Smiley face
Smiley face
Smiley face

زەکی شەنگالی: ڕۆژەڤی شەنگال نەک ریفراندۆم، بەڵکو گەڕانەوەیە بۆ سەر خاکی ئێزدخان

2017-06-23 13:18:39



ڕۆژنیوز - شەنگال

 

زەکی شەنگالی ئەندامی کۆردیناسیۆنی جڤاکی ئێزدی دەڵێت، کە ریفراندۆم ڕۆژەڤی خەڵکی شەنگال نییە و ڕۆژەڤی خەڵکی شەنگال گەڕانەوەیە بۆسەر خاکی ئێزدخان.

 

زەکی شەنگالی لە چاوپێکەوتنێکی تایبەتدا بۆ ڕۆژنیوز لایەنە جیاوازەکانی پرسی ریفراندۆم و کاریگەری ریفراندۆمی بۆسەر خەڵکی ئێزدی و هەروەها پێویستیی گەلی کوردی بە یەکێتی نەتەوەیی نرخاند، هەروەها بیروڕای خۆیان لەو چاوپێکەوتنەدا خستوەتەڕوو سەبارەت بە ریفراندۆم و گرنگی کۆنگرەی نەتەوەیی و کارا کردنەوەی پەرلەمانی هەرێمی کوردستان، ئەوەشیان وتوە کە نابێت ریفراندۆم لە جیاتی چارەسەکردنی کێشە، خۆی ببێتە کێشە بۆ گەلی کورد، هاوکات ئەوەشی باسکردو کە ئێستا لە هەموو کاتێکی زیاتر گەلی کورد پێویبستی بە یەکگرتوویی و یەکێتی هەیە، هەروەها باسی گرنگییەکانی بەستنی کۆنگرەی نەتەوەییشی کردوە.

 

دەقی چاوپێکەوتنەکە:

 

تا چ ڕادەیەک ریفراندۆم لە بەرژەوەندی گەلی کورددا دەبینن؟

 

"نابێت ریفراندۆم خۆی ببێتە کێشەیەکی گەورەتر بۆ گەلی کورد"

 

ڕۆژی ٢٥ی ئەیلول ریفراندۆمی سەربەخۆیی باشوری کوردستان بەڕێوەدەچێت، ریفراندۆم بۆ هەموو گەلان مافێکی ڕەوایە و هەموو گەلێک ئەو مافەی هەیە بە ئیرادەی خۆی بژیت، بەڵام پێویستە دۆخی کاتیش لەبەرچاو بگیرێت، بۆ نموونە پێویستە باس لەوە بکرێت کە حزبەکان و ڕێکخراوەکانی کوردستان تا چ ڕادەیەک لە بەڕێوەبردنی ئەو ریفراندۆمەدا بەشدارن، پێویستە ئەم بابەتە بنرخێندرێت، بۆ بەڕێوبردنی ریفراندۆم پێویستە هەموو مەرجەکانی ناوخۆ و دەرەوە گونجاو بن، نابێت ریفراندۆم خۆی ببێتە کێشەیەکی گەورەتر بۆ گەلی کورد.

 

ئێستا گەلی کورد تا چ ئاستێک پێویستی بە ڕێککەوتن و یەکگرتوویی هەیە؟

 

"بڕیارەکە لە لایەنێکەوە دەرکراوە"

 

ئەوە مافی گەلی کوردە کە ببێتە خاوەنی کوردستان و خاوەنی کۆمەڵگای خۆی، مافی خۆیەتی کە پشتگیری سیاسەتمەدارەکانی بکات، مافی گەلی کوردە کە دژی داگیرکەری تێبکۆشێت، بەڵام پێویستە بیر لەوە بکەینەوە، کە ڕیفراندۆم تا چ ڕادەیەک لە بەرژەوەندی گەلی کورددایە، کاتێک باس لە سەربەخۆیی دەکرێت، پێویستە لەناو یەکێتی کۆمەڵگادا ئەم بابەتە بنرخێندرێت، ئێستا ژمارەیەکی زۆر لە حزب و ڕێکخراوەکانی باشوری کوردستان بەشداری بڕیاری ڕیفراندۆم نابن، چونکە بڕیارەکە لە لایەنێکەوە دەرکراوە، ئەگەر بڕیارەکە لەلایەن هەمووانەوە یەکلایی نەکرێتەوە زیانی زۆر قورس بە خەڵک دەگەیەنێت.

 

ئەگەر ریفراندۆم بەبێ بەشداری هەموو لایەنەکان بەڕێووە بچێت، ئایا دەتوانین بڵێین کردەوەیەکی دیموکراتییە؟

 

"بە بڕیاری حزبێک و دوو حزب ڕیفراندۆم سەرناکەوێت"

 

پێویستە هەموو خەڵک لە پشتی ئەو بڕیارە بن و هەروەها پەرلەمانیش کارابکرێتەوە و پەرلەمان بڕیاری لەسەر بدات، ئەو بڕیارەی ئێستا دەرکراوە، بڕیاری پەرلەمان نییە، زۆر لایەن بەشداری ئەو بڕیارە نابن، ئێستا دۆخەکە بە شێوەیەکە کە سەرۆکی پەرلەمان ناتوانێت بچێتە هەولێر، ماوەی دوو ساڵە پەرلەمان داخراوە، لە کاتێکدا پەرلەمان ئیرادەی خەڵکی باشوری کوردستانە، ئەو پەرلەمانتارانە لەلایەن خەڵکەوە هەڵبژێردراون، هەندێک لایەن دەستیان بە سەر ئیرادەی خەڵکدا گرتووە، لە بارەی ڕیفراندۆمیشەوە، بە بڕیاری حزبێک و دوو حزب ڕیفراندۆم سەرناکەوێت، پێویستە ئیرادەی گەلی لەپشت بێت، بڕیاردان کارێکی ئاسانە، بەڵام ئەنجام وەرگرتن لە بڕیارێک زۆر کارێکی سەختە، ئەگەر خەڵک بەشداری بڕیارێک نەبێت ئەو بڕیارە بەتاڵە، لەلایەکی دیکەوە پێویستە هێزە نێودەوڵەتییەکانیش پشتگیری پێویست بدەن بەو بڕیارە، ئەگینا دیسانەوە کێشە دروست دەبێت، بۆ وەرگرتنی پشتگیری نێودەوڵەتیش ئامادەکاری بنەڕەتی پێویستە، ئەگەر خەڵک بە شێوەیەکی ئەرێنی بەشداری بڕیارەکە بکەن و پشتگیری نێودەوڵەتیشی بۆ وەربگیرێت دەتوانین بڵێین بڕیارێکی سەرکەوتوو دراوە، بەڵام ئەوەی کە ئێستادەیبینین هیچ کامە لەو مەرجانەی تێدا بەدی ناکرێت.

 

ئایا ریفراندۆم کاریگەری هەیە لە سەر شەنگال؟

 

"پێموانییە ریفراندۆم کاریگەرییەکی ئەوتۆی لە سەر شەنگال هەبێت"

 

ئێستا هەموو گوندەکانی شەنگال ڕزگارکراون، بەڵام لەناوخۆی شەنگالدا چەند دەستەییەک لە گۆڕێدایە و خەڵک پارچە پارچە و پەرتەوازەن، بۆیە ئێستا ڕیفراندۆم ناتوانێت ڕۆژەڤی خەڵکی شەنگال بێت، ئەوەی ئێستا بۆ خەڵکی شەنگال گرنگە ئەمەیە، کە چۆن بتوانن لە سەر پێیەکانی خۆیان بوەستن، چۆن بتوانن خۆیان لە ژیان لە ناو چادرەکاندا ڕزگاربکەن، بۆیە پێموانییە ریفراندۆم کاریگەرییەکی ئەوتۆی لە سەر شەنگال هەبێت، ئێستا شەنگال بە فەرمی سەر بە حکومەتی عێراقییە، ڕیفراندۆم لە باشوری کوردستان بەڕێوەدەچێت، بۆیە ڕیفراندۆم ڕۆژەڤی خەڵکی شەنگال نییە، ڕۆژەڤی خەڵکی شەنگال چۆن گەڕانەوەیە بۆ سەر خاکی ئێزدخان.

 

وەک دەزانن خەریکە هەوڵدەدرێت بۆ بەستنی کۆنگرەی نەتەوەیی، کۆنگرەی نەتەوەیی چۆن پێکدێت و ئەگەر پێک بێت چی دەکات؟

 

"بەستنی کۆنگرەی نەتەوەیی زۆر گرنگە"

 

کوردستان پارچە بووە، پێشوەختیش بۆخۆی چوارپارچەیە، ئەم پارچەبوونە شکستێکی گەورەیە بۆ گەلی کورد، هاوکات لەگەڵ پارچەبوونەکە داگیرکەرانیش زاڵن بە سەر خاکی کوردستاندا، لە دۆخێکی بەم شێوەیەدا گەلی کورد پێویستی پەلەی بە یەکێتی هەیە، بەستنی کۆنگرەی نەتەوەیی زۆر گرنگە، ساڵی ٢١٠٣ بە پێشەنگایەتی و دەستپێشخەری بەڕێز عەبدوڵا ئۆجالان هەنگاوە سەرەتاییەکان بۆ بەستنی کۆنگرەی نەتەوەیی نرا، زۆیشی هەوڵ بۆ دراوە، پێمانوایە کاتی هاتووە کە کۆنگرەی نەتەوەیی پێکبێت.

 

ئاستەنگییەکانی بەردەم بەستنی کۆنگرەی نەتەوەیی چین؟

 

"هەندێک لە حزبە کوردییەکان ناتوانن خۆیان لە بەندی ئەو داگیرکەرانە ڕزگاربکەن"

 

هێزە دەرەکییەکان بۆ ئەوەی کۆنگرەی نەتەوەیی پێک نەیەت زۆریان هەوڵداوە، هەندێک لە حزبە کوردییەکان ناتوانن خۆیان لە بەندی ئەو داگیرکەرانە ڕزگاربکەن و بەردەوام لەژێر کاریگەری بڕیارەکانی ئەواندان، بۆ بەستنی کۆنگرەی نەتەوەیی کۆبوونەوە و دانیشتنی زۆر بەڕێوەچوو، تاو ئەو ئاستە چووە پێشەوە کە خەریک بوو بەستنی کۆنگرە ڕاگەیەندرێت، بەڵام داگیرکەران و لە هەموویان زیاتر دەوڵەتی تورکیا ڕێگایان نەدا، ئەوانەی لەژێر کاریگەری تورکیا بۆ ئەوەی بەرژەوەندییەکانیان نەکەوێتە مەترسییەوە، دەستیان کرد بە ئاستەنگ دروستکردن لە بەردەم بەستنی کۆنگرەی نەتەوەییدا.

 

بە ڕای ئێمە، هەموو حزبە کوردییەکان پێویستیان بە بەستنی کۆنگرەی نەتەوەیی هەیە، لەم دۆخەی ئێستادا کۆنگرەی نەتەوەیی لە نان و ئاویش پێویستترە، تا کاتێک گەلی کورد یەک نەگرن و لەناو سنوورەکانی خۆیاندا پارچە بن ناتوانن باسی ڕیفراندۆم بکەن، پێویستە گەلی کورد پێش هەموو شتێک یەکێتی پێکبێنن و یەکبگرن، ئینجا ڕیفراندۆم بکەنە ڕۆژەڤ، بۆیەشە کۆنگرەی نەتەوەیی کوردستان لەم دوواییانەدا دووبارە کەتووەتە هەوڵدانەوە بۆ بەستنی کۆنگرەی نەتەوەیی، ئەو هەوڵدانە زۆر بەبایەخە، پێویستە هەموو حزبە کوردییەکان هاوکاری ئەو دەستپێشخەرییەی کەنەکە بکەن.

 

حزبێک کە ئاستەنگ دروست بکات لە بەردەم بەستنی کۆنگرەی نەتەوەییدا ناتوانێ خۆی بە نوێنەری گەلی کورد بزانێت، پێویستە هەموو حزبەکان بەرژەوەندییە حزبییەکانیان وەلا نێن و بیر لە بەرژەوەندییە نەتەوەییەکان بکەنەوە، ئەگەر ئەمە ڕوونەدات نە کۆنگرەی نەتەوەیی دەبەسترێت و نە یەکێتی نەتەوەیی پێکدێت، دەوڵەتی تورک لەم ساڵانەی ڕابردوودا قورسترین هێرشەکانی کردووەتە سەر شار و گوندەکانی باکوری کوردستان، شارەکانی وێران کردووە، چەتەکانی داعش هێرشیان کردە ڕۆژئاوای کوردستان، واتە سەرتاسەری کوردستان لە ژێر هێرشی زۆر قورسدایە، بۆ ئەوەی گەلی کورد لە چنگی ئەو هێرشانە ڕزگاربێت، یەکێتی نەتەوەیی لە هەموو شتێکی دیکە پێویستترە.

 

بە ڕای ئێوە کۆنگرەی نەتەوەیی پێویستترە یان ڕیفراندۆم؟

 

"تا کاتێک یەکێتی گەلی کورد پێک نەیات ئەم پارچە بوونەی ئێستا بەردەوام دەبێت"

 

بەدڵنیاییەوە یەکێتی بنەمای هەموو داواکارییەکی دیکەیە، ئێستا کار و هەوڵدان بۆ بەستنی کۆنگرەی نەتەوەیی دەبێت بە بنەما بگیرێت، ئەگەر یەکێتی گەلی کورد وەدی بێت داواکاری ریفراندۆمیش بەهێزتر دەبێت، دەبێت گەلی کورد لە باشوری کوردستانیش پێداگر بێت لە سەر پێکهاتنی یەکێتی، بۆ ریفراندۆمیش ئامادەکردنی زەمنیەکان زۆر گرنگە، یەک لە سەرەکیترین زەمینەکانیش یەکێتی نەتەوەییە، تا کاتێک یەکێتی گەلی کورد پێک نەیات ئەم پارچە بوونەی ئێستا بەردەوام دەبێت، پێکهێنانی یەکدەنگی گەلی کورد کاریگەری ئەرێنی دەبێتە سەر چوار پارچەی کوردستان و ڕۆژهەڵاتی ناوەڕاستیش.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin