Smiley face
Smiley face
Smiley face

تاکە نەخۆشخانەی فریاکەوتنی گەرمیان ٢٠ رۆژە بێ پزیشكە

2017-06-19 11:41:15



ڕۆژنیوز ـ هاوڕێ كرێكار

 

نزیکەی بیست ڕۆژە تاکە نەخۆشخانەی فریاكەوتنی گەرمیان 'شەهید هەژار' بێ پزیشكە و لە كاتژمێر 12ی شەو بەدواوە نەخۆشخانەكە هیچ پزیشكێكی تێدا دەوام ناكات، بەڕیوەبەری گشتی تەندروستی سلێمانیش دەڵێت ئەمە كێشەی نێوان بەڕێوەبەرە گشتییەكان و وەزیر و پزیشكەكانە.

 

بەهۆی مانگرتنی پزیشكە خولاوەكانی نەخۆشخانەی فریاكەوتنی شەهید هەژار لەشارۆچكەی كەلاری ناوەندی ئیدارەی گەرمیان، هیچ پزیشكێكی نشتەجێی خولاو دەوام ناكات و دەوام نەكردنیشیان كێشەی زۆری بۆ هاوڵاتیان دروستكردووە.

 

هەڵگورد حەمەئەمین جێگیری بەڕێوەبەری نەخۆشخانەی فریاكەوتنی شەهید هەژار لەشارۆچكەی كەلار بە ڕۆژنیوزی وت: بەهۆی مانگرتنی پزیشكانی نیشتەجێی خولاو(مقیم) لەتاكە نەخۆشخانەی فریاكەوتنی سنوری گەرمیان، بۆ ٢٠ رۆژ دەچێت نەخۆشخانەی فریاكەوتنی شەهید هەژار بێ پزیشكە، ئەم دۆخەش كێشەی زۆری بۆ هاوڵاتیانی سنورەكە دروست كردووە.

 

 

هەڵگورد حەمە ئەمین وتیشی: لە پێشووتردا ئەم پزیشكانە لەلایەن وەزارەتی تەندروستیەوە بە (تەنسیب)دامەزراون و دوای ماوەیەك لە دەوامكردن، مانیان گرت و داوای ئەوەیان كرد بەفەرمی دابمەزرێن، دوای ئەوەی کە دامەزران، ئێستاکە داوا دەكەن ڕاژەكانیان بگوازرێتەوە بۆ سەر میلاكی بەڕێوەبەرایەتی تەندروستی سلێمانی و لەسەر ئەو نەخۆشخانانە نەبێت كە دەوامی تێدا دەكەن لە دەرەوەی سلێمانی، بەم هۆیەوە دەستیان بە مانگرتن كردووە.

 

هەروەها ناوبراو، باسی لەوەش كرد، نەخۆشخانەكەمان، تاكە نەخۆشخانەی فریاكەوتنی سنوری گەرمیانە، ئێستا دەوامنەكردنی پزیشك كێشەی گەورەی بۆدروستكردووین، بۆ ئەوەی نەخۆشخانەكەمان بە یەكجاری دەوامی تێدا ڕانەوەستێ، پزیشكێكی ڕاوێژكاری نەخۆشخانەی گشتی كەلار و پزیشكێكی پسپۆر  پزیشكێكی خۆبەخشمان هێناوە، لەكاتژمێر هەشتی بەیانی بۆ 12شەو دەوام دەكەن و لە 12 شەو بەدواوە نەخۆشخانەكەمان پزیشكی تێدا نییە و دادەخرێت، تەنها بۆ حاڵەتی مەترسیدار و گرنگ نەبێت، دكتۆرە پسپۆرەكان بانگهێشت نەكرێن، ئەوانیش ئەگەر بێن.

 

جێگری بەڕێوەبەری نەخۆشخانەی فریاكەونی شەهید هەژار ئەوەشی خستەڕوو، كێشەكە تەنها ئێمە نین، بەڵكو كاریگەری زۆری لەسەر ئێمە داناوە بە هۆی ئەوەی ئێمە ناوچەیەكی زۆرمان لەسەرە، هەروەها ئەو بەڵێنانەی جێگری سەرۆكی حكومەت بە ئێمەی دا بۆ چارەسەری كێشەكانمان جێبەجێی نەكرد.

 

دكتۆر میران محەمەد، بەڕێوەبەری گشتی تەندروستی سلێمانی بە ڕۆژنیوزی وت: ئەو پزیشکانە داوا دەكەن میلاكیان بخرێتە سەر سلێمانی، بۆ ئەوەی لە سلێمانیش فێربن، بەڵام بە پێی خشتە بڕۆن بۆ گەرمیان، بەڕێوەبەرە گشتییەكانی گەرمیان و قەڵادزێ و شارەزووریش دەڵێن، ئێمە پزیشكمان دەوێ میلاكی خۆمان بێت و نامانەوێ لە سلێمانیەوە بۆمان بێت، پزیشكەكانیش دەڵَێن دەبێت پزیشكی سەر میلاكی سلێمانی بین بۆ زەمانی ئیقامە قودما و دراسات، بڕۆین بە خشتە دەوام بكەن لە شوێنەكانی دەرەوەی سلێمانی.

 

 

میران محەمەد وتیشی: ئەمە كێشەی نێوان بەڕێوەبەرە گشتییەكان و وەزیر و پزیشكەكانە، هەر کاتێک ئەوان گەیشتنە ئەوەی  بڕیار درا پزیشكەكان بگەڕێنەوە سەر سلێمانی، ئەوا ئێمە خشتە دادەنێن و بە پێی ئەو خشتەیە پزیشكەكان دەنێرین بۆ ناوچەكانی سنوری پارێزگای سلێمانی، ئەگەر بڕیاریش درا لەوێی بمێننەوە، ئێمە هیچ كێشەیەكمان نییە.

 

هەروەها ناوبراو باسی لەوەشكرد، بەڵێ ئەو داواییەی پزیشكە نشتەجێی خولاوەكان داواییان كردووە، بۆ خۆیان گرنگە، چونكە تۆ لە كۆێی ماڵت لە سلێمانی بێت و لە گەرمیان تەعین بیت، یان شارەزوور، لە كۆیە لە سلێمانی تەعین بیت، بۆیە ئەوان داوا دەكەن، بخرێنەوە سەر سلێمانی، چونكە خۆیان ماڵیان لە سلێمانیە و وا باشترە بۆ ئەوان.

 

نەخۆشخانەی فریاكەوتنی شەهید هەژار دەكەوێتە شارۆچكەی كەلاری ناوەندی ئیدارەی گەرمیان وجگە لە دانیشتوانی سنوری شارۆچكە و شارەدێیەكانی گەرمیان، هاوكات دانیشتوانی شارەدێی و گوندەكانی سنوری شارۆچكەی خانەقین سەردانی ئەم نەخۆشخانەیە دەكەن.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin