Smiley face
Smiley face
Smiley face

شیلان شاکر: سیاسەتی پینەوپەڕۆ و هێنانی پلانی دەرەکی چارەسەری کێشەکان ناکات

2017-02-08 11:02:30



ڕۆژنیوز – سۆران حسێن

 

شیلان شاکر، هاوسەرۆکی تەڤگەری ئازادی ڕایدەگەیەنێت، کە ئەوان بۆ چارەسەری تەواوی قەیرانەکان باوەڕیان بە تێزەکانی ئۆجالان هەیە، بەگرنگیشی دەزانێت کۆنگرەی نەتەوەیی زوو ببەسترێت و هەر هێزێکیش ئامادەیی نەبوو لە دەرەوە بهێڵدرێتەوە، چونکە وەک خۆی دەڵێت:"ئیدی سیاسەتی پینەوپەڕۆ و هێنانی پلانی دەرەکی چارەسەری کیشەکان ناکات"

 

لە چاوپێکەوتنێکی تایبەتی ڕۆژنیوز-دا، شیلان شاکر، هاوسەرۆکی گشتی تەڤگەری ئازادی کۆمەڵگای کوردستان، باس لە دواین کار و چالاکییەکانی خۆیان و هەڵوێستیان دەربارەی قەیرانەکانی هەرێمی کوردستان و سیاسەتی نەوت و دۆخی شەنگال و پرسی هەڵبژاردن دەکات.

 

دەقی چاوپێکەوتنەکە:

 

-دواین کۆنگرەتان چ گۆڕانکارییەکی لەناو تەڤگەردا دروستکرد؟

 

"ڕەخنەمان لە کەموکورتییەکانی خۆمان گرت"

 

شیلان شاکر: لەم دۆخە ناهەموارەی هەرێمی کوردستاندا بەستنی کۆنگرە بۆ خۆی گرنگیەکی تایبەتی هەیە، لە کۆنگرەدا کاروخەباتی دوو ساڵی ڕابردوومان پێکەوە هەڵسەنگاند و ڕەخنەی کەموکورتییەکانمان کرد، چونکە هاوڵاتیان ئومێدی زۆریان بە تەڤگەری ئازادی هەبوو، ڕەخنەمان لە خۆمان گرت، کە دەبوو زیاتر ببینە وەڵام بۆ خواستەکانی هاوڵاتیان، لەگەڵ ئەوەشدا ئێمە لە ماوەی دوو ساڵی ڕابردوودا لەگەڵ زۆرینەی لایەنەکان پەیوەندیمان دروستکردووە و هەوڵی ئەوەمان داوە کە بە گفتوگۆ کێشەی نێوان لایەنە سیاسییەکانی باشور چارەسەر بکەین و لە کۆنگرەشدا چەندین بەرنامەی نوێمان بۆ کار داناوە، هیواداریشین ئەو متمانەیەی، کە جڤاتی گشتیمان پێیان داین لە کۆنگرەدا، ئەرکەکانی خۆمانی پێ پێکبێنین، وە هیوادارین کە بتوانین وەڵامی هەموو ئەو هاوڵاتیانەی باشوری کوردستان بدەینەوە کە متمانەیان بە ئێمە هەیە

 

- ئێستا تەڤگەری ئازادی چۆن بەڕێوەدەبرێت و گۆڕانکارییەکان چین؟

 

"دەستەی سەرۆکایەتی لە ١٧ کەسەوە کرا بە ٢٤"

 

شیلان شاکر: ئێمە لە دوو ساڵی ڕابردوودا ١٧ ئەنداممان هەبوو لە دەستەی سەرۆکایەتی، بەڵام لەم کۆنگرەیەدا کرا بە ٢٤ ئەندام، ئەوە بە بەشدارییەکی باشی ژنان و گەنجان، کە پێوەرێکی سەرەکی ئێمەیە، ئێمە سیستمی کۆتامان تێپەڕاندووە و ژنان بەتایبەت بە کرداری لە بەڕێوەبردندا جێگای خۆیان دەگرن.

 

-سیستمی هاوسەرۆک، بۆچی لە باشوری کوردستاندا تەنها ئێوە بەکاری دەهێنن؟

 

"لەسەر ئەو بنەمایە کاردەکەین کە تا ژن ئازاد نەبێت کۆمەڵگا ئازاد نابێت"

 

شیلان شاکر: ئێمە لە پەیماننامەی تەڤگەردا پەیڕەوی ناوخۆمان نییە، چونکە حزب و گروپ و ڕێکخراو نین، بەڵکو تەڤگەری ئازادی سیستمێکە چەتر ئاسایە، ئێمە ماوەیەکی زۆر گفتوگۆمان کرد بۆ ئەوەی بزانین چی بۆ باشوری کوردستان پێویستە و لە پێشتردا پشتگوێ خراوە، بۆیە بەوە گەیشتین ئەم شێوازە لە سیستم پەیڕەو بکەین کە سێ خاڵی زۆر گرنگی تێدایە.

 

خاڵەکان بریتن لەمانە، یەکەم- پێوانی ئێمە لە هاوسەرۆکیدا بۆ ژنە یەکسانی ڕەگەزییە و تێکۆشانیشی بۆ دەکەین، چونکە دەکرێت لە هەندێک بواردا نەمانتوانیبێت بەهۆی ئەو ڕەوشەی ژن لە کۆمەڵگادا هەیەتی، کاری ئێمە لەسەر ئەو بنەمایەیە کە تا ژن ئازاد نەبێت کۆمەڵگا ئازاد نابێت.

 

دووم- گەنجانە، ئێمە لەو باوەڕەداین کە پێویستە گەنجان بەشداری بکەن لە بونیادنانەوەی سیستمی دیموکراتی لە باشوری کوردستاندا، سیستمەکەش وەکو تێزێک لەلایەن ڕێبەر ئۆجالانەوە داهێنراوە، ئێمەش باوەڕمان بەوە هەیە باشوری کوردستان دەتوانێت دەست بەخاڵێکی وەرچەرخان بکات و کارمان کردووە و لە داهاتووشدا کاردەکەین، کە ئەم سیستمە لە تەواوی باشوری کوردستاندا پەیڕەو بکرێت.

 

سێیەم- وەک وتم تەڤگەری ئازادی سیستمێکە، بەشێوازێک دەتواندرێت هەموو حزب و ڕێکخراو و گروپێک لەگەڵ پاراستنی سەربەخۆیی خۆیاندا، لە تەڤگەردا جێگای خۆیان بگرن، چونکە لە باشوری کوردستاندا بە شێواز و ئەقڵییەتی گەورەیی و بچوکی حزب کارکراوە، هەر بەو بیانووە چەندین حزب پەراوێزخراون.

 

-ئێوە دووبارە بە هاوسەرۆک هەڵبژێردرانەوە، ئەمە بۆچی؟، لە کاتێکدا لە هەرێمی کوردستاندا خەڵک بێزارە لە هەڵبژاردنەوەی دووبارە؟

 

 

"تەڤگەر خۆی دووساڵە دامەزراوە، لە کاری ئێمەشدا پارە و ئیمتیاز بەرژەوەندی بوونی نییە و بڕیارەکانیش شەش کەس دەیدەن"

 

شیلان شاکر: تەڤگەری ئازادی خۆی دوو ساڵە دامەزراوە، ئەو دۆست و هەڤاڵانەی دوو ساڵی ڕابردوو لەگەڵ ئێمە کاریان کردووە بە ئازادی دەنگیان داوە و متمانەیان بە ئێمە داوەتەوە و پێیان باشبووە بۆ دوو ساڵی داهاتووش ئێمە وەک هاوسەرۆک بمێنینەوە، ئەوەی گرنگە بزاندرێت ئەمەیە، لای ئێمە نە دەسەڵات نە بەرژەوەندی و ئیمتیازات و نە پارە گرنگیی نییە، بەڵکو لە بیر و باوەڕی ئێمەدا تەنها خزمەتکردن و ئەرکە، ئێمە بە هەرەوەزی (دەستە جەمعی) کاردەکەین.

 

-مەبەستتان لە دەستە جەمعی چییە؟

 

شیلان شاکر: سەرەتا تاک سەرۆکیمان ڕەتکردووەتەوە، پاشان ئێستا وەک دەستەی سەرۆکایەتی شەش کەسین کە سێ ژن و سێ پیاو، دوو هاوسەرۆک چوار جێگر، بە جۆرێک هەموو کارەکان بە ڕەزامەندی شەش کەس بەڕێوەدەچێت، نەوەک کەسێک و دوان، ئێمە ئامانجەکانمان ئەوەیە دەسەڵاتەکان لای کەس و دوان نەبن و تەنها دەسەڵات لەسەرەوە نەچێتە خوارەوە.

 

"کۆنگرەی ئێمە دوو ساڵ جارێکە نەک ١٠ ساڵ یان بیست ساڵ جارێک"

 

وتیشی: ئێمە لە حەوت هەرێم (ناوچە) کۆنفرانسمان کردووە لە باشوری کوردستاندا هەر شوێنە و هاوسەرۆکی خۆی هەیە و دەسەڵات و کارەکانیان بەدەستی خۆیانە، لەبەرئەوە ئێمە ئەو کێشانەمان بەم مۆدێلە نوێیە چارەسەر کردووە، هەروەها کۆنگرەی تەڤگەری ئازادی دوو ساڵ جارێکە و وەک هەندێک لایەن نین دوای ١٠ بۆ ١٥ یان بیست ساڵ جارێک کۆنگرە ببەستین.

 

-بۆچی بە ئێوە دەوترێت بەشێک لە پەکەکە، وەڵامتان بۆ ئەمە چییە؟

 

"بۆ چارەسەری قەیرانەکان باوەڕیمان بە تێزەکانی ئۆجالان هەیە"

 

شیلان شاکر: بەداخەوە ئێمەی کورد هەمیشە خۆ خۆر بووین، ئەم چەمکەش کاری دەوێت تا تێپەڕی بکەین، بەخۆشحاڵیەوە ئێمە دەڵێین سودێکی زۆر زۆرمان لە تێزەکانی بەڕێز ئۆجالان وەرگرتووە، بەتایبەت وەکو سیستم کە بۆ چارەسەری قەیرانەکان پێشکەشیکردوون، سیستمی هاوسەرۆکایەتی و یەکسانی ڕەگەزی و پێشەنگایەتی گەنجان بۆ دەبێت زیانی هەبێت!، بۆ بە خراپی بزانین کە لە هەرکەسێکەوە ئەمانە وەربگرین، بێگومان ئێمە بە شانازییەوە بۆ چارەسەری تەواوی قەیرانەکان باوەڕیمان بە تێزەکانی ئۆجالان هەیە.

 

" ئۆجالان تەنها ڕێبەری پەکەکە نییە و تێزەکانیشی بۆ مرۆڤایەتییە"

 

لە سەدەکانی ڕابردوودا نە مارکس و نە لینین نەک کوردستان نەهاتنە ڕۆژهەڵاتی ناوەڕاست، بەڵام چونکە بۆ ئەو قۆناغە شتێکی جوانبوو بۆ چارەسەرییەکان زۆرکەس قبوڵیان بوو، ئێستا کەسێک لە ناو کوردا هەیە ڕێبەرێکی بەم شێوە دەرکەوتووە بۆچی دەبێت شەرمبێت، بە پێچەوانەوە شانازی پێوەدەکەن، ئێستا ئۆجالان تەنها ڕێبەری پەکەکە نییە و تێزەکانیشی بۆ مرۆڤایەتییە، ڕۆژئاوای کوردستانیش نمونەیەکی بەرچاوە، جگە لەوەی ژن و پیاوێک هاوسەرۆکن، یەکێکیان کوردە و ئەویتریان عەرەب.

 

-هەمیشە لە میدیاوە دەوترێت و ئێوەش ڕخنە دەگرن کە ئاستەنگیتان بۆ دروستدەکرێت، بەتایبەت لە زۆنی زەرد، ئەمە بۆچی؟

 

 

 

"ئەگەر تەڤگەری ئازادی ئاستەنگی بۆ دروستنەکرێت، کەواتە جیاوازیمان نییە لەگەڵ ئەوانی تردا"

 

شیلان شاکر: ئێمە سیستمی خۆبەڕێوەبەریمان پەسەندە، ئەو سیستمەش بە ڕێکخستنکردنی پێکهاتەکانی کۆمەڵگا و ژنان و گەنجان بە بنەما دەگرێت، لەبەرئەوە هەموو ئەمانە دژی سیستمی دەسەڵاتدارین، لە باشوری کوردستانیشدا دەسەڵاتداری پەیڕەو دەکرێت، بەڵام ئێمە لەسەر بنەمای ڕەشکردن و سڕینەوەی هیچ لایەنێک کارناکەین، ئێمە باوەڕمان بە پێکەوەکارکردن بە زیهنییەتی دیموکراتی هەیە، ئەگەریش تەڤگەری ئازادی ئاستەنگی بۆ دروستنەکرێت، کەواتە جیاوازیمان نییە لەگەڵ ئەوانیتردا، بەڵام ئێمە وەک ئۆپۆزسیۆنێکی ڕاستەقینە خۆمان ڕاگەیاندووە و کاری بنەڕەتیمان پەروەردە – ڕێکخستن- چالاکی-یە، کاری خۆمان دەکەین و دەشکرێت چاوەڕێبین و هەر ئاستەنگییەکمان بۆ دروستبکرێت، لە ڕابردووشدا چەندین هەڤاڵمان دەستگیرکراوە و ئەشکەنجە دراوە و بۆمب فڕێدراوەتە بارەگاکانمانەوە لە هەموو هەرێمدا، ئەمانەش هۆکاری ئەوەن کە دەسەڵاتی سیاسی هەرێم هیچ سیستمێکی بەدیلی پێ قبوڵ نییە.

 

-یەکێک لەو خاڵانەی ئێوە جەختتان لێکردووەتەوە خۆبەڕێوەبەرییە بۆ شەنگال، بۆچی ئەوە بە چارەسەر دەزانن کە جیاوازە لە هەموو حزبەکان؟

 

"نەک شەنگال، بەڵکو خۆبەڕێوەبەری بۆ هەرێم و عێراقیش بە گونجاو دەبینین"

 

شیلان شاکر: ئێمە خۆبەڕێوەبەریی بۆ تەواوی باشوری کوردستان و عێراقیش بە گونجاو دەبینین نەک تەنها شەنگال، کۆنفیدراڵیزمی دیموکراتی بۆ تەواوی عێراق و خۆبەڕێوەبەرییش بۆ باشوری کوردستان بە گونجاو دەبینین، ئەمەش لەبەر ئەم ڕەوشەی ئێستا لە ناوچەکەدا دەگوزەرێت، چونکە لەو سیستمەدا پێکهاتەیەک بەسەر ئەویتردا زاڵ نابێت، نەتەوەیەک زاڵ نابێت بەسەر ئەویتردا، ئەوانەی ئێستا ڕوودەدات لەوانە سەرچاوە دەگرێت، بۆ شەنگالیش دیارە چیان بەسەر هاتووە.

 

"ئەوەی دەتوانێت ئێزدییەکان بپارێزێت تەنها خۆیانن"

 

وتیشی: ئەمڕۆ بە هاوکاری هێزەکانی پاراستنی گەل و یەژاستار و یەپەگە و یەبەشە، ئێزدییەکان لە شەنگال توانیویانە سیستمێک بۆ خۆیان دروستبکەن، ئەمە داوای ئەوان خۆیانە، ئێمە ناتوانین هیچ بەوان بکەین و بڵێین وابژین و وا نەژین، ئەوان خۆیان ئەو بڕیارەیان داوە و نایانەوێت جارێکی تر هیچ فەرمانێک بەسەر ئێزدییەکاندا بێت، ئێمەش تەنها پشتیوانی لە داواکانی ئەوان دەکەین و لە پێناویشیدا کار و خەبات دەکەین، بەتایبەت بۆ ناساندنی لە حکومەتی هەرێمدا کە بەداخەوە ئێستا دەبینین چۆنە حکومەت، لەگەڵ ناساندنی ئەو هێزەی ئێستا لەوێ هەیە، چونکە پێمانوایە ئەوەی دەتوانێت ئێزدییەکان بپارێزێت تەنها خۆیانن.

 

-پێتانیوایە حزبەکان پشتیوانییان بکەن؟

 

"ئێزدییەکان خۆیان بڕیاری خۆیان داوە"

 

شیلان شاکر: بەداخەوە زۆربەی لایەنەکان دژایەتییان کردووە، ئەوەش بەخواستی وڵاتانی دەرەوە، بەتایبەت ئێران و تورکیا و هەموو گەلانی زلهێز، کە نایەنەوێت کەس خاوەنی دەسەڵاتی خۆی بێت، بەڵام ئێستا لە هەمووی گرنگتر ئێزدییەکان خۆیانن، ئەوان خۆیان بڕیاریان داوە خۆیان بەڕێوەببەن، هەر گەل و پێکهاتەیەک خۆی بڕیار بدات، پێمان وانییە کەس بتوانێت دژیان بوەستێتەوە.

 

-ئەو خۆبەڕێوەبەرییەی باستان کرد، بۆ کەرکوکیش بە باش دەزانن؟

 

 

"لە گەڵیداین و پێمان باشە، بەڵام لە چوارچێوەی باشوری کوردستاندا"

 

شیلان شاکر: لە چوارچێوەی سیستمی خۆبەڕێوەبەریدا بەڵێ لە گەڵیداین و پێمان باشە، بەڵام لە چوارچێوەی باشوری کوردستاندا، لە باشوری کوردستان ئێستا دەبینین تاکە کەسێک بڕیار لەسەر شەش ملیۆن کەس دەدات، ئێمە ئەوانە ڕەتدەکەینەوە، بۆ شەنگالیش با هەڵە لێکدانەوەی بۆ نەکرێت، ئێمە لە چوارچێوەی باشوری کوردستاندا خۆبەڕێوەبەری بۆ ئەوانیش بە باش دەزانین و پشتگیری لێدەکەین، بۆ کەرکوکیش ناساندنی ئەو پێکهاتە جیاوازانەی تێیدان بڕیاربدەن لەسەر خۆیان، نەک چەند کەس و لایەنێک لە کۆبوونەوە دوو قۆڵیەکاندا بڕیاری لەسەر بدەن.

 

-ئێوە وەک تەڤگەری ئازادی مەسعود بارزانی بە سەرۆکی هەرێم دەزانن، وەک زۆربەی حزبەکانی هەرێم؟

 

"کاتی بەسەرچووە و تەنها سەرۆکی پارتییە"

 

شیلان شاکر: ئێمە نەک ئێستا، زووتریش ئەوەمان ڕاگەیاندووە کە بارزانی ئیدی سەرۆکی هەرێم نییە و کاتی بەسەرچووە و تەنها سەرۆکی حزبەکەیەتی.

 

-ئەمساڵ دەکرێت هەڵبژاردن لە هەرێمی کوردستاندا بکرێت، تا چەند گرنگە لە کاتی خۆیدا بکرێت؟

 

"پێویستە سەرۆکێکی بێلایەن هەڵبژێردرێت"

 

شیلان شاکر: هەڵبژاردن زۆر گرنگە، بەتایبەت پێویستمان بە هەڵبژاردنی سەرۆکێکی بێ لایەن هەیە بۆ هەرێمی کوردستان، بە مەرجێک بە پاکی بکرێت، دوای ئەوەی ئیتر پرۆسەی دەستور ئاکتیڤکردنی حکومەت و..هتد، بەڕێوەببرێت، ئاوا دەتوانرێت ببێتە چارەسەری، ئەگەر وانەبێت ئەوا ناتوانین نە هەڵبژاردنێکی پاک بەڕێوەببەین نە سەرۆکێکی ڕاستەقینە هەڵبژێردرێت، هەرچەند ئێمە لەگەڵ سەرۆکدانین و لەگەڵ هاوسەرۆکیداین کاریشی بۆدەکەین، چونکە ئەو پۆستە پەیوەندی بەتەنها شەخسێکەوە نییە، ئەوەی کە کراوە تا ئێستا لە کۆبوونەوە داخراوە دوو قۆڵی و پێنج قۆڵییەکاندا کە مۆدێلی بەسەرچووە، چونکە زۆرشت بڕدراوەو جێبەجێ کراوە، دەبێت لە باشوردا ڕێگە بەو شێوازە نەدرێت، ئەوانەی ڕووودەدات هەمووی پەیوەندی بەو زیهنییەتەوە هەیە.

 

-هەندێک لایەن بانگەشەی سەربەخۆیی و بە دەوڵەت بوون دەکەن، بە بڕوای ئێوە ئێستا ئەوە کاتی هاتووە و دەکرێت؟

 

"تەنها دروشمە و هیچی تر"

 

شیلان شاکر: لە ئێستادا هیچ لەو باوەڕەدا نین، ئەوانە جگە لە دروشمێک و پرۆژەیەکی دەرەکی بۆ کۆمەڵێک ئامانجی جیاواز، ئەگەر نا ئەوە هیچ بنەمایەکی ڕاستی نییە، لە ئێستاشدا لە ئابوری و سیاسەتدا هەرێم شکستی هێناوە، پەرلەمان ئیفیلیجە، سەرۆکی هەرێم بەسەرچووە، دۆخی هاوڵاتیان و دۆخی ژنان دیارە کە چۆنە، داهات کەس نازانێت چی لێدێت، لەبەر ئەمانە لە جیاتی هەڵدانی دروشم دەبێت بە خۆیاندا بچنەوە و کێشەکانی مووچەخۆران و پێشمەرگە و مامۆستا چارەسەربکەن، لە باشوردا کەسێک ماوەکەی بەسەرچووە بڕیار لەسەر حکومەت دەدات، هەربۆیە ئەو نەوت و داهاتەی لە هەرێمی کوردستان هەیە و دەتوانێت ڕۆژهەڵاتی ناوەڕاست بەڕێوەببات، بەڵام هەرێمی کوردستانیش سودی لێ نەبینیووە، هەر ئەم سیاسەتانەش ئەو هەموو کێشەیەی لەگەڵ بەغدا دروستکرد، بۆیە وەک وتم کێشەکانیش بە کۆبوونەوەی دوو قۆڵی و چەند قۆڵی چارەسەر نابن.

 

-هێزێکی زۆری سوپای تورکیا لە هەرێمی کوردستاندا هەیە، ئێوە هەبوونی بە پێویست دەزانن؟

 

"هەبوونی ئەو هێزە بۆ ئێمە هێڵی سورە و کارمان بەردەوام دەکەین بۆ دەرکردنیان"

 

شیلان شاکر: ئێمە لە ڕابردوو بە کەمپەین داوای دەرکردنی ئەو هێزانەمان کردووە، خۆشبەختانە ئەگەرچی تێرکەر نەبووە، بەڵام زۆرینەی لایەنەکان پشتیوانیان لێکردووە، چونکە کاتێک تێر دەبێت کە بتوانین هێزەکان بکەینە دەرەوە، کە لە سەرەتای نەوەدەکانی سەدەی ڕابردووەوە هێندراونەتە هەرێمی کوردستان و لەم دواییەشدا بە بیانوی شەڕی داعش هەنێک هێز برایە باشیک، ئێمەش تا توانامان هەبێت خەبات دەکەین بۆ دەرکردنیان، بەهەموو خەڵکی کوردستانیش ڕادەگەیەنم کە بردنی ئەو هێزە بۆ باشیک بۆ هێرشکردن بوو بۆ سەر شەنگال.

 

وتیشی: بەڵام پیلانەکەی دەوڵەتی فاشیستی تورک و ئاکەپە تێکشکا، ئەویش بە بەرخۆدانی گەلی باشوری کوردستان و تەواوی کوردان، بۆیە هەبوونی ئەو هێزە بۆ ئێمە خاڵی سورە و هیوادارین هەموو لایەنەکانیش بەو ڕاستییە بگەن، مانەوەشیان هیچ گرنگییەکی نییە، چونکە ئاشکرایە لە ماوەی ڕابردوودا ئەو شەڕەی ڕووی لە کەرکوک و شەنگال و کوردستان کرد کوا هێزی تورک و هەبوونیان!، بۆیە نابێت کەس لەو باوەڕەدابێت کە ئەو هێزە بۆ پاراستنی کورد لە هەرێمی کوردستانە، ئەوەی کوردستان دەپارێزێت تەنها پێشمەرگە و شەڕڤان و گەریلایە.

 

خوێندنەوەی ئێوە بۆ دۆخی باکوری کوردستان لە ئێستادا چییە؟

 

"بۆ ئازادی بەڕێز ئۆجالان ئەوەی پێمان بکرێت دەیکەین"

 

شیلان شاکر: ئێمە بەردەوام چالاکیمان هەبووە، بە خۆشحاڵییەوە زۆر بەوەوە دەناسرێینەوە و ڕەنگە بەهۆی هەڵوێستەکانیشمانەوە ڕووبەڕووی ئاستەنگی بووبین، بەڵام ئەوە ئەرکە و بەکەسی نافرۆشینەوە، بەڵام دەبوو چالاکی زیاترمان لە ئێستادا بکردایە و هێزمان بە پارچەکانی تری کوردستان بدایە، هەرچەند لە داهاتووشمان بەردەوامی پێدەدەین، بە تایبەت لە ئێستادا کە لە ١٥ی شوبات ڕۆژی ڕفاندنی ڕێبەر ئۆجالان نزیک دەبینەوە و بۆ ئازادی بەڕێز ئۆجالانیش ئەوەی پێمان بکرێت دەیکەین.

 

-سیاسەتی تورکیا، بەتایبەت بەرامبەر کورد بۆچی بەم ڕۆژە گەیشت؟

 

"لە کەسایەتی ئۆجالاندا زیندان بۆ گەلی کورد بووەتە شوێنی بەرخۆدان و شوێنی سەرکەوتن"

 

شیلان شاکر: لە سەر ئاستی جیهاندا تورکیا وەک شانۆکارێک ڕۆڵ دەگێڕێت، بەڵام ڕۆڵەکەی هەرەسی هێنا و ئێستاش لە هەرەس دایە، زیهنییەتی ئاکەپە ئەوەیە کورد لە کوێ بێت قبوڵی ناکەن، تەنها بۆ باکور نا، لە ڕۆژئاوا چیان نەکرد! لە باشوربە ئێستاشەوە دەیانەوێت بەتەواوی داگیری بکەن، هەوڵی شەڕی ناوخۆشیان دا، نەشیانتوانی ئەو هەموو دەنگەی هەدەپە قبوڵ بکەن، ئەوانەی ئاکەپە لە بەهێزبووندانییە، بەڵکو لە بێهێزیدایە، گەلی باکور ٤٠ ساڵە لە خەباتدایە، بۆیە ئەم پەلاماردانانەی ئێستاش ئەوان لە خەبات بەرەو دواوە نابات، لە کەسایەتی ئۆجالاندا زیندان بۆ گەلی کورد بووەتە شوێنی بەرخۆدان و شوێنی سەرکەوتن.

 

-لە ماوەی ڕابردوودا، کەجەکە بەیاننامەیەکی بۆ کۆنگرەی نەتەوەیی دەرکرد، ئێوە تا چەند پشتیوانی دەکەن؟

 

"پێویستە کۆنگرەی نەتەوەیی زوو ببەسترێت"

 

شیلان شاکر: ئێمە لەهەموو کاتێکدا پشتیوانیمان کردووە و ڕامانگەیاندووە کە پێویستە کۆنگرەی نەتەوەیی زوو ببەسترێت و هەر هێزێکیش ئامادەیی نەبوو لە دەرەوە بهێڵدرێتەوە، چونکە ئیدی سیاسەتی پینەوپەڕۆ و هێنانی پلانی دەرەکی چارەسەری کیشەکان ناکات، سەردانێکی کەرکوک بکرێت و سەنگەرەکانی پێشمەرگە و گەریلا ببینن کە چۆن پێکەوە ژیان دەکەن، گەورەترین ڕەخنەیە کە ئێمە تا ئێستا یەک دەنگ نین، چونکە ئەوان بە کردار یەکدەنگییان پاراستووە.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin