Smiley face
Smiley face
Smiley face

لە قەڵادزێ بە مەراسیمێک ماڵی ماملێ کرایەوە.. بە وێنە

2017-02-17 16:45:21



ڕۆژنیوز - علی قادر 


دوانیوەڕۆی ئەمڕۆ لە شارۆچکەی قەڵادزێ سەر بە ئیدارەی ڕاپەڕین ماڵی هونەری ماملێ بە مەراسیمێک کرایەوە.


"ماڵی ماملێ" ماڵێکی هونەریە و چەند بەشێک لەخۆ دەگرێت، لەوانە هۆڵی سینەما و کتێبخانە و هۆڵێک بۆ کۆڕ و سیمیار و پەروەردە و میوزیک.


سەرەتای مەڕاسیمەکە بە چەند ساتێک وەستان بۆ گیانی پاکی شەهیدان دەستی پێکرد و دواتر وتاری بەخێرهاتن لەلایەن بەڕێوەبەری ماڵی ماملێ، سامان محەمەد  پێشکەش کرا.

 


سامان محەمەد وتی:" وەک وەفایەک بۆ گەورە هونەرمەندی کورد و زیاتر خزمەتکردنی شارەکەمان، هەستاوین بە کردنەوەی ئەم ماڵە هونەریە".


هەروەها وتیشی :" هەموو لایەک لە بێلایەنی و گرێدراونەبونی ماڵی ماملێ بە هیچ لایەنێکی سیاسی دڵنیا دەکەینەوە و لە داهاتووشدا ڕێگە بە هیچ لایەنێک نادەین کە ئەم شوێنە بۆ مەرامی سیاسی خۆی بەکاربهێنێت، چونکە ئەمە شوێنێکی هونەری کلتورییە و بۆ خزمەتی شارەکەمان و گەنجان و بەهرەمەندانی ناوچەکەمانە، نەک شوێنێکی سیاسی".


لە کۆتایی قسەکانیدا وتی :" لێرەوە داوا لە هەموو بەهرەمەندان و هونەرمەندان و سەرجەم چین و توێژەکان دەکەم ئەگەر بیانەوێت بە هەر جۆرێک خزمەتی ناوچەکەمان و کۆمەڵگاکەمان بکەن هەر لە کردنەوەی خولی پەروەردەیی و هونەریی وکۆڕ و سیمینار،  کە خزمەتی کۆمەڵگا بکات هەمیشە دەرگای ماڵی ماملێ بە ڕویاندا کراوە دەبێت".


دواتر چەندین بەرهەمی هونەریی پێشکەش بە ئامادەبوان کرا کە زیاتریان بەرهەمەکانی هونەرمەند گەورەی گەلەکەمان محەمەدی ماملێ بوون.


محەمەدی ماملێ ھونەرمەندی گۆرانیبێژ، مەقامبێژی کورد، خەڵکی شاری مەھاباده لە ڕۆژهەڵاتی کوردستان، ماملێ لە ساڵی ١٩٢٥ز بەرامبەر بە ١٣٠٤ی هەتاوی لە یەکێک لە گەڕەکەکانی شاری مەهاباد بە ناوی (خڕێ) لەدایکبووە، ماملێ ناوی محەممەد کوڕی سەعید کوڕی عەلییە، نازناوی ماملێ لە باپیرییەوە بۆی ماوەتەوە.


ماملێ لە ساڵی ١٩٦٣ چوەتە شارۆچکەی قەڵادزێ و چەند ئاهەنگێکی گێڕاوە و پاشان چووە بۆ شاری سلێمانی و سەرچنار و لەوێش چەند ئاهەنگێکی گێڕاوە، ماملێ زۆر ئاشنای خەلیلی سەددیقی و ڕەفیق چالاک بووە وە گۆرانییەکانی تایەر تۆفیق و عەلی مەردان و سەید عەلی ئەسغەر کوردستانی و محەمەد عارف و تەحسین تەهای زۆر بە دڵ بوون.


ماملێ لە هەڵبەستیشدا هەڵبەستەکانی (وەفایی و سلێمانی شاوەلە و مارف ئاغا و گۆران و هەژار و هێمن)ی لا پەسەند بووە و لە زۆر گۆرانیدا بەکاری هێناون، ماملێ خاوەنی زیاتر لە ٧٠٠ گۆرانییە، ماملێ لە ساڵی ١٩٩٩ و لە تەمەنی ٧٤ ساڵیدا کۆچی دوایی کردووە.

 


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin