Smiley face
Smiley face
Smiley face

ڕەخنەگرێکی ئەدەبی: خوێندنەوەی کتێب لە کەرتی پەروەردەدا پێگەی نییە

2017-06-19 15:04:02



ڕۆژنیوز - قەرەچوغ ئەنوەر

 

ڕەخنەگرێکی ئەدەبی، ڕەخنە لە وەزارەتی پەروەردەی حکومەتی هەرێم دەگرێت، کە هیچ پێگەیەکی بۆ خوێندنەوەی کتێب لە کەرتی پەروەردەدا دیاریینەکردووە و ئاماژە بەو ڕێکارانەش دەکات، کە لەڕێگایەوە دەکرێت خوێندنەوە بکرێت بە کلتور.

 

هەتا ئێستا خوێندنەوەی کتێب لەناو خوێندکاران و کۆمەڵگای باشوری کوردستان-دا بە گشتی نەبووە بە کلتور.

 

سەبارەت بەو بابەتە، عەبدولخالق یەعقوبی، ڕەخنەگری ئەدەبی و خاوەنی بڕوانامەی ماستەر لە کۆمەڵناسی بە ڕۆژنیوزی ڕاگەیاند: لە وەزارەتی پەروەردە کتێب بریتییە لەو چەند لاپەڕەیەی، کە پێویستە خوێندکار بۆ بابەتی نمرە وەرگرتن و پرسی سەرکەوتن لەبەری بکات و خوێندنەوەی کتێب لەو کەرتەدا شوێن و پێگەی نییە.

 

 عەبدولخالق یەعقوبی، وتیشی: بەھۆی ئەم سیستمەی پەروەردەوە خوێندکاران تەنیا بەریەککەوتنێکی فیزیکی و بەرژەوەندیخوازانەیان لەگەڵ کتێب ھەیە، نەک تێکەڵبوونێکی ڕۆحی و ھاوڕێیانە و سەرئەنجام پرسی خوێندنەوەی کتێب فەرامۆش دەکرێت و چیتر کتێب نابێتە بەشێک لە پێداویستیی ژیانی ڕۆژانە و ڕۆحیی تاک.

 

سەبارەت بەو ڕێکارانەی، کە پێویستە لە کەرتی پەروەردەدا بگیرێتە بەر بۆ بەکلتورکردنی کتێب خوێندنەوە، ناوبراو، وتی: دەبێت خویندنەوە و تەکنیک و گرنگییەکانی بکرێتە یەکێک لە مادەکانی خوێندن، ھەر لە باخچەی ساوایانەوە تا دواپۆلی خوێندن، لەگەڵ ئەوەشدا  مامۆستاکان یەک لە پێوەرەکانیان بۆ نمرەی ڕادەی چالاکیی خوێندکار بێت لە پرسی کتێب و خوێندنەوەی کتێب.

 

ئەو ڕەخنەگرە ئەدەبییە، وتیشی: پێویستە بۆ بەھێزکردنی ئاستی زانستی و بەرەوپێشبردن ساڵانە پێشبڕکێی خوێندنەوەی کتێب لە ئاستی خویندنگا، شار، پارێزگا و ھەموو هەرێمی کوردستان بەڕێوەبچێت و براوەکان خەڵات بکرێن و وەک کەسایەتیی نموونەیی خوێندکار بناسرێن. 

 

عەبدولخالق یەعقوبی، بە گرنگیشی زانی، کە مامۆستاکان ساڵانە خولی تایبەت بە خوێندنەوەیان بۆ بکرێتەوە و پلەبەرزکردنەوەیان بەشێکی لە سەر ئەو چالاکییانە بێت کە لە پێناوی بەکلتورکردنی خوێندەوەدا کردوویانە.

 

 عەبدولخالق یەعقوبی، ساڵی ١٩٧٤ لە شاری بۆکان-ی ڕۆژهەڵاتی کوردستان لەدایکبووە و  چەندین کتێبی ئەدەبی لە زمانی ئینگیلزی و فارسییەوە وەرگێڕاوەتە سەر زمانی کوردی لەوانە: ڕەخنەی ئەدەبی و قوتابخانەکانی، چارلز برێلسێر/ ڕۆمانی رێبازی دیکتاتۆرەکان، ئینیا تسیۆ سلیۆنی و چەندین کتێبی دیکە.

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin