Smiley face
Smiley face
Smiley face

ئیلهام ئەحمەد: ئەگەر پێویست بکات یەپەگە لە دیمەشق-یش شەڕدەکات

2017-06-15 14:15:42



ڕۆژنیوز - سەلامی و شۆڕش 

 

ئیلهام ئەحمەد، هاوسەرۆکی مەسەدە، ئاماژە بۆ ئەوە دەکات، کە کورد و عەرەب دەتوانن پێکەوە ژیانێکی هاوبەش پێکبێنن وڕاشیدەگەیەنێت:"ئەگەر داوا بکرێت یەپەگە کە لە دیمەشق شەڕبکات و یەپەگەش بە پێویستی بزانێت ئەو کارە دەکات، چونکە دیمەشقیش بەشێکە لە سوریا، بۆیە کەس ئەو مافەی نییە بڵێت بۆچی یەپەگە لە ڕەقە شەڕدەکات".

 

ئیلهام ئەحمەد، هاوسەرۆکی ئەنجومەنی سوریای دیموکرات (مەسەدە) لە چاوپێکەوتنێکی تایبەتدا بۆ ئاژانسەکەمان باس لە چۆنییەتی و وردەکارییەکانی پێشڕەوییەکانی ناو ڕەقە دەکات و دۆخی سیاسی ناوچەکەش دەنرخێنێت.

 

ئیلهام ئەحمەد هەروەها تیشکی خستە سەر ئەو پروپاگەندانەی دژی هەبوونی یەپەگە دەکرێت لە ڕەقە و ڕایگەیاند، کە گەلی کورد و گەلی عەرەب دەتوانن ژیانێکی هاوبەش پێکەوە پێکبێنن، ئیلهام ئەحمەد لە چوارچێوەی قسەکانیدا، سیاسەتەکانی تورکیا و ئەمریکا لە بەرامبەر فدراسیۆنی باکوری سوریای نرخاند و باسیشی لە چۆنییەتی بەڕێوبردنی ڕەقە کرد پاش ڕزگارکردنی شارەکە لە چنگی چەتەکانی داعش.

 

دەقی چاوپێکەوتنەکە:

 

-ئۆپەراسیۆنی ڕەقە چۆن بەڕێوەدەچێت؟

 

"ڕاگەیاندنی جەزیرەی قەتەری سەرکەوتنەکان بەپێچەوانەوە پیشان دەدەن"


ئیلهام ئەحمەد: ئۆپەراسیۆنی ڕزگارکردنی ڕەقە بە شێوەیەکی باش بەردەوامە، چەند گەڕەکێک ڕزگارکراون، بەڵام دژی ئۆپەراسیۆنی ئێمە هەڵمەتی زۆر قورس هەیە، بۆ نموونە ڕاگەیاندنە تورکەکان و هەروەها ڕاگەیاندنی جەزیرەی قەتەری سەرکەوتن و پێشکەوتنەکانی شەڕڤانان لە ڕەقە بە پێچەوانەوە پیشاندەدەن.

 

-پڕوپاگەندەکەنی دژی ئۆپەراسیۆنی ڕەقە باس لەوە دەکەن، کە یەپەگە بە مەبەستی تاڵانکارییی چووە بۆ ڕەقە، ئێوە لە بارەی ئەو بانگەشانە چی دەڵێن، پێتان وایە بنەمای ئەو بانگەشانە چییە؟

 

"مەبەست سڕینەوەی ناوی سوریایە لەسەر یەپەگە"

 

ئیلهام ئەحمەد: ئەو پڕوپاگەندانە بەشێکی بەهۆی دژایەتی شۆڕشی ڕۆژئاوایە، ڕەقە شارێکی سوریایە، وەکچۆن حەسەکە شاری سوریایە، ڕاستە کە ژمارەی دانیشتووانی کورد لە ڕەقە و حەسەکە زۆرترن و مێژووی کوردەکانیش لەو شارانە زۆر کۆنە، بەڵام پێکهاتەی عەرەبیش لەو شارانە دەژین، بەتایبەت لە ڕەقە، ئەمەش تایبەتمەندی زۆربەی شارەکانی سوریایە، ئەو پڕوپاگەندانەی دژی یەپەگە ئەنجامدەدرێن بە مەبەستی سڕینەوەی ناوی سوریا لە سەر یەپەگە  و پێناسەکردنی وەکو هێزەکی دەرەکی ئەنجامدەدرێن، دەیانەوێت وای بنوێن کە ئەوانەی لەوێ شەڕدەکەن ناسنامە و تایبەتمنەندی سوریایان نییە، دەیانەوێت لە نێوان کورد و عەرەب دا ناکۆکی و ئاڵۆزی دروست بکەن، ئێستا لە چوارچێوەی شەڕەکەدا دەستکەوتی زۆر بە دەست هاتووە، کورد و عەرەب دەتوانن پێکەوە ژیانێکی هاوبەش پێکبێنن، لە یەک بەرەدا شەهید بن، چیدی وەکو سەردەمی ڕژێم نەماوە، کە هەموو شتێک بە ناوی عەرەب تەواو دەبوو، ئێستا ئیدی کورد، عەرەب، سوریان و تورکمان بە ناسنامەی خۆیانەوە لە بەرەکانی شەڕدان، ئەمە پارادیامێکی نوێیە کە بە هۆی ستراتیژی ئێمەوە ڕوودەدات، ئەم ستراتیژییە هاوبەشە بۆ شەڕی دژی داعش ژیانێکی هاوبەش دێنێتە ئاراوە،  ئەوانەی لە ناوچەکەدا دژی داعش شەڕ دەکەن خەڵکی ناوچەکە خۆین، مافی خۆیانە کە لە ناوچەی خۆیاندا تێبکۆشن، ئەگەر داوا بکرێت یەپەگە کە لە دیمەشق شەڕبکات و یەپەگەش بە پێوویستی بزانێت ئەو کارە دەکات، چونکە دیمەشقیش بەشێکە لە سوریا، بۆیە کەس ئەو مافەی نییە بڵێت بۆچی یەپەگە لە ڕەقە شەڕدەکات، یەکێک لەو لایەنانەی ئەم قسانە دەکات، دەوڵەتی تورکیایە، چونکە دەیەوێت لە نێوان پێکهاتەکانی کورد و عەرەب دا ناکۆکی دروست بکات، وەکچۆن لە ڕێگای دروستکردنی ئەو ناکۆکییانە لە تورکیا دژی گەلی کورد شەڕ بەڕێوەدەبات، تورکیا دەیەوێت ناوخۆی سوریا هەمیشە شەڕ بێت و ئەمەش لە ڕێگای دروستکردنی شەڕی نەتەوەکانەوە پێکدێنێت، بەڵام ئەوەی زۆر ڕوونە ئەمەیە، کە تێکۆشانمان هەموو ئەو پیلان و سیاسەتانەی تورکیای بەتاڵ کردووەتەوە.

 

-ئەو بانگەشەیەی کە ڕوسیا، تورکیا و پارتی دەڵێن یەپەگە لەگەڵ چەتەکان ڕێککەوتووە چۆن دەنرخێنن، دەڵێن یەپەگە بۆ هەڵاتنی چەتەکان ڕێرەوێکی کردووەتەوە؟.

 

" ئەو بانگەشانە بەتەواویی درۆن"

 

ئیلهام ئەحمەد: لەبارەی ڕەقەوە دۆخەکە تۆزێک جیاوازە، لەلایەکەوە هێشتا لە سوریا شەڕ بەڕێوەدەچێت، لە مەسکەنە، لە نێوان حەما و حومس و لە نێوان حەما و حەلەب شەڕە، هێشتا چەتەکانی نوسرە لەو ناوچانەدا ماون، هێزەکانی سوریای دیموکرات سەلماندیان، کە تاکە هێزن کە لە ناوچەکەدا دژی چەتەکان شەڕدەکەن، زیانی ئەو بانگەشانە بۆ تەواویی سوریایە، قەسەدە دژی چەتەکانی داعش شەڕ دەکات و ئەو بانگەشانە بەتەواوی درۆن، چۆنە پێشتر ڕژێم باسی ڕەوابوونی  شەڕی قەسەدەی دەکرد دژی داعش، بەڵام دواتر قسەکەی گۆڕی، ئەم بانگەشانە کێشەی بنەڕەتی دێننە ئاراوە، هەمووان دەزانن قەسەدە کاری وا ناکات.

 

-کورد لە کۆبوونەوەکانی پێشوی جنێف و ئاستانەدا بەشدار نەکرا، پاش ئەوەی دانیشتنەکانی ئاتسانە و جنێف کۆتاییان بێت چ مافێک دەدرێتە کورد؟. 


"ئەو کۆبوونەوانە شکستیان هێناوە"

 

ئیلهام ئەحمەد: تا ئێستا هیچ کام لەو دانیشتنانە ئەنجامیان نەبووە، هەر جارێک کە باس لە ئاگربەست کراوە بە پێچەوانە جێبەجێکراوە، واتە شەڕەکە قورستر بووەتەوە، بۆیە پێمانوایە ئەو کۆبوونەوانە شکستیان هێناوە و بڕیاریش نییە ئەنجامێکیان لێبکەوێتەوە، کاتێک سەیری دۆخەکە و گۆڕانکارییە سیاسییەکان دەکەین، دەبینین کە ئەو کۆبوونەوانە بۆ پێشنیاری ڕێگایەکی چارەسەری هیچ دەرفەت و توانا و چانسێکیان نییە، هەر لە سەرەتاوە بە ڕێگا نەدان بە ئێمە و بە هێزە دیموکراتەکان لە ناو کۆبوونەوەکاندا شکستی خۆیان ڕاگەیاند، هێشتا باس لە بەشداری ئێمە لە ناو ئەو کۆبوونەوانەدا نەکراوە، گوفتوگۆیەکیش بۆ ئەو مەبەستە لە گۆڕێدا نییە.

 

-زۆر جار بەهۆی کوردەوە پەیوەندی نێوان ئەمریکا و تورکیا تێکدەچێت، پەیوەندی نێوان ئەمریکا و تورکیا چ کاریگەرییەکی لە سەر سیاسەتی کورد هەیە؟.

 

 

"ئێمەی کورد لە سەرەتاوە تا ئێستا جوڵانەوەی سەربەخۆمان هەبووە"

 

-ئێمە نازانین ناکۆکییەکانی نێوان تورکیا و ئەمریکا تا چ ڕادەیەک ستراتیژییە، تورکیا هێڵێکی نوێی بۆ خۆی هەڵبژاردووە، چیدی وەکو ئەندامێکی ناتۆ ناجوڵێتەوە، بەتەواویی چووەتە بەرەی ئێران و ڕوسیاوە، پێمان وایە ئەمریکا ئەوەی پێ باش نییە، ئەمریکا ناڕازییە بەرامبەر بەو سیاسەتەی حکومەتی تورکیا بەڕێوەی دەبات، تێکۆشانی گەلی کورد لە ڕۆژئاوا ئێستا ئیدی تێکۆشانێکی گشتییە، ئەگەر کاریگەرییەکی نەرێنی یان ئەرێنی هەبێت، ئەو کاریگەرییە کارگەرییەکی گشتی دەبێت و تەنیا لە سەر سیاسەتی کورد نابێت، ئەمریکا و تورکیا پێویستە باش بزانن کە ئەگەر ڕێککەوتنێکیان هەبێت کاریگەری لە سەر هەموو سوریا دەبێت، ئێمەی کورد لە سەرەتاوە تا ئێستا جوڵانەوەی سەربەخۆمان هەبووە لەناو سوریادا، ئەگەر دانوستانمان لەگەڵ ئەمریکا هەیە بە ویست و ئیرادەی خۆمانە، بۆ ئەو دانوستانانەش نەک تەنیا کورد بەڵکو هەموو پێکهاتەکانی سوریا لەبەرچاو دەگرین.

 

-قەسەدە و ئەمریکا لەبواری سەربازییەوە پەیوەندی و ڕێککەوتنیان هەیە، ئایا ئەو پەیوەندیانە دەبێتە هۆی ئەوەی، کە ئەمریکا لە بواری سیاسییەوە فدراسیۆنی باکوری سوریا و ڕۆژئاوای کوردستان قبوڵ بکات؟.

 

"قبوڵی بکەن یان نا ئێمە بەردەوام دەبین"

 

ئیلهام ئەحمەد: ئێمە پرۆژەیەکی دیموکراتییمان پێش خستووە، ئەمە دەبێتە هۆی ئەوەی، کە لایەنەکانی دیکەش قبوڵمان بکەن، بۆ ئەمەش دەبێت ئیرادەیەکی سیاسی بەهێز هەبێت، ئەگەر ئەو ئیرادەیە نەبێت کەمو کوڕی زۆر بنەڕەتی دێتە گۆڕێوە، بۆ ئەوەی لە سوریا شەڕ ڕوونەدات ئیرادەیەکی سیاسی پێکهاتووە، دەتوانین بەردەوام بین لەم سیاسەتانەدا، قبوڵی بکەن یان نا ئێمە بەردەوام دەبین، هەم ڕوسیا و هەم ئەمریکا ئەگەر ئیرادەی سیاسی دیموکراتی خەڵکی سوریا قبوڵ نەکەن کاریگەری نەرێنی دەبێت لە سەر سیاسەتەکانیان و زیانی لێ دەبینن، بۆیە پێمانوایە هەر چەند سیستمی ئەڵتەرناتیڤ زیاتر پێش بکەوێت، لە بەرامبەر دا ئەگەری قبوڵ کران و بە ڕەوازانینی زیاتردەکات.

 

-لەم دواییەدا هەوڵدانەکانی حەشدی شەعبی بۆ پێکهێنانی هیلالی شیعی هاتووەتە ئاراوە،  حەشدی شەعبی تا شەنگال نزیک بووەتەوە، لەلایەکی دیکەوە هێزەکانی ڕژێمیش گەیشتوونەتە سنوری ئوردن، ئەو هیلالی شیعییە تا چ ڕادەیەک کاریگەری دەبێتە سەر فدراسیۆنی باکوری سوریا؟

 

"ئێمە لەگەڵ هیچ پرۆژەیەکی مەزهەبی نین"

 

ئیلهام ئەحمەد: ئێمە لەگەڵ هیچ پرۆژەیەکی مەزهەبی نین، سونە بێت شیعە جیاوازییەکیان نییە، موسڵمان یا کریستیانیش فەرقێک ناکات، پێمانوایە ناکۆکی مەزهەبی شەڕەکە قورستر دەکاتەوە، دەوڵەت نەتەوە هەر بەو شێوەیە، سیستمێکی دەوڵەتی کە لە سەر بنەمای ئتنیکێکی تایبەت دابمەزرێت ناکۆکی دیێتە ئاراوە، ئەگەر دەیانەوێت بەم پێشڕەویانە سیستمێکی مەزهەبی بونیات بنێن لەلایەن هیچ کەسەوە لێیان قبوڵ ناکرێت، ئەگەر لەلایەن ئەو هێزانەوە هێرشێک بکرێتە سەرمان بە مافی خۆمانی دەزانین کە بەرگری بکەین و وەڵامی هێرشەکانیان بدەینەوە.

 

-ڕەقە پاش ئەوەی لە چنگی چەتەکانی داعش ڕزگارکرا چۆن بەڕێوەدەبرێت؟

 

"پاش ڕزگارکردنی ڕەقە ئەنجومەنێکی نوێ دادەمەزرێت"

 

ئیلهام ئەحمەد: بەڕێوەبەرایەتییەکی هەرێمی بۆ ڕەقە دامەزراوە، پاش ڕزگارکردنی ڕەقە ئەو بەڕێوەبەرایەتییە دەتوانێت پێداویستی و داواکارییەکانی خەڵکی ڕەقە دابین بکات و بیر لە داهاتووی بەڕێوەبردنی ڕەقە بکاتەوە، ئەو بەڕێوەبەرایەتییە پێکهاتووە لە هەموو پێکهاتە جیاوازەکانی ناو ڕەقە و هاوسەرۆکەکانیشی دیاریکراون، هەر ئێستاش زۆر جدی کاردەکەن، پاش ڕزگارکردنی ڕەقە ئەنجومەنێکی نوێ دادەمەزرێت و بەڕێوەبەرایەتی کاری خۆی دەستپێدەکات.

 

 


ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin