Smiley face
Smiley face
Smiley face

بایک: ڕیفراندۆم دەرئەنجامی ئاستەنگبوونی سیاسەتەکانی ناوخۆ و دەرەوەی هەرێمە

2017-06-13 09:27:14



ڕۆژنیوز - ناوەندی هەواڵەکان

 

هاوسەرۆکی کەجەکە، ڕایدەگەیەنێت: ریفراندۆم لە رێگای پارتییەوە بووە بە ڕۆژەڤ، ئەمەش دەرئەنجامی ئاستەنگبوونی سیاسەتە ناوخۆیی و دەرەکییەکانی هەرێمە، ڕیفراندۆم مافێکی دیموکراتییەو نابێت هیچ کەس و لایەنێک دژی بوەستێتەوە، بەڵام ناشکرێت لەناو ئەو هەموو کێشە کۆمەڵگاییەدا ڕیفراندۆم وەکو سەرکەوتنێک بنرخێنین.

 

جەمیل بایک، هاوسەرۆکی کۆنسەی بەڕێوەبەرایەتی کۆما جڤاکێن کوردستان- کەجەکە، لە بەرنامەی "ئولکەدەن"ی تەلەفزیۆنی نیوز چانێلدا، سەبارەت بە پەیوەندییەکانی قەتەر و ئەردۆغان و ڕۆڵی ئەردۆغان لە پڕچەککردنی چەتەکاندا و پێشلکاریی یاسا نێودەوڵەتییەکان قسەیکردو تیشکیشی خستە سەر ڕیفراندۆم و بە مافێکی دیموکراتی خەڵکی ناوبرد، هەروەها وەڵامی ئەو بانگەشانەشی دایەوە کە باس لە پەیوەندی پەکەکە و حەشدی شەعبی دەکات.

 

بایک بەم شێوەیە قسەکانی دەستپێکرد:"دەسەڵاتداری ئێستای ئەردۆغان و باخچەلی نەک بە تەنها سیاسەتی قڕکردنی سیاسی بەڕێوەدەبات، بەڵکو هاوکات هەوڵدەدات کۆمەڵگای تورکیاش بکاتە هاوبەشی ئۆپەراسیۆنەکەی بۆ قڕکردنی سیاسی".

 

جەمیل بایک باسی لە هەوڵدان بۆ گۆڕینی دیموگرافیای کوردستان کردو وتی:"تورکیا بە ئاشکرا هەوڵدەدا گەلی کورد لە سەر خاکاکەی دەربکات، بۆ نموونە، ڕوخاندنی خانووی هاوڵاتیان لە سووری ئامەد، دەیانەوێت سوور لەناوببەن چونکە سوور بە واتای ئامەدەو ئامەدیش بە واتای هەمووی کوردستان، ئەوان دەزانن کە ئەگەر سوور بڕوخێنن، چیدی ئامەد جێگای ژیان نابێت، بۆیە پێویستە پشتگیری سوور بکرێت، پێویستە خەڵکی ئامەد بۆ پشتگیری سوور ڕاپەرن، پێویستە بیر دەوڵەتی تورک بخرێتەوە کە ناتوانێت بەم ئاسانیانە هێرش بکاتە سەر سوور".

 

هاوسەرۆکی کۆنسەی بەڕێوەبەرایەتی کەجەکە باسی لەوەش کرد:"پاش ڕیفراندۆمەکە حکومەتی ئەردۆغان و باخچەلی هەموو هەوڵی خۆیان دەدەن کە لە ناو کۆمەڵگادا فاشیزم ڕێکبخەن، چونکە باش دەزانن ئەگەر نەتوانن ئەم کارە بکەن لە ناو دەچن و نامێنن، بۆ ئەوەش هەموو سیاسەتەکانیان بۆ لەناوبردنی گەلی کورد بەکاردێنن، ئەو سیاسەتانەشیان تایبەت نییە بە ناوخۆی تورکیا، بەڵکو لە دەرەوەی تورکیاش دژی گەلی کورد دەجووڵێنەوە، لەم دۆخەی ئێستادا وتنی ئەوەی قۆناغی چارەسەری دەست پێدەکاتەوە، هەڵەیە، چونکە لەم دۆخەدا کە شەڕ زاڵە وتنی ئەم قسانە بەکاری ئاکەپە و مەهەپە دێن زیاتر".

 

ناوبراو هەروەها باسی لە داگیرکارییەکانی تورکیا لە خاکی سوریا و هێرشەکانی تورکیا و چەتەکانی بۆسەر گەلی کورد کردو وتی:"هەموو هێرشەکانی سەر شەهبا بە فەرمانی دەوڵەتی تورک ئەنجام دەدرێت، دەیانەوێت لە ڕێگای قڕکردنی ئتنکییەوە گەلی کورد لەو ناوچەیە دەربکەن، تورکیا خۆی خستووەتە ڕێککەوتنی ستراتژی ڕوسیا، سوریا و ئێران و دەیەوێت بەم شێوەیە لەو ناوە چەتە جێگربێت".

 

جەمیل بایک باسی لەوەشکرد، کە چارەسەری لە ڕێگای جنێف و ئاستانەوە پێکنایەت و هەموو شتەکان پاش ڕزگارکردنی ڕەقە ئاشکرادەبن، بایک بەم شێوەیە بەردەوامی بە قسەکانی دا:"ڕێگانەدرا تورکیا بەشداری ئۆپەراسیۆنی ڕەقە بێت و بەم شێوەیە لە دیاریکردنی چارەنووسی ڕۆژهەڵاتی ناوەڕاست بێبەشکرا، پاش ڕزگارکردنی ڕەقە، تێکۆشانی دژی داعش پێدەنێتە قۆناغێکی نوێ وە، پێکهاتنی سیستمێکی دیموکرات لە سوریا بە واتای لەناوچوونی فاشیزمی ئەردۆغان و باخچەلییە".

 

ناوبراو سەبارەت بەو بانگەشانەی دەڵێن، پەکەکە حەشدی شەعبی هێنایە ناوچەکە وتی:"ئەو بانگەشانە بەتەواوی درۆن، ئەوانەی هێزی بیانیان هێنایە شەنگال و هاوکاریان کرد هێزەکانی پارتی بوون، بۆ نموونە ئەو گروپانەی بۆ هاوکاریکردنی تورکیا هێنرانە شەنگال".

 

جەمیل بایک سەبارەت بە ڕیفراندۆمی سەربەخۆیی هەرێمی کوردستانیش وتی:"ریفراندۆم لە باشوری کوردستان لە رێگای پارتییەوە بووە بە ڕۆژەڤ، ڕیفراندۆم دەرئەنجامی ئاستەنگ بوونی سیاسەتە ناوخۆ و دەرەوەکانی هەرێمی کوردستانە، ڕیفراندۆم مافێکی دیموکراتییە و نابێت هیچ کەس یان لایەنێک دژی بوەستێتەوە، بەڵام ناشکرێت لەناو ئەو هەموو کێشە کۆمەڵگاییەدا ڕیفراندۆم وەکو سەرکەوتنێک بنرخێنین".

 

جەمیل بایک لە کۆتایی قسەکانیدا باسی لە ئاڵۆزییەکانی نێوان قەتەرو وڵاتانی عەرەبی و هەروەها پشتگیری ئەردۆغان بۆ قەتەرکردو وتی:"قەتەر لە ڕێگای سەرچاوە مادییەکانییەوە هەم وڵاتانی عەرەبی پارچە کردو وهەم بە جێگرکردنی داعش، نوسرەو ئیخوان موسلمین خزمەتی تیرۆریزمی کرد، ئەوەشی بە هاوکاری و یارمەتییەکانی ئەردۆغانەوە ئەنجامدا، قەتەر و ئەردۆغان هاوبەشن لەو تاوانانەدا و ئەردۆغانیش هەر لەبەر ئەوە پشتگیری قەتەردەکات".

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin