڕیفراندۆم، بە ڕای ئێمە دەبێت ئەم ڕیفراندۆمە ئیرادەی گەلی کورد لە باشوری کوردستان لە بەر چاو بگرێت، ئەوەی لەم نێوانەدا بڕیاردەر بێت خەڵکی باشوری کوردستانن نەک خەڵکی پارچەکانی دیکەی کوردستان، بە پێویستیشی دەزانین کە حزبەکانی باشوری کوردستان ناکۆکییەکانیان وەلا بنێن و ئەنجام وەربگرن لە یەکڕیزییان، چونکە ئەزموون پێمان دەڵێت کە هەرگیزبە پارچەبوون هیچ کێشەیەک چارەسەرنابێت، ئێمە وەکو هەدەپە هەموو ئەو شتانەی لە خزمەتی پێکهێنانی یەکێتی گەلی کورددا بێت بەرز دەنرخێنین و پشتگیریی دەکەین.

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin