Smiley face
Smiley face
Smiley face

لە كامپەکاندا ڕێگری لە ژنان دەکرێت سەردانی پزیشك بكەن

2017-04-20 09:30:19



ڕۆژنیوز ـ هاوڕێ كرێكار

 

سەرپەرشتیاری تیمێكی تەندروستی لە كامپی ئاوارەكان ئاماژە بەوە دەكات، پیاوانی ناو كەمپەكان ڕێگیری دەكەن لەوەی ژنەكانیان لەكاتی دووگیان بووندا سەردانی پزیشكی ناو كامپەكە و دەرەوەی كەمپەكە بكەن بە مەبەستی وەرگرتنی ڕێنمایی.

 

نەبوونی هۆشیاری تاك و زاڵبوونی داب و نەریتی خیڵەكی لەناو كامپی ئاوارەكانی سنوری گەرمەسێر، بوەتە ڕێگیری لەبەردەم ئەو ژنانەی دوو گیانن، ئەمەش بوەتە هۆی ئەوەی ئەوەی منداڵان دوای لەدایك بونیان گیان لەدەست بدەن.

 

نەسرین ئەبوبەكر سەرپەرشتیاری تیمی تەندروستی لە هەردوو ‌کامپی قۆرەتوو و ئەڵوەن٢، بە ڕۆژنیوزی وت: لە كامپی ئاوارەكانی قۆرەتوو و ئەڵوەن٢، لە سنوری شارۆچكەی خانەقین-ی سەربە پارێزگای دیالە، ئافرەتانی دوو گیان كێشەی ئەوەیان هەیە لە لایەن مێردەكانیانەوە زۆر جار ڕێگە نادرێن سەردانی پزیشكان كامپەكە و دەرەوەی كەمپەكەش بكەن بۆ چارەسەری پەیوەست بە دوو گیانی.

 

وتیشی: چەندین جار لەگەڵ پیاوەكان دانیشتوین و پێمان ڕاگەیاندوون، كە پێویستە ڕێگە بە ژنە دوو گیانەكانتان بدەن سەردانی پزیشك بكەن چ لەناو كامپەكە، چ ئەو پزیشكانەی لە شارۆچكەی كەلار و خانەقینن، بەڵام ئەوان بەردەوامن لە ڕێگیرییەكان و سەردانی كردنی (مامان)ەكانی خۆیان بە باشتر دەزانن.

 

نەسرین ئەبو بەكر، ئەوشی وت: لەماوەی دوو مانگی ڕابردوودا لە كەمپی ئەڵوەن٢، بەهۆی ئەوەی مێردێك ڕێگیربووە لەوەی خێزانە دووگیانەكەی سەردانی تیمەكانی ئێمە بكات یان سەردانی پزیشك بكات لەدەرەوەی  كامپەكە، منداڵەكەی دوای لە دایكبوونی گیانی لەدەستداوە، هۆكارەكەشی دەگەڕێتەوە بۆ ئەوەی كە دایكی لە كاتی دوو گیانیدا كێشەی ژەهراوی بوونی دوو كیانی بووە، ئەگەر بێتو ژنەكە سەردانی پزیشكی بكردایە ئەوە منداڵەكە گیانی لە دەست نەدەدا، ئەمە جگە لەوەی پیاوەكانی ئەم كامپە ڕیگە نادەن مندالە تازە لە دایكبوەكانیان كوتانی (BCJ) بۆ بكرێت، چونكە پێیانوایە منداڵەكانیان ڕووبەڕووی مەترسی دەبنەوە.

 

نەسرین ئاماژەی بەوەشدا، كۆی هەموو كێشەكانی  ناو ئەم كامپانە، كە ڕووبەڕووی ژنانی دووگیان دەبێتەوە، هۆكارەكەی دەگەڕێتەوە بۆ نەبوونی هوشیاری لای دانیشتوانی ئەم كامپە، بە تایبەت پیاوەكان و زاڵبوونی كلتوری عەشایەری و خێلەكی، بۆیە پێویستە ڕێكخراوەكانی كۆمەڵی مەدەنی و ژنان هەوڵەكانیان بخەنەگەڕ بۆ هوشیاركردنەوەیان.

 

 

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin